ИшбархӀи дила шанничила бурес дигулра, сунелара у Ахъушала районна халкьлис гӀяхӀдешла ва дигила ишаратли бетаурси.
Манап Муслимович Манапов акӀубси сай 1968 ибил дусла майла 5-личив, Ахъушала районнизиб мерлабиубси бегӀлара гьарахъси ва ахъти дубуртар Къарап бикӀуси шилизив, сабира урхьуличибад 2200 метрла ахъдешличибси.
Ил бахъал дурхӀначилси хъалибарглизив акӀубси сай. Илала дудеш букӀун сайри, неш – колхозла хӀянчизар. Жагьли вирухIейчивад ил дебали жигарчевси ва сакIубси вири.
1975 ибил дуслизив ил НацIила шилизибси гехӀел дусла школализив учIес вехIихьибсири. Нахкила шилизиб 10-ибил класс таманбарили, 1985 ибил дуслизив, МяхӀячкъалализибси ДГПУ-ла индустриально-педагогический факультетлизи керхур.
БелчӀудила замана гӀярмиялизиб къуллукъбарахъес живарибсири.
БелчӀуди таманбарибхӀели, НацIила шилизибси школализи учительли узахъес вархьибсири. Илав учительли узули калун, кӀинайс директорла хӀянчиличив узули калун. Илав узухӀелира илини декIар-декIарти хIянчи дирутири, халкьлис кумеквикIусири.
2001-ибил дуслизив М.Манапов Москвализи арякьун, ва илав предпринимательла хӀянчилизи ахъиб. Улкала тах шагьарлизиб ил гьатIира жигарчевли узес вехIирхьули сай. Амма илини сунела биштӀаси ватӀайчила хъумуртули ахӀен, вирусигъуна кумек гIеббиахъули сай сунела шантас.
2017 ибил дуслизив МяхӀячкъалализи чарухъун, ва предпринимательла хӀянчи даимбариб.
ВиштӀахӀейчивад спортлизи ахъибси Манапли декIар-декIарти абзаназир чуйнара чедибдеш ва савгъатуни сархиб. Дусми ардякьун, амма илала спортличи диги хIедишун. Гьанна илини жагьилти спортсменти гIеббурцули сай.
2018 ибил дуслизив ил ДР-ла шайчибси Россияла армспортла Ассоциацияла вице-президент ветаур. Абзаназир бутӀакьяндеш дирути арадешлизиб нукьсандеш лебти чулахъунас илини арцлашалси кумек гIеббиахъули сай.
ИшбархӀилис Манап Манаповли Ахъушала районнизир ва арагIебли республикализир дурадуркIути декIар-декIарти спортла шайчирти далдуцуни детерхахъес кумекбирули сай ва илдачи вашули сай.
Нешла мезани мяхIкамдарес гӀягӀнили сари или лебилра гъайбикIухIели, Манап Манаповли илди мяхIкамдирнила шайчибси сиптализи сунелара пай кабихьиб. Сунени хъараахъурси школалисра илини мурталра кумекбирули вирар.
Манап Муслимович – пагьмучевси адам сай. Ил даим сагати пикруми-хӀерани даргес или умцIули вирар, илди гIямрулизир детерхахъес багьандан. Меценатли сунела шилизи аркьуси гуми тIашбатур ва гьар дус илини сунела харжаначил шила гьундури къулайдирули вирар. Амма илала бегӀлара бекIлибиубсигъуна хасдеш – гIямрула къиянти аги-кьяйдализи бикибти сунела шантас кумек гIеббиахъни.
М.М.Манаповла гIяхIдешуни, адамтачи уркIи изни пикрила дурар кахIелун. Ил ДР-ла спортла ва физкультурала Министерствола ва Москвала областьла Правительствола шайзивад ХIурматла Грамоталичил, Ахъушала районна бекIла ва цархIилти жамигIятла организациябала шайзивад Баркаллала кагъуртачи лайикьикибси сай чуйнара.
ИшбархIиличи бикайчи ил спортличил вархваси левал, илис тIабигIят дигахъу ва акьуси заманара илаб буркIули вирар. Назмурти лукIа, халкьлис гIяхIдешуни диркьес дигахъу.
М.М.Манаповли сунела хIябалра дурхIяра тяп сайгъунтили халабиахъули сай.
ПасихIчевси ва мурталра цархIилтас кумекбирес хIядурси Манапли сунела шанти-ургаб халаси хIурмат сархиб.
Илгъуна сай нушала шан, гьарилличи уркIи изуси, жигарчевси, сахаватси. Лебтасалра гIибратчерти илала баркьудлумани гIямрулизир черяхIти кьасани детерхахъес ва челябкьлализиб чула биштIаси ватIан дурхIнас ва дурхIнала дурхIнас талихI баргибси мерличи шурбухъахъес цархIилтира уркIичеббирули саби.
Мурад Алжанбеков
