Улкалис къияндикибси замана, илала хъархIерагардеш батахъес, халкьла паргъатдеш гIеббуцес дурабухъунти гъубзнала гьунартачила нушани гьаман иргъулра.

Ца минутлисалра чула гIямрулис урехи лебниличила пикрихIебухъи, илди душмайс цIакьти къаршидеш дарес къайгъилизиб саби. Дагъистанлантала хIял-тIабигIятличи хасти гъабзадешла къиликъуни дагьардулхъули сари дявила хасси балбуцлизир бутIакьяндеш дирутала. Ил бетурхуси цаибти бурхIначирадал дагъистанлантала черяхIти гьунартачила гъайдикIули сари Интернетлизирти лерилра социальный сетанира. Гьайгьайрагу, нушани илдигъунтачи пахрухIебиресра хIедирехIе.

Ишаб наб гьанушес дигулра дявила хасси балбуцлизир жигарла бутIакьяндеш дирутала къяйлизивси, сергокъалалан МяхIяммад СягIидовра. ВатIа хъархIерагардеш балтахъули, илини дявила анцIбукьуни кадиркути мераначир сунечи хъардарибти къуллукъуни детурхахъули сай.

ХIера, гьалабван илис «Дагъиста халкьла игит» бикIуси мургьила зубари шабагъатлабариб. М.СягIидовлис илгъуна шабагъат бедес хIукму дурасибсири «АхIерси Дагъистан» бикIуси жамигIятла комиссияли. Буралли, шабагъат илала гъабзадешла баркьудлумас бедибси кьиматцун ахIенну, арагIебли Дагъистай иличи пахрубирнила лишанра саби. БахъбикIаб МяхIяммадгъунти урехиагарти гъубзни.

Сагаси Дусличил мубараквирули, МяхIяммадлис ва илала узи-уршилис бекIла чедиб умуси, даршуси зак биубли дигулра. Мурталра дигиличил ва ванадешличил цаличил ца уржили калабая!

П.Жалилова