Адамла гIямрулизиб печатьла продукцияли белгиси мер бурцнилис бикьридеш дирули сари журналистунала ахъси даражаличиб хIурматбирнили. Ишди бурхIназибра, Россияла печатьла БархIила байрам дурабуркIнила дазурбазиб, Гьалмагъдешла Юртлизиб Дагъистан Республикала премьер-министр ГIябдулмуслим ГIябдулмуслимовли гьунибаъни дураберкIиб журналистунала цалабяхъла вакилтачил. Балбуцличи цалабикиб бахъхIи бузути ва чула бузери бехIбихьибти, къантIли буралли, республикала СМИ-ла сабухъчебли бузути журналистуни, дявила корреспондентуни, декIар-декIарти медиабала хIянчизарти. Илдала лугIилизибри федеральный изданиебала хIянчизартира.
ГI.ГIябдулмуслимовли журналистуни мубаракбариб Россияла печатьла БархIиличил ва илдала бузерилис ахъси кьимат бедиб. Илини бурулри журналистунани декIар-декIарти анцIбукьуназир бутIакьяндеш дирути ва сабухъчебли бузути адамтачила, мягIничерти бетуцуначила мурталра баянти цаладирхъули сари ва аргъбаибти макьалаби лукIули сари или. Ил халаси жавабкардешла баркьудира саби. СМИ-ла вакилтачи адамтала бирхаудира камси ахIенгу. Илдани бархьдешличил ва чедетаахъили гьаладирхьути баянтачи халкь мурталра хIерлира бирар.
Шадлихъла аги-хIяйзиб дурабуркIуси балбуц бехIбуцайчи ДР-ла премьер-министр ДР-ла «Дагпечать» ГАУ-ли балкьаахъурси почтала продукцияла выставкаличил тянишиуб. Илар лерри декIар-декIарти изданиеби, илдала лугIилизир миллатла мезаначил дурадухъунти жузала сборникуни.
Журналистуни шабагъатлабирухIели, ГI.ГIябдулмуслимовли багьахъур «Дагъистан» ибси Этномедиахолдинглизи миллатла изданиеби цаладяхънила мягIничебдешличила. «Нушала халкьанала культура ва мезани мяхIкамдирнила ва гьаладяхI дашахънила шайчиб ил цалабяхъли сунечи бихьибси игьдибар марбариб», — буриб илини.
Премьерли илкьяйдали буриб гьарил жумягIлизир миллатунала мезаначил дурадулхъути газетаби хIердирули вирус или. Лерилра газетабазибадли «Замана» газетала балкьаахъни, каргьни ва материалти мерладирни гIяхIбилзан викIулри ил. Ил чебаэс жагаси ва ункъли хIядурбарибси газета биъни багьесли саби.
Республика гьалабяхI башахънилизи лайикьси пай кабирхьули бузути масс-медиала хIянчизартас баркалла багьахъур илини: «Нушала республикала тарихлашалси бетуц ва адамтала гIямрула шалуби пагьмуличил ва бархьдешличил сипатдирнилис хIушаб баркалла багьахъес дигулра. ХIушани Дагъистан жагасили ва чебяхIсили чебаахъести имканти дургулра. ХIушала гIяхIдешличибли лебилра дунъяличиб Дагъистан машгьурбиубли саби лебгIеб жагаси ва дахъал шаликарси сабливан».
ДР-ла премьер-министрли баянти гьаладихьиб ишхIелла манзиллизиб журналистуни дахъал къияндешуначи бяхIигули биъниличила. Биалра, сегъунти-дигара аги-кьяйдализир илдани чучи хъарти хIянчи тамандирулира сари.
«ИшхIелла манзиллизир улкализиб ва дунъяличиб бархьдешличилти багьахънибачи хIяжатдеш имцIабиубхIели, бархьси девла мягIничебдеш дурхъасили бетарахъули саби», — чебатур илини.
Балбуцла дазурбазиб Дагъистан Республикала премьер-министр ГIябдулмуслим ГIябдулмуслимовли СВО-лизир бутIакьяндеш дирутачила баянти гьаладирхьутани дурабуркIуси хIянчира ахъли кьиматлабариб. «ХIуша гьарли-марти игитунира!» — буриб илини Дагъиста журналистуначи дугьавилзули.
Премьер-министрли Дагъистан Республикала Правительствола ХIурматла Грамотабачил шабагъатлабарибти-ургар лерри «Замана» газетала культурала отделла редактор ПатIимат Кьурбановара. «Замана» газетала хIянчизартани илгъуна шабагъатличил ПатIимат мубаракрирули сари ва илала бузерилизир гIурра дахъал сархибдешуни диубли дигниличила балахъули саби.
«Кьурбанова ПатIимат ГIямаровна дахъал дусмазир редакциялизир сабухъчерли рузули сари. Илини ункъли далути сари литературала, хаслира художественный мез. Илини газетализи макьалабала дурарадли назмуртира лукIули рирар. ПатIиматли мурталра декIар-декIарти далдуцуназир жигарла бутIакьяндеш диру ва илар мягIничерти масъулти ахъдурцули гъайрулхъан. Ил устадешчерси хIянчизар сарливан, нуша иличи се-биалра гIеббурахъес дугьадилзули дирехIе», — бурули сари «Замана» газетала бекI редактор Салимат ГIялиевани.
Илкьяйдали, журналистика гьалабяхI башахънилизи халаси пай кабирхьни багьандан, ДР-ла Правительствола ХIурматла Грамоталичи лайикьрикиб «Дагъиста хьуну адам» журналла бекI редактор-руководитель Хамис Шамиловара. Иличил бархбасахъи, Хамис ГIяхIмадхановнара нушани чихъси шабагъатличил уркIи-уркIиларад мубаракрирехIе, гьаннала гIергъира бузерилизир сархибдешуни дулгехIе.
Балбуц дурабуркIухIели СМИ-ла цархIилти хIянчизартала сархибдешунира ахъли кьиматладариб.
Нушала корр.
