Дубуртачи чилилра илцад-декIар халаси пикри бяхIчихIейи бурги, илди чилра илав хIерхIейрули, дусла авалра манзиллизир дугIбара дирхъули, хъябхъялира чябхъинти дирули цундешлизир тIашли диалри. Илди атхIеб вава-кьарличил жагадарибти муза-къадакад бумхIути биштIатала тIамрани, дуцIрумлизир шурмазир гIералгьути жагьилтала мукърачир зайдикIути дам-дядла ва далуйтала агурбани, гIебшнилизир зяхIматчибани дурчути сабухъунала давлачердешли, янилизир дубурла шимазир гIявал хинкIла ва чуднала бизиси тIемли авадандарибти сари. Амма дубурлантала кьуватчебдешли ва пагьмуртани сари дубуртала бурги хамдиахъубли ахъли кадуцахъибтира. Дигалли уркIби шанда багьадуртани, дигалли пагьмучебти исбагьибани Дагъиста дубурти чуйнара машгьурдарибти сари. Илдигъунти хабарла дубурланти-ургаб даргантира камли хIебиъниличи пахру хIебарес хIейрар. Дагъистайзирцунра ахIи, улкализирра сунела пасихIти жузачил бучIантала уркIбази умутличил арацIибси хIурхъан УмуряхIил Шапиевачила саби иш белкIра.
Машгьурси писатель, драматург, прозаик, журналист УмуряхIил Шапиева 100 дус риънила байрам дураберкIиб гьалабван Сергокъалала районнизиб.
УмуряхIил Шапиева акIубси сари 1924 дуслизир Сергокъалала районна ГIяймаумахьила шилизир. Ил хъубзарла хъалибарглизирадсири. Шел дус риубхIели УмуряхIил халаси рузичил рарх школализи рашескарииб. СекIал пикрибарес балуси, дахъал дагьес дигуси, бурибсила мягIна бусягIят иргъуси рурсиличи пикри бяхIчихIеэс хIейри. Авал класс тамандарибхIели, 11 дусла рурси Сергокъалализи педучилищела подкурсунази
ручIахъес аррукиб. Илини подкурсуни тамандарили гIергъи, Буйнакъскла педучилищелизиб белчIуди даимбариб. Педучилище таманбарили шилизи чаррухъунхIели, илис сунечил барх бучIули калунти уршбас ва рурсбас дурсри кадирхьес кьадарбиуб.
Балбуцличив гъайухъунси районна бекIла заместитель Баркакьади ГIябдулхIялимовичли писательла гIямрула ва творчествола бетуцуначила баянти гьаладихьиб. ГIур гъайбухъун УмуряхIил Шапиевала гъамти, ГIямарла Батирайла уличилси Даргала театрла режиссер, Дагъиста ва Россияла урибси хIянчизар, культурала урибси
хIяракатчи, Ибрагьимов Мустапа ГIябдиевич, поэт, тилмаж, публицист, Дагъиста писательтала Союзла председатель Марина Анатольевна ГIяхIмадова, Дагъиста пачалихъла университетла Дагъиста мезанала ва литературала кафедрала заведующий, филологияла гIилмуртала доктор, профессор, Дагъиста писательтала Союзла
правлениялизибси даргала секцияла руководитель Муса Расулович БяхIяммадов, «Сергокъалала патриотуни» бикIуси кьукья акIахънилис сиптакарси ва илис бекIдеш дируси Индира Халадзиевна ХанбяхIяндова, Дагъиста халкьла поэтесса, Россияла писательтала союзла член Аминат ГIябдулманапова, дарган мезличил дурабулхъуси «Дагъиста хьунул адам» журналла редактор ПатIимат ВяхIидова, «Замана» газетала бекI редактор Салимат ГIялиева ва культурала отделла редактор ПатIимат Кьурбанова, республикала Р.ХIямзатовла уличилси Миллатла библиотекала краеведческий отделла хIянчизар Салимат ХIяжиева, лукIан Байгинат Кьурбанова.
Балбуцличир далуйти зайдухъахъун далайла пагьмучебти устни МяхIяммад Лукьмановли, Салимат Шагьмандаровани, Хасбулат РяхIмановли, ХIузаймат Ибрагьимовани, Гьидаят МяхIяммадовани, Мухтар НухIовли, Исрапил ИштIалбяхIяммаевли.
