2024 ибил дуслизир Ахъушала районнизир дахъал дарсдешуни кадикиб. Илдазибад бегIлара гIяхIсилизи халбарес вирар «Ахъушала район» МО-ла администрацияла бекIла къуллукъличи МяхIяч ГIябдулкаримов сагали викIиб. Сунени районнис бекIдеш дирути шел дусла духIнар районна бекIла къайгъначил дахъал проектуни, декIар-декIарти программаби хIясибли гIяхIцад хIянчи гIямрулизир детерхахъур.
2024 ибил дус Россияла Президентли хъалибаргла Дус сабливан багьахъурсири. Ил багьандан, районнизир илис хасдарили дахъал шадлихъуни, далдуцуни, бегIтала мажлис дурадеркIиб.
СВО-ла бутIакьянчибачира халаси пикри бяхIчииули саби районна бекIли, илала заместительтани, шимала бургани, организациябала, учреждениебала руководительтани ва жавабла хIянчизартани. СВО-лизиб алхунти бургъантас багъишладарибти МухIела ва цархIилтира шимазир «Гьанбикунала анхъ», хъумхIертнила уркьли абхьиб, школабас бургъантала уми дедиб.
Ахъушала районнизиб СВО-ла бутIакьянчибас ва илдала хъалибаргунас халаси кумек гIеббиахъули саби.
Республикала кьадрила инвестициябала программа хIясибли, Усишала ва ТIантIала шимази шин аркули гIяхIцад хIянчи дариб.
ТIебекмахьилизи аркьуси «ЦIудахъар-Ахъуша» машинабала гьуни къирли кабуцили сагабариб. Илкьяйдали цархIилти шимазирра шантас къулайти шуртIри акIахъуб: Ахъушала, АметеркIмахьила, БурхIимякьмахьила, МухIела, ХIямшимала, ХIерхмахьила, МухIела, Гьебала, Урхьучимахьила, Уллучарала ва цархIилтира.
«Урехиагарти гьундури» бикIуси программа хIясибли 4.5км. кьадарла бухъяндешла «Леваши-Акуша-Маджалис» машинабала гьунила дубларад, Ахъушала шила духIнарад хутIла тIулри кадатурли, гьундури шаладиахъес чиргъми кадизур.
ХутIла шайчирра, тIулри ва мегьламурчIи дарсдирули, гIяхIцад хIянчи дурадеркIиб Ахъушала, ЧебяхI МулебкIила, ХIямшимала, ХIерхмахьила, Дубримахьила, Кавкамахьила, МухIела, Урхьучимахьила ва цархIилтира шимазир.
Дубримахьила шилизибра дусла ахирличиб халаси, разиси анцIбукь кабикиб. Ил шилизиб газла лами пархбухъун.
Ахъушала районнизи бузерила архIяби дурадеркIиб: ДР-ла культурала министр Зарема Бутаевани, жагьилтала къуллукъунала шайчивси министр Камил СягIидовли, «Дагэнерго»-ла руководитель Арсен ХIяжиевли, «Газпром Межрегионгаз Махачкала» ООО-ла Генеральный директор Ризван Мурадовли ва цархIилтира жавабла хIянчизартани. Илкьяйдали, Ахъушала районна духIнарти школабас, дурхIнас савгъатунира пешкешдариб, СВО-лизир бутIакьяндеш дирути бургъантала гъамтачил гьунибаънира дураберкIиб Пачалихъла Думала депутат Жамалатдин ХIясановли, сунела кумекчибачил барх.
Республикала «Дагъиста хьунул адам» журналла бекI редактор Хамис Шамиловани, сунела хIянчизартачил барх районна хьунул адамтачилра гьунибаъни дураберкIиб.
МягIничебси анцIбукьли бетаур Ахъушала район 90 дус биънилис хасбарили МухIела шила мер-мусаличиб шадлихъ дураберкIни. Балбуц бехIбихьибсири СВО-ла бутIакьянчибас хасбарибси «Гьанбикунала анхъ» мерлабиубси мерличир вавнала халуби кадихьили. Ил шадлихълизир бутIакьяндеш дариб МяхIячкъала шагьарлизибад, алавчарти районтазибад бакIибти бахъал хIурматла гIяхIлани. Байрам ахъси даражаличиб бетерхур.
Районна духIнар детерхур СВО-ла бутIакьянчибачил, илдала гъамтачил дахъал гьунибаъниби, спортла шайчирти абзани, культурала управлениела, библиотекабала хIянчизартани школабачил дарх дурадуркIути шадлихъуни, ЧебяхIси ВатIа дявилис багъишладарибтира, «ДурхIя школализи хIядурвара» бикIути ва цархIилтира далдуцуни, конкурсуни ва цархIилти.
МяхIяч ГIябдулкаримовлисра, илала заместительтасра, илдачил барх бузутасра арадеш, гьарбизуни, сархибдешунира диубли, районна халкьла шайзибад гьаннала гIергъира баркаллаличи лайикьбикили бузес ва хIербиэс кьадарбиаб.
Украинализибси дявила хасси балбуц нушала бургъантала чедибдешличил ахирличи бикили, илдазир бутIакьяндеш дирути бургъантира ара-сагъли хъули чарбухъахъи, Аллагьли гьаннала гIергъира нушала районнизибра, Дагъистайзибра, лебил Россиялизибра даршудеш тIинтIбиубли, халкь разидешличил хIербиэс кьадарбиахъаб ЧевяхIсини.
С.ГIябдуллаева
