Районна культурала управлениела начальникла къуллукъуни дузахъуси ХI.Мусаадаевлизи 2024 ибил дуслизир чула бузерилизир диубти гIяхIти анцIбукьунала черкадти чумал суаллис жавабти гахъес тиладибарира.
— ХIяжимурад ГIялиевич, республикала кьадрила сегъунти далдуцуназир бутIакьяндеш дарес имканбакIиба районна культурала хIянчизартас?
— Нушала хIянчизартани 2024 ибил дуслизир бутIакьяндеш дарибси цаибси балбуцли бетаур «Дубуртала макьамти» ибси уличилси халкьла макьамтала ва музыкала ваяхI дирхъутала фестиваль. Илизир бутIакьяндеш дариб «Пагьму» бикIуси халкьла гIягIниахълумала ансамбльли.
Илис гIергъи бетерхурсири республикала кьадрила фольклорла ансамбльтала смотр, сунезибра нушала хIянчизартани чула пагьмурти чедаахъибси. Районна фольклорла ансамбльли бутIакьяндеш дариб Къизлар шагьарлизиб дураберкIибси ЧебяхIси Чедибдеш 79 дус биънилис хасбарибси фестивальлизир, сабира «Дявила авлахъличирти макьамти» ибси уличилси.
2024 ибил дусла майла 14-личиб бехIбихьибсири «Дагъиста хъалибарг — Россияла хъалибарг» ибси уличилси, хъалибаргла дуслис хасбарибси мажлис. Мажлисла цаибил бутIализир бутIакьяндеш дариб Урганила шилизибадси Тагъзировхъала хъалибаргла ансамбльли.
Майла 18-личиб МяхIячкъалализибси Урусла театрлизиб бетерхур Дагъиста халкьла поэт Суайбан Стальский акIубхIейчирад 115 дус дикнилис хасбарибси балбуц. Илизирра бутIакьяндеш дариб «Ахъуша» бикIуси далайла-делхъла ансамбльли. Культурала управлениела коллективти шайчир кахIелун шила хозяйствола выставка дурабуркIухIелира — илала бутIакьянчибас концертла программа гьалабихьиб.
Август базличиб Каспийск шагьарлизиб бетерхур «Кавказ багьанданси дергъ» ибси уличилси дявила тарихла балбуц, сунезирра культурала управлениела хIянчизартани бутIакьяндеш дарибси. «Ахъуша» бикIуси ансамбль бутIакьянчи бетаур Хунзахла районна ЦIадала шилизиб бетерхурси «Дила ВатIан — Россия» ибси уличилси фестивальлара.
Ноябрьла 30-йчиб Дагъиста тах шагьарла бекIлибиубси майдайчиб шила хозяйствола продукцияла выставка-ярмарка дурабуркIухIелира культурала хIянчизартани чула пагьмурти чедаахъиб.
— ХIяжимурад, районна духIнарра гIяхIцад далдуцуни детерхур. Илдазирад имцIали мягIничертачила къантI-къантIли бурили дигахъира.
— Цалра тарихла анцIбукь яра байрамла бархIи культурала хIянчизартани бутIакьяндеш хIедарили кавлули хIебирар. Хаслира бахъал бутIакьянчиби лебри майла 21-личиб дураберкIибси «Успех» бикIуси пагьмучебти дурхIнала фестивальличиб. Илар бахъал уршби-рурсбани чула пагьмурти гьаргдариб.
Октябрьла 8-личир МухIела шила мер-мусаличир дурадеркIибтири Ахъушала район акIахъубхIейчирад 90 дус дикнилис багъишладарибти далдуцуни. Илдазир жигарла бутIакьяндеш дариб нушала далайчибани ва делхъчибани. Октябрьла 14-личиб бетерхурсири «Варъала шури» балбуцла мерличиб «Дагъиста халкьанала хIязани» бикIуси балбуц, сунезирра бахъал культурала хIянчизартани бутIакьяндеш дарибси.
Илис гIергъира хIябал районнизир — Ахъушала, Хунзахла ва Унцукульла—дархти далдуцуни детерхур культурала хIянчизартала, цабехIличи цабехI гIяхIладли башуси халкьла гIядатунала тяхIярличил.
— Сагаси дуслизирра уркIичерли дузахъес, адамтас разидеш бихахъес арали датабая!
— Баркалла!
Н.Ванатов