Шадлихъла балбуцличир къугъати делхъ чедаахъиб районна дурхIнала пагьмуртала Юртла бутIакьянчибани.
1957 ибил дуслизиб «Дагъиста хьунул адам» журнал дурабулхъес бехIбихьибсири. Ил дурабулхъуси бархIиличирадли пенсияличи аррукьяйчи, УмуряхIил Шапиева илала редакторли рузусири. УмуряхIил Шапиевани ил журналлис гъал дус бекIдеш дариб ва гIяхIси хьулчи кабихьиб. Рузули ва заочно ручIули, Дагъиста пединститутра белчIун. Дахъал дусмазир «Дагъиста хьунул адам» журналла редактор сарливан, писатель бахъал адамтачил, илдала декIар-декIарти кьисматуначил тянишрирусири. Хьунул адамтани илизи чула дигIяндешуначила бурусири, илини илдала уркIбазиб бирхауди имцIабиахъес, илди уркIичеббиахъес ва къиянти дяхIярахъес маслигIятбарес рирусири.
У.Шапиевала цаибти хабурти, очеркуни, зарисовкаби «Ленинна байрахъ»
газетализир, «Гьалмагъдеш» ва «Дагъиста хьунул адам» журналтазир дурадухъунтири.
УмуряхIил Шапиевала «УркIила дигиличил» бикIуси цаибил жузлис гьаликIли детауртири редакциялизи башути хьунул адамтала декIар-декIарти масъулти. У.Шапиевала дарган
ва урус мезличил дурадухъун «Филлоксера», «УркIила дигиличил», «Зубарти дилшути ахIен», «Ванзала уркIи», «Мардеш», «Аманат», «Цаибси хъарбаркь» ибти жузи.
1970 ибил дуслизиб дурабухъунси «Цаибси хъарбаркь» бикIуси повестьлизир, хьунул адамла сипат алкIахънилизир УмуряхIилли сари-регIти умцIлаби дурадуркIули сари. Баягъи ил повестьлизибра жура-журала хIял-тIабигIятла хьунул адамти сипатбирули сари. ГIяхIтира вайтира хасиятунала бегIти цаличил ца цугбурцули сари. Повестьлизирти игитунала хIял-тIабигIят гьаргдарес далдуцибти ва дузесаибти тяхIурти асарчерти сари.
«Ну рирхулра» бикIуси повестьлизир авторли cари чи сарил ва се сархес рузусил гIяхIил балуси хьунул адам чераахъили сари. Илизирси Уздият гьар секIал паргъатли гьунчидикахъес балуси, сунела кьисмат сунела някъбази касес бажардирикибси хьунул адам сари.
ИшхIелла бархибси манзил лябкьни балусиван пикририкIули сари УмуряхIил Шапиева сунела повестьлизир. Адабла дазурби дуунти, хIяялизибад бухъунти дибягъуни сунела
повестьлизиб дакIу-гьаргли балтIули сари илини.
Ахъдуцибти масъулти ва гьаргдарибти сипатуни хIясибли цаличил ца уржили дархдаси сари «Ну рирхулра» ва «Зубарти дилшути ахIен» ибти повестуни. Илдала бекIлибиубсигъуна мягIнара гIямрулизир къаршидиркути къиянти дяхIярахъес бучIанти жибирнилизиб саби. Москвала «Советский писатель» издательстволи чедир гьандушибти кIелра повесть цахIнадяхъили, роман дураибсири. Ил илала дебали гьарбизурси белкI саби.
УмуряхIил Шапиевала «Филлоксера» бикIуси роман кIел бутIализибад цалабикили саби, илала цаибил бутIа «ЗурхIяб» журналла хIябъибил номерлизиб дурабухъун, илаб тяп дяхIимцIайзибван чебиули саби дубурлан хьунул адамла рухIлашалси дунъя, илала уркIила хазна, пахру ва диги, децI ва разидеш. УмуряхIил
«Аманат» бикIуси повестьлизир адамтала хIял-тIабигIят, бухъя-зегъа чедетаахъили сипатдарес бажардирикили сари.
Лерилра чедир гьандушибти хабурти, повестуни, ва романтачир гьатIиралра бучIантала уркIбази гьуни баргесили уббухъун УмуряхIилла «ХIябъибил рурси» бикIуси роман. Авторли ил сунечила саби белкIунси.
