Дус кабиркухIели, лерилра багьудила ва пачалихъла учреждениебани, цахIнабикунани ва декIар-декIарти ведомствобани чули дурадеркIибти хIянчила черкадти баянти кайули дирар. Гьанна дахъалгъунти учреждениебани илди баянти нушаб гьаладихьили сари. Илдачи хIердизахIелли, республикализир диубти дарсдешуни нушани чедиулра. Халкьла гIямрула шуртIрала даража ахъбуцниличи дяхIчиаибти дахъал проектуни гIямрулизир детерхахъурли сари. ЖамигIятлизибра мекелли халаси хIянчи барили саби. ЦацадехIти кьялуби гьатIира гьаладяхI ардукили сари. Багьудилизир диахъубти дарсдешуначила бурахIелли, республикализир дахъал сагати школаби, яслиби ва цархIилти багьудила объектуни абхьиб. Илдачирра камли ахIен лутIи-хьулчилизирад сагадарибтира. Миллатла проектуназир бутIакьяндеш дирули, багьудилизир диахъубти сархибдешунала лугIи гьар бархIи ахъбикIули саби. Иличил барх республикала багьудила даражара ахъбикIули саби. ГIергъити дусмала баяти кассахIелли, Дагъистан чедиб гьанбушибси масъала хIясибли, гьаркьяти регионтала лугIилизи каберхурли саби.
КIинайс бурахIелли, лерилра замунтазиб аргъбаибсили кавлуси саби – республикала халкьла мез, культура ва рухIла давла гьаладяхI аркнила ва илди мяхIкамдарнила масъала. Илдала хIекьлизир дурадеркIибти хIянчила ахир агара или гьанбиркули саби. ГьатIира сабухъчебси бузериличил декIарбухъун Хайдакьла район. Нушала газетала редакциялизи районна пресс-службали дусла духIнар дахъал макьалаби дархьиб. Илди дучIухIели, хайдакьлантала гъираличи, уржибдешличи, цабалги бузерилизиб вяшбикIниличи нушалара хIяздулхъули сари. Районна бекI ГIялим Темирбулатовла бузерира пикрила дураб батес хIейрар. Дусла духIнар районнизир дурадеркIибти лерилра далдуцуназир илини бутIакьяндеш дарили сай. Адамтачил уркIи гьаргли гьунивиули, сабухъчевли узули сай. «Кайтаги» бикIуси этноцентрла директор Зубайдат ХIясановас ва илала лебилра хIянчизартасра сархибдешуни дулгулра. Алавти-регионтазирцун ахIенну, лебилра улкализир дурадуркIути конкурсуначир илдани бутIакьяндеш дирули сари ва Дагъистан машгьурбирули саби. Челябкьуси дуслизир гьатIира дахъал сархибдешуни хIушаб дулгулра. Лерилра пикруми-кьасани гIямрулизир детерхахъес Аллагь икьалавиаб. Дигахъира цархIилтанира илдачибад гIибрат кайсули, сенахIенну нушачи дашахъути багьахънибала ва суратунала даража хIясиблира чебиули саби, илди сецадла жигарли гьалабяхI башулил.
ГьатIи челукьути масъултачила бурахIелли, илди сари – хутIла шайчирти бехIемцIуни, умути шин камли диъни, гьундурала аги…
Хасти ведомствобани бурни хIясибли, илди масъулти цагьакIли агардарес вирули ахIен. Гьар бархIи ил шайчир хIянчи дурадуркIули сари. Дахъал мераначир умути шин дихIути объектуни дарили сари. ХутIла гьимира гьар-чинаралра ярга хIясибли сагадирули сари, или балахъули саби. ЦацадехIти районтазиб ил шайчибси аги гьатIира гIяхIбухъи саби.
Гьундурачила бурахIелли, илдала агира къулайбарили чебиулра нушани. Амма хIянчи тамандиубли ахIен. Республикала тах шагьарлизиб бусягIятла замана мекелли челукьуси масъала саби – автобусуни камли диъни. БелчIудила в ахIянчила мераначи заманаличиб биэс адамтас къиянни саби. Дус ахирличи бикили хьалли, план хIясибли чедаахъибти автобусуни иснила хIяракат челябкьуси дуслизибра даимбирар или балахъули саби. Лерилра дехIдуцибти хIянчи челябкьуси дуслизир детерхахъес ЧевяхIсини кумекбараб.
Ишаб гьанхIебушес хIейрар СВО-ла бутIакьянчибас ва илдала хъалибарглис гIеббиахъуси кумекличилара. Регионна БекIли, министерствобани, муниципалитетунала бургани ва лебил халкьли цабиубли илдарса халаси кумек гIеббиахъули саби. Дявила хасси балбуцла бутIакьянчибас ва илдала хъалибаргунас кумекбирес ибси сабаб пикрилизи касили республикализир жура-журала фондани ва сагати проектуни акIахъубли сари. Ахирличиб бурес дигулра, Дунъяличир кадиркути гIяхIдешла ва пашмандешла анцIбукьуни кадирхьути сари. ГIяхIдешла дахъал диахъес лебил жамигIятли къайгъибирес хIяжатли саби. Гьайгьайрагу, цархIилис ризкьила кьякьгъуна кумек баралра, Аллагьли ил адамлис дубураван хIисаббируси саби. Ил багьандан цалис цали кумекбирули, мурталра цадиубли, уржили хIердиэс нушаб хIяжатбиркур. Илдигъунтачи ЧевяхIсинира уркIецIибирни хъумартес асухIебирар.
Сархибдешуни ва чедибдешуни дахъдикIули, бузери жигарчеббикIули, берхъаб нушала Дагъистан!
ПатIимат Шахова
