Дагъиста Халкьла Собраниела депутат Узлипат ГIусмановна ХIясановала сипта хIясибли, «ВИП Кулинария» бикIуси центрлизиб СВО-ла бутIакьянчибас хасдарибти, илди дигIянбиркахъес кумекдирути (маскировочные) сетани хIядурдирнила майдан абхьили саби.
Ил мер хасси бетуцлис балбикилира саби: гIяхIси мерличиб мерлабиъни, бахъал жагьилти башни багьандан. Жагьилтани иличи итмаданал халаси иштяхI дакIубариб, сабира жигарчебли бузерилизи ахъиб. Центрлис биалли, бекIдеш дирули сари дебали уркIи гьаргси, гIяхIли дигахъуси Кумсият Саламовна Мирзаевани. Ил школала генеральный директорра сари. Илини балбуцла бутIакьянчиби кофела хIебержахъили хIебурхьу.
— Дявила хасси балбуцла бутIакьянчибас нушала кумек хIяжатси саби, — дугьаризур цалабикибтачи Узлипат ГIусмановна. – Нушазивад гьариллис фронтличибти ВатIан балтахъантас икьалабарес имканбикIур. Ил барес багьандан, кумекчибала (волонтерти) цалабяхълизи керхес ва маскировочный сетани хIядурдирнилизир бутIакьяндеш дарес чебиркур. КамхIисабдан, ибкьси бузерила ца сягIятла духIнар 1-2 метрла бухъяндешличилти сетани далкьаахъес вирар. Илкьяйдали нушаб имканбикIур нушала бургъантала гIямру уцахънила баркьудилизи белгиси пай кабихьес.
Устадешла дарс чебаахъиб кумекчи Зайнаб Рашидовани, суненира гьанналис гьалар илди сетанала шударшцад бергараг дархьибси.
Устадешла дарсличиб цалабикибти жагьилтани багьур маскировочный сетанани гранатаби иргьути беспилотникунала бяхъяназибад бургъанти мяхIкамдирниличила. Илди сетанала уди дигIянбикибхIели, беспилотникунас бургъанти чебаэс къиянбулхъули саби. ВацIала мер-мусаличир имцIаливан хIяжатдиркули дирар цIяба-шиниша рангла сетани. Авлахъличир биалли – шала-шиниша рангла. ХIебла замана хIяжатдиркур шала-кьерхIе рангла сетани — янила замана дерубти кьарла рангличи мешути.
Депутатла къайгъначибли майдайчир бузерилис хIяжатти лерилра шуртIри акIахъубли сари: сетани хIядурдируси станок ва хасси чIянкIи.
И.Шамилла уличилси кьакьалабси 1-ибил юртлизиб мерлабиубси «ВИП Кулинария»-ла майдайчиб маскировочный сетани далкьарахъес бурсибиэс дигути лебтачилра хIерли саби.
ТIагьират ХIясанова
