Гьанна чумал дус Украинала мер-мусаличиб нушала улкали дявила хасси балбуц дурабуркIули саби. Илизир дагъистанлан, дарган уршбани чула ВатIайс мардеш чедиахъули, гьабзадешла гьунарти дурадуркIули сари.
Улкала хъархIерагардеш батахъес дурабухъунти асил уршби-ургаб камли ахIен Сергокъалала районнизибадра. ЦархIилван биэсра хIебирар. СенахIенну Россияла Игитли ветаурси, сунела «Дузеная, узби!» ибти дугьбачил дунъяличивра машгьурвиубси МяхIяммад НурбяхIяндовра ил районнизивад сай дураухъунси. Илдигъунти черяхIти гъабзадеш лерти, къияндикибси замана итмаданал кумекличи дурабухъес хIядурти биъни марбирули саби ишбархIира балбуцлизир бутIакьяндеш дирути сергокъалалантани. Наб ишаб бурес дигулра илдигъунтала лугIилизивадси ГIямар Ибрагьимович ГIялиевличила.
ГIяхIти хIял-тIабигIятличилси, яхI-ламусла, адамтачи дигичевси, амма сунела бухъя-зегъаличи чекайзурси, жавабкарси пергер уршила дурхIядеш Сергокъалала районна Сергокъалала шилизир шалгIердухъун. Илала багьудлумачи вегIирнила гьуни бехIбихьибсири Сергокъалала кIиибил школализиб. Илар ГI.ГIялиевли мурхьти багьудлумала дурарад, гьарли-марси, гIяхIси бяркъра касиб. Ил биалли, хьулчили бетаур илала челябкьлализиб ВатIайс къуллукъбирнила санигIят бузахънилисра. Сунени чеббикIибси ил гьуни ахъес ГIямар гьарзати гунзри кайцIули, жигарчевли гьалавяхI вашулри. Илди гунзрани ил МяхIячкъалализибси Россияла Миллатла гвардиялизи киб. Украинализиб бетурхуси дявила хасси балбуц бехIбихьибти цаибти бурхIназивадал сержант ГI.ГIялиев вягIда хIясибли къуллукъбирес даимвиуб. Улкалис ва даршути халкьлис урехи хIебиахъес къайгъилизив илини сунела къуллукъуни халати жавабкардешличил тамандирули сай.
ГIямар ГIялиевли Запорожская областьла дай уркIили сабси Энергдар бикIуси шагьарлизиб, дебали мягIничебси атомная станцияла мякьлаб къуллукъбирусири. Илини бутIакьяндеш дариб бекIлибиубси инфраструктуралис къараулдеш бирнилизир, сунечи хъардарибти хIянчила жавабкардеш иргъули ва сунезирад тIалабдирути къуллукъуни гIягIниси тяхIярли детурхахъули.
Дергъ мурталра кьяркьсили уббулхъуси саби. Ибкьти аги-кьяйдализир авал баз къуллукъуни детурхахъуси ГIямарлисра кьисматли бяхъ чегахъиб: ил пулемётла снарядли някълизивад вяхъиб. Ил анцIбукь чарх-бекIлис гIязаблицун ахIи, рухIла дебадеш ахтардибируси баркьудилира бетаур. ГIямар арадеш къулайбирули калун гьаланачи Москвала бегIлара гIяхIти медицинала учреждениебазиб, кIинайс – МяхIячкъалализиб, гъамтала ва узи-уршила хIерудилиуб. БикIаргу, вегIла гъамти лебси мерличир зугIлумачилара хъумуртуси саби или. Илкьяйда бетаур ГIямарличилра. Къияндешунас мутIигIхIекIили, бекI ахъли кабуцили, ил ишбархIира жагьилтазир ВатIайчи диги адилкьули узули сай. Ил ургъанцун ахIенну, жамигIятла жигарчевис хIяракатчира сай. Илини халаси къайгъи бирули саби ВатIайс къуллукъбирутачила гьанбикуни калахъес. ГI.ГIялиевли «Дубуртала гьанбикуни» бикIуси жамигIятла организацияла Сергокъалала отделениелис бекIдеш дирули сай. Сунела гьар бархIиласи бузериличил нушала халкьла игитдешла хIурматбирули, тарихлизир бургъантала къел калахъес халати къайгъни дакIудирули сай.
ГIямар ГIялиевла лер «Къуллукъуни тамандирнилизир декIарухъни багьандан» ва «Дявила хасси балбуцлизир бутIакьяндеш дарни багьандан» бикIуси медальти. Илданира бикьридеш дирули сари илала игитдешлис, ВатIайчи гьарил-марти диги лернилис.
ИшхIелла жагьилтас ГIямар бархьдешгIевли калзни, адамдеш ахъси даражаличир кавлахънила, къияндешуназивад уруххIекIнила гIибратра сай. Дигахъаси гIулухъабани илдигъунтачибад мисал кайсули, аслу-минала ва хала бегIтала дурхъати гIядатунала хIурматбирули.
ГIямар ГIялиевгъунти гьарли-марти патриотуни лебхIели саби Чедибдеш нушала бирниличи халаси умутра бихьибси. Сагаси дуслизиб илкьяйда бетарниличи бирхаудира леб. Жяв-жявли тамандиаб дургъби, нушала бургъанти ара-сагъли чула хъалибаргуначи, гъамтачи чарбухъаб!
Нушала корр.
