Арбякьунси дуслизир Даргала театрла пагьмучерси гIяртистка Зарина ГIязизова «Дагъиста театрла челябкьла» бикIуси республикала кIиибил конкурсличир, «Халасигъуна урши» бикIуси спектакльлизиб Нинала роль бузахъни багьандан, дипломличил ва премияличил шабагъатларариб. Илкьяйдали шабагъат бедиб илала насихIятчи, РФ-ла ва ДР-ла культурала урибси хIяракатчи, Даргала театрла художественный руководитель Мустапа ГIябдиевич Ибрагьимовлисра.
Гьалабван, Къумукъла театрлизиб, Дагъиста театрла хIяракатчибала Союз акIахъубхIейчирад 85 дус дикнилис хасбарибси шадлихъла балбуц дураберкIиб. Ила республикала культурала интеллигенция ва театрла искусство дигахъути цалабикиб.
Дагъиста театрла хIяракатчибала Союзла Председатель Айгум Айгумовли миллатла театртазибадти жагьилти гIяртистунас шабагъатуни дедиб, бузерилизир сархибдешуни диахъубти жагьилтас ва илдала насихIятчибас дахъал ванати дугьби дуриб.
Конкурс дурабуркIутани миллатла театртазибадти пагьмучебти гIяртистуназибад гIяхIтигъунти чеббикIилри. Сархибдешуни биалли, ташмишдеш агарли, Заринала дахъаллер. Буралли, илини Крымлизиб бетерхурси, «Таврида.АРТ» бикIуси лебил Россияла фестивальличир бутIакьяндеш дариб, дусла духIнар сагали кадихьибти 5 спектакльлизирад 3-лизир бекIлидиубти ролани дузахъули калун.
«Кахаберла тур» бикIуси хабарван кабихьибси спектакльлизирси Тея – малхIямси, сарерхурси, духуси, жагаси рурси Зарина ГIязизовачи мешули сари. Илини сунени сунела роль бузахъи викIалра, хатIа бетхIерар.
«Халасигъуна урши» бикIуси спектакльлизиб Зарина ГIязизовани тамашаризесли, мурхьси бухIнабуцличил Нинала роль бузухъули сари.
2015 ибил дуслизиб «Дагестанская правда» газетализиб дурабухъунси «ГIурра Диана Серёгинала дигайличила» бикIуси статьялизиб белкIи саби: ««Савгъат» бикIуси спектакльлизир къаравашунала ролани дузахъути – Меседу (ГIяйшат Абубукарова) ва Гермизилай (Зарина ГIязизова) театрла манзиллизир сагали дакIудиубти уми детаур. Илдани дебали далдикахъили чула ролани дузахъулри. Гермизилай биалли, «Жагасили адмалкIад» бикIуси сериаллизирадси машгьурси гIяртистка Мария Меньшиковачи мешулири ва лебтасалра гIяхIризурлири».
Зарина ГIязизовала 2010-ибил дуслизиб бехIбихьибси пагьмула гьуни, цархIил шагьарлизи гечриъниличибли, къяббердибсири. ГIур ил сунела дигуси театрлизи чаррухъун ва гьанна авал дус сценаличир лямцIрикIули ухули сари
Сагал дусла байрумтачир Зарина ГIязизова хIербикIути хIяйранбирахъуси «ДяхIила рурси» ретарули рирар.
Илизир ролани дузахънила дурабад, далайрикIесра, сценаличир назмурти, хабурти дучIесра пагьмурти лер. Илини Даргала театрлизир детурхути концертла программабазирра бутIакьяндеш дирули рирар.
Дагъиста театрла челябкьлализиб жагьилти, пагьмучебти гIяртистуначил барх Зарина ГIязизовала ура чеббикIили саби. Ил ца дилацун пикри ахIен, ил чула санигIят хIясибли бузути театрла хIяракатчибани кабатурси бархьси кьимат саби. Гьайгьайра илгъуна ахъси кьиматли гьатIира ахъти сархибдешуни детарахъу. Маргарита Арсланбекова, ГI.Батирайла уличилси Даргала театрла жамигIятличил бархбасуни дузахъуси хIянчизар
