Гьаннала заманала дурхIнас дурсразибад нешла мезла дарс бегIлара къиянсили бетарули саби или гьанбиркур. СенахIенну, дурхIнасцунра ахIи, илдала бегIтасра нешла мез дузахъес дигули ахIен. Нешла мезла дарсличи дурхIнала диги, иштяхI мугIяллимлизирад, илала устадешлизирад дигахъу рикIаслира къяна бетхIерар. Илини саби дурхIнази иргъахъуси нешла мезла кьадриличила, миллатла дурхъадешличила. Илгъуна мягIничебси баркьудилизи ахъили сари дарган мезла ва литературала мугIяллим Майсарат ГIябдуллаева.
Майсарат ГIябдуллаева акIубси сари 1984 ибил дуслизир Хайдакьла районна ГъярацIанна шилизир. Шила школа таманбарили, ДГУ-лизи карерхур ва 2006-ибил дуслизиб ил ункъли хъараахъур. 2010-ибил дусличирадли Майсарат Къизларла М.Горькийла уличилси 7-ибил школализир рузули сари.
М.ГIябдуллаева сунела санигIят мурхьли бяркъурси, жавабкардеш дихуси, гьаннала заманала дурхIначи далдикибти бетуцуни пайдаладирули, халати устадешличил рузуси мугIяллим сари. Илини дарган мезличи диги алкIахъути тяхIяр-кьяйда далдурцу, дурхIнала иштяхIдухъесли дурсри кадирхьу.
МугIяллимли педагогикала декIар-декIарти далдуцуназир, конкурсуначир, конференциябачир жигарла бутIакьяндеш дирути сари.
Сарерхурси, гIяхIти хIял-тIабигIятличилси, уркIи гьаргси Майсаратли барх бузутала, дурхIнала ва илдала бегIтала хIурматра дигира сархили сари.
БелчIудила ва бяркъла башри гIяхIбухъахъни, дурхIни культурала, гIякьлу-дагьрила ва адаб-хIяяла шайчиб гьалабяхI башахъни багьандан, чебяхIси даражала мугIяллим Майсарат ГIябдуллаева «УО» МКУ-ла ва М.Горькийла уличилси 7-ибил школала грамотабачил чуйнара шабагъатларарибси сари, илкьяйдали илала сурат школала хIурматла мугIяллимтала уркьуйзира баршили саби.
Бузерилизир сархибдешуни дирахъни ва багьуди гьалабяхI башахънилизи белгиси пай кабирхьни багьандан Майсарат ГIябдуллаева РФ-ла багьудлумала Министерствола ХIурматла Грамоталичил шабагъатларариб (2022 ибил дус), ДР-ла багьудила отличникла уличи лайикьрикиб (2016 ибил дус), «Дарган мезла бегIлара гIяхIси кабинет» номинациялизиб чедибдеш сархиб ва 1-ибил даражала дипломличи лайикьрикиб (2016 ибил дус), ДР-ла БекIла Грант сархиб (2014 ибил дус), илкьяйдали РФ-ла Президентла Грантра касиб (2019 ибил дус).
2024 ибил дусла декабрьличиб ахирличи бикибси, «Нешла мезла бегIлара гIяхIси мугIяллим» бикIуси Къизлар шагьарла конкурслизирра Майсарат ГIябдуллаевани бутIакьяндеш дариб. Балбуцличир Къизларла школабазиб бузути нешла мезла мугIяллимтани чула устадеш чедаахъиб.
М.ГIябдуллаевани конкурсличи урхIмешуахIенси, гIядатла дурхъадешуни духIнадуцибти ва нешла мез руркънилизир гьаннала заманала тIалабуначи далдикибти тяхIяр-кьяйда гьаладихьиб. Кабирхьуси дарсличи гъирали, дурхIнала иштяхIдухъесли дарс кабирхьнили ва илдас балбикибси аги кабизахъес балнили илини жюриличи асарбариб. Конкурсла баянти хIясибли, М.ГIябдуллаевани цаибил мер касиб.
Конкурсличиб сархибси чедибдешли гьачам-гьатIи марбирули саби Майсарат ГIябдуллаева пагьмучерси мугIяллим риъни.
Илгъуна разиси анцIбукьличил бархбасахъи, Майсарат ГIябдуллаева мубаракрирулра ва Сагаси Дуслизирра гьатIира дахъал сархибдешуни дулгулра.
ПатIимат Мирзаева
