Сергокъалала районна администрациялизиб Мяхlяммад Сулайбановла «Дагъиста патриотуни – Россияла Игитуни» бикlуси документуначи хъарахъили, касибси фильмличил тянишбирнила балбуц бетерхур.

Россияла кинорежиссёр ва сценарияла автор Сулайбанов Мяхlяммад Мирзаевич Гlяямахьилизив акlубси сай. Ил Кавказла халкьла гlямру ва культура чедиахъути кинобачивли машгьуриуб. МяхIяммад Сулайбановла гIяхIцад шабагъатунира лер: «Дагъистан Республикала гьаларти къуллукъни багьандан» орден, Дагъиста Бузерила Игитла мургьила медаль, ДР-ла Пачалихъла Советла Грамотаби, Гьалмагъдешла орден, «Асилси бузери багьандан, «Бузерила ветеран» медальти ва гIуррара дахъал цархIилтира.

Мяхlяммад Мирзаевич РФ-ла культурала урибси хlянчизар ва Сергокъалала районна Хlурматла адам сай. Илини далкьаахъурти фильмабани Россияла ва халкьани-ургарти декIар-декIарти кинофестивальтачир гьаларти мерани дурцули сари.

Фильмличил тянишбирнила балбуцличиб лебтанилра ил халаси иштяхIличил хIербариб, ва чихъли кьиматлабариб. Фильмла бекIлибиубси мягIна МяхIяммад Сулайбановли ахIерси районничил бархбасахъи саби. Илизир гьаладихьили сари ВатIан багьанданси дявилизир адамтани дакIударибти гъабзадешла баркьудлуми ва тарихла анцIбукьуни. Хаслира пикри бяхIчиаили саби Украинализиб бетурхуси дявила хасси балбуцлизир бутакьяндеш дирути дагъистанлантачи.

Балбуцличи цалабикибтани МяхIяммад Мирзаевичлич илгъуна халаси хIянчи дураберкIинилис баркалла багьахъур.

Сергокъалала районна багьахънибала центр