ХIянчиличи диги диалли, илала хIясилра бирар, ахъанайтачира айцIахъу.
МикIхIила краеведческий музей абхьибси саби 2024 ибил дусла январьла 9-личиб, Лавашала районна администрацияла бекI Мухтар ХалалмяхIяммадовла хIукму хIясибли.
Ил мерлабарили саби МикIхIила урга даражала школализи, школа биалли, сагаси юртлизи арбухили. Алапара кабизахъурли, музейла заведующаяла къуллукъличи каратур Юнусова УмуряхIил ЯряхIмадовна. Амма илини, музей абхьайчира, тарихла экспонатуни цаладяхъили, сунела юртлизир мяхIкамли дихIутири. Илдачил шила шанти, районна халкь, тарихчиби, край руркъянти, жагьилти тянишбирнила шайчибра хIянчи дурабуркIули рири. У.Юнусовани цаладяхъибти дахъалгъунти экспонатунира сунела хала бегIтала, бегIтала, узи-уршила, тухумтала сарри. Музей абхьибхIели, илди ила гечдариб. ГIур ил шилизирадра цархIилти экспонатуни дурчес рехIрихьиб. Ил бузерилизиб илис хъалибарглира халаси кумек бариб. Музей абхьниличила хабар тIинтIбиубхIели, шилизибси музейла рухIла давла чеимцIабиахъес къайгъилизиб МикIхIила шантанира саби гIяхIъулали иличи экспонатуни дихулри.
Дуги-хIери цадарили, халаси яхI-кьасчиличил, санигIятличи мурхьти дигиличил рузнила хIясил саби ишбархIилис УмуряхIил камси заманала духIнар 2200 экспонат дучес бажардирикни. Ил мекелли халаси хIянчи саби.
— УмуряхIил, секьяйда бажардирикири хIу илцад дахъал ваяхI дучес? ХIед чили-биалра кумекбарибу?
— Наб кумекбариб дила бегIтани, хъалибаргли, гъамтани, баркалла биаб чусну, шантани, школала бучIантани. Лебтанилра гIяхIцад ваяхI дучиб. Ванзалиубад шинни парчбикIуси бекI гIинизван, музей гьар бархIи экспонатуначил чебирцIули саби, илала давла халабикIахъули.
— Се пикрили рехIрихьири илгъуна мягIничебси хIянчи барес?
— Цаибилгъуна, наб дигулри халаси мягIна лерти тарихла ваяхIличила жагьилтази хъумхIертахъес, илди мяхIкамдарили, дурала мераначибад башутазира чедаахъес, тарихличил илди гъамли тянишбарес. КIиибилгъуна, Петр I-ибилла, Николайла пачнала замунтачирад дехIдихьили ишбархIиличи бикайчи тарихлашал кьадричерти, камли къаршидиркути, тамашала, гьаннала адамтани хIедалути, халкьла някъбани варакьдарибти дурхъати ваяхI дучес ва нана хIуливан илди мяхIкамдарес ибти пикрумани наб гьачамн паргъатдеш лугули ахIенри.
— Илдицад ваяхI чина ва секьяйда мерладарири?
— Илдани шел халати хъали дицIили сари. Илдира кахIедурцули, гьанна урег-эсил хъалира хIядурбирулра. Юрт-алавти мер-муса жагадарес, галгуби удатес дигулра. Гьанналис гьалар вавни удатурли, алавчарси мер жагабарира.
Музейлизир тарихла тамашалати ваяхIли кIел хъали даршилра: пачала хIукуматла заманала ва ишхIелла манзилла. Илди цIикурла хъулриван даршили, хIерикIусила хIулби черхIесесли, жагадарилра.
Музейлизир камли къаршидиркути экспонатуни лер: дехIели (хъаж) дицIибти кабцла дабри; арцли белкIунси НикIалайла ханжал; арцла бирцIлабани даршибти, жура-дурала сукъбанти; НикIалайла замана цIуба арцли даршибти хIевни-кIанби; хьунул адамла чутхъни; някьишдарибти, башни балшути сункъби; някьишбарибси урца къалач – башни гербируси; башни балшуси унца сунки; декь кайсуси урца тIункья; башни гербируси урца кьям; дубсила хъабни; някьишдарибти урца кьунби; бяхIяхълуми – кьалтин кьяйда хъа бяхIличи диршути яра чIябарличи удуршути; кIарчIуби – кIелра шайчибад къантIти кIиъбани варакьбарибси. ДекIси, ванаси кIарчIа; сумахъ – суратуначил варакьбарибси кьалтингъуна секIал; урцуйзибад барибси чирхла – бала-бамба лукIес бузахъуси гIягIниахъала; НикIалайла замана урцуйзирад дарибти бархаби; урцуйзибад барибси, някьишбарибси кIуцIлидерхь – кьулсни кадирхьуси гIягIниахъала; НикIалайла заманала туп; арцла кIичIани; урца усурби – цIули калкьути.
Илкьяйдали давлачебси музей гьатIиралра давлачеббиахъес, хIурмат ахъбуцес, музейлизи бакIибтала гIяхIси пикри калахъес заведующая УмуряхIил Юнусовани сунела харжаначил цIуба арцла ва цархIилтира ваяхI (чяйник, сервиз, тIулкми-кулухми, ири ва цархIилти) исули сари.
УмуряхIилли экспонатунас къуллукъбарили паргъаткарирули ахIенну, илди мяхIкамли дихIули (къараулбирули) сари. Ил музейла юртлизир хIеррирули сари викIалра, къяна ахIен.
Сунени чеббикIибси санигIят гьарра шайчибад чебетаахъили, жавабкардешличил бетерхахъес, У.Юнусовани дахъал къайгъни дакIудирули сари. Дебали сарерхурси, мирхъи кьяйда рузуси хьунул адам сари ил. Музейла заведующая ункъли бажардириркули чериур экспонатла у бурес, ил се заманала сабил, селис хIяжатбиркусил баянбарес.
Илгъуна гьарил секIа кьадри-кьимат далуси, чеалкIуси наслулис ваяхI мяхIкамдарес къайгъичерси УмуряхIиллис халаси баркалла биаб. Илала гьатIиралра ункъли рузахъес чархлизиб арадешра имцIабиубли, хъулиб баракатра уркIилизир гъира-иштяхIра кIиркадиубли дигулра!
ДакIирая МикIхIила краеведческий музей чебаэс. ДакIадалли – пашманхIедирудая, хIушала тарихла багьудлуми имцIадирар, разили, шадли чардулхъадая!
МяхIяммад Тахсурманов, РФ-ла журналистунала Союзла член