Уршиличи дебали хIерси ва карцIси хъалибарглизир алкIули сари хIябъибил рурси. УмуряхIил акIубхIели лебталалра уркIби дамкьуртири. Ца дудешлицун сабри рурси акIниличи пашманиъни дигIянбарибси. УмуряхIил Шапиева ил роман дураэс бажардихIерикиб.
«Зубарти дилшути ахIен», «Мардеш», «Цаибси хъарбаркь», «Ну рирхулра» повестуназир даргала писатель УмуряхIил Шапиевани чедиахъули сари ЧебяхIси
ВатIа дергълис гIергъити дусмазир кадикибти анцIбукьуни. ВегI хIерируси манзилла гьалабси чебла, гIямрулизиб бархьси гьуни баргес бажардивиъни, зяхIматчи адамтачи диги адилкьниличи саби илини имцIасигъуна пикри бяхIчииуси. ГIямруличил уржили ганзикIнилизиб, узнилизиб, учIнилизиб чебиули саби илини адамла гIямрула мягIна, илала жагIялла бархIиличи умут.
РиштIахIейчирадли дахъал къияндешуни чедаибси ил илдани дебшларариб. Ил багьандан бурги илини сунела уркIи сели-биалра кьакьабакIахъили хьалли, сунечибси хIял хIебалахъуси, чеди дакIухIебируси, гъабзаливан къиянти чекайсуси ва чIумали карилзуси. Сецад дахъал вайти анцIбукьуначи, чурхдешличи ряхIягиб риалра, ил малхIямсили ва уркIецIичерсили калун. Илини гьарил баркьуди духули ва черетаибдешличил дурабуркIи.
Жагьил гIямруличив гьанагарси балагьли арухибси сунела марзла уршили иличи, гьайгьайрагу, халаси асар бариб. Мурталра хIянсавдуси уркIила дяхъи сабри ил.
УмуряхIилгъунти машгьурти адамтала пагьмулис, бузерилис, лайикьси кьимат хIелугалли, культура, литература гьаладяхI дашес хIедирар. УмуряхIил Шапиевала уркIила жиличил делкIунти произведениебала асар бучIантала уркIбазиб бахъхIилис калниличи вирхес вирар.
У.Шапиева писательтала Союзла член, Дагъиста писательтала Союзла правлениела, «ЗурхIяб»
журналла редколлегияла член сарри. 1964 ибил дуслизир СССР-ла писательтала гехIъибил съездличир ва 1992 ибил дуслизир писательтала Союзунала цалабяхъунала урчIемъибил съездличир бутIакьяндеш дарибтири.
ДАССР-ла Верховный Советла президиумли хIябал ХIурматла Грамоталичил шабагъатларарибсири. 1978 ибил дуслизир ил журналистла бузерилизир дахъал сархибдешуни диахъни багьандан, Дагъиста АССР-ла культурала рурибси хIянчизарла уличи лайикьрикибсири.
УмуряхIил Шапиева бузерила ветеранра сарри.
Шадлихъла балбуц ахирличи биркухIели ила цалабикибти давлачебси кьумур-алав жибариб. Гьайгьайрагу, иларра зайдикIахъулри далай-делхъла агурби.
УмуряхIил Шапиевас назмула ишди тугъира пешкешдарес дигулра:
Умудешла заклизир
РяхIмула урми луцIан,
ХIурхъила дубуртачир
Пагьмула зурхIяб дурцан.
Прозала шурмазибад
ХIуни кабихьибси дякь,
Гьанна нуни ихъулра
ЛуцIули дугьбала декь.
ЧерикIла миллатлизир
Магьили делкIун гьайкар,
ДелкIунри мургьилизир
ХатI даргала уркIбази.
ХIу риадра русули
Ванзала уркIилизир,
Лерал хIела пагьмули
ПасихIдеш гIяйдирули.
ХIуни делкIун табтурти
Цугдурцу адамтани,
Малаикуна дучибти
Кьуръа аятуначил.
Пагьму хIушагъунтала
УркIбазиб кавлан халкьла,
Бац-БерхIи заклизирад
ШаладикIули лерай.
ПатIимат Кьурбанова
