Ишди бурхIназир тах шагьарлизир багьудила ва гIилмуртала Министерствола шайзирад, ахъси даражала шабагъатличи лайикьрикиб, Ахъушала урга даражала цаибил школала директор МяхIяммадова Сабият МяхIяммадовна.
Ил шабагъат Дагъистан Республикала багьудила кадрабала управлениела шайчибси, бегIлара къулайси хIянчи чебиахънилис, бетерхурси конкурсличиб чедибдеш касни багьандан бедибси саби.
Сабият МяхIяммадова мубаракрариб ва Дипломличил шабагъатларариб ДР-ла багьудила ва гIилмуртала Министерстволис бекIдеш дируси ЯхIъя Бучаевли.
Ил бархIи Дипломтачил ва Сертификатуначил 30-цад хIурматла адам шабагъатлабариб.
Конкурс бехIбихьибсири 2024 ибил дусла апрельличиб ва сентябрьличи бикайчи калун. Ил конкурслизир бутIакьяндеш дариб 100-чибра имцIати ДР-ла багьудила учреждениебала хIянчизартани.
Сабият МяхIяммадовначила буралли, ил дебали пагьмучерси, жавабкардешличил, черетаили рузуси директор сари.
Сунени бекIдеш дируси школала коллективла, бучIантала, илдала бегIтала ургаб халаси хIурмат сархибси адам сари. Школала директор ретаайчи Сабият МяхIяммадовна Ахъушала районна багьудила управлениелизир рузули калунсири. Илабра илини сунечи хъарси хIянчи чебетаахъили, жавабкардешличил бетурхахъусири ва коллективличил ралкарикибсири.
Сабият МяхIяммадовна малхIямси, дяхI шаласи, пагьмучерси, бажардила, жавабкарси, халкьличи дигичерси хьунул адам сари.
Илала гьаннала гIергъира бузерилизир ва гIямрулизир сархибдешуни, хъулиб баракат имцIадикIули дигулра!
С.ГIябдуллаева
