ИшбархIи нушала асил уршбани Украинала мер-мусаличиб бетурхуси дявила хасси балбуцлизир жигарла бутIакьяндеш дирули сари. ВатIа хъархIерагардеш балтахъули, илдани чула хъарбаркьуни жавабкардешличил тамандирулицунра ахIенну, гъабзадеш дакIудирули, халати гьунарти чедиахъули сари.
ХIушанира чебиуливан, сецада нушала Дагъис­тай­зибад Россияла Игитуни бетаурти. Илдачил къяйли камли-ахIен Дагъиста халкьла игитуни бетауртира. ХIе­ра, илдигъунтала лугIилизивадси цаличила саби иш ма­кьа­ла­ра.
ГIялиев Кьади Мухтарович акIубси сай Дахадаевла районна Дибгашила шилизив. Илини 2009-ибил дуслизиб С.Рабадановла уличилси Дибгашила школа таманбарили гIергъи, Дербентлизибси МЭСИ-ла экономикала, ин­фор­матикала ва статистикала факультетлизиб белчIуди даим­ба­рибсири. БелчIуди касибхIели, илини санигIят хIясибли хIянчи хIебариб. 2015 ибил дуслизиб илини дявила къуллукъ хIясибли вягIда бигьунсири ва Ставропольла дявила частьлизив разведчикли вирусири. 2017 ибил дус­лизив Сириялизибси дявила хасси балбуцла бу­тIа­кьянчи ветаурсири. «Дявилизив декIарухъни ба­гьандан» бикIуси медальличил шабагъатлаварибси сай. 2022 ибил дусличивад вехIихьили, Украинала мер-муса­личиб бетурхуси дявила хасси балбуцлизир илини жи­гарла бутIа­кьяндеш дирутири. 2023 ибил дуслизив суне­ла хъарбаркь таманбируси Кьади ГIялиев вяхъибсири. КIинайс ил «Гъабзадешлис» бикIуси медальличил «Дагъис­та халкьла игит» — уличилси мургьила зубариличил ша­багъат­лавариб.
Илгъуна шабагъатличил ва хIур­мат­ла уличил Кьади Мухтарович ну­ша­нира уркIи-уркIилавад мубарак­ви­рехIе. Гьаннала гIергъира асилдешличил ВатIа гьалабси чебла ихъули ва Че­диб­дешличил хъули чарухъи дигулра.
Сагаси Дуслизиб дявила хасси балбуцра таманбиубли, нушала бургъантира чула хъалибаргуначи чарбухъи, даршути гIямру дуркIули, хIеркабиъни саби нуша лебтасалра дигусира. Илкьяйда бетра бетарниличи халаси умутра леб.