БиштIатала гIямрула бурхIни шаладирахъути байрумти сари Сагаси Дусла ва илди акIубси бархIила. Гьарил дурхIя илди байрумтачи абзурли дус хIерли виъни чисалра дигIяндеш ахIен. БиштIатас илцадра мягIничертили детаурти илди дусла духIнар гьачамцун дашути бурхIназир бегIтани, гъамтани, юлдашунани илдас савгъатуни пешкешдирули сари. Савгъат дурхъаси биънилизиб ахIен анцIбукь, дурхIяла уркIи шадбиахъни саби бегIлара кьадричебси.
«Сен дусли гьачамцун башуси акIубси бархIила байрам? ДяхIили бихуси бургар сагаси дус, хIеблизиб вавначил ил нушачи сен гьабхIебикIуси?», — ибти ва дахъал цархIилти суалти хьардиули дирар дурхIнани бегIтази. Ил баркьудили баянбирули саби дурхIнас дигути байрумтачи бахъхIи хIерликабирес чевкънили илди паргъатагарбирахъниличила. ХIебиалли, илди байрумти дурхIнас дебали хIяжатти ва дигути сари.
ХIера, нушачи ишди бурхIназибра Сагаси Дусла байрамли сагадан гьуни баргиб. 2025 ибил дусла январьла цаличиб гьарил юртлизибти дурхIни савли абизурмад хIулкIули ёлкаличибяхI гьалакбикIули саби. Чус дигутигъунти савгъатуни илар лерни илдани гIячихъли балуси саби. СенахIенну сихIрула хабарлизирван чула пикруми ва хьулани далути бегIтани илди хIядурдирули дирар.
ХIейгеси биалра, гIергъиси замана Сагаси Дусла байрам хIярамси саби, дураберкIес асухIебируси саби, ит саби, иш саби… или хабурти тIинтIдирули сари. Байрам дураберкIес чили къадагъабирусил нуни аргъес рирули ахIенра. Сагаси Дуслизиб дурхIни ва халатира бархли, разибарнилизиб се вайси лебси? Байрам дураберкIес асухIебирули биалли, се барес хIяжатли гьатIи дурхIнани? Сегъуна диннизиб леба биштIати разибарахъес асухIебирар ибси пикри? Чинарадли дургути адамтани илдигъунти хIяжатагарти баянти?
Нуша школализи дашухIели Хала БархIила байрамличи дашахъес къадагъабирути анцIбукьуни къаршидиркули дири. Гьанна дакIубиубли саби ёлкалис шайтIунти сари, Сагаси Дусла байрам дурабуркIни бунагьла саби бикIутира. Байрамли чисалра зарал хIебирахъу, илини чIянкIли уркIи разибиахъести хIялани алкIахъа.
ДурхIядеш жагадируси байрам дурабуркIни къадагъабарес чилилра хIейрар. БегI гьалабси яргализиб дурхIнас зараллати бетуцуни агардарес къайгъни дакIудараб илдигъунти «гIякьлукартани». ГIямрула бетуцуни дарсдарес чузир имканти лерли диалли. ХIебиалли, телефонтази бухIнакабикили, пайдаагарти видеобачи хIербикIни, халатала хIурмат хIебирни, белчIудилизи ахъес хIейгни дурхIнас пайдалати дургар.
ПатIимат Кьурбанова
