Хайдакьла районна ЦахIнабси центрла хIянчизартани районнизивадси, бусягIятла замана хасси балбуц бетурхуси мер-мусаличиб вягIда хIясибли къуллукъ бируси, МутIалим МяхIяммадовличила буриб.

М.МяхIяммадовли къуллукъ бируси дявила частьлизибад районна администрациялизи Баркаллала кагъар бакIиб. Командирли ила ургъанна гьунартачила белкIири.

«… Душма артиллерияла цIализибад МутIалимли сунела бархти ва полкла хIерудилиубси лебдеш берцахъиб. Лейтенант М.МяхIяммадовла устадешла ва дагьрила кумекличил тыл гIеббурцуси подразделениели чучи хъарти къуллукъуни мурталра заманаличир тамандирули сари. Сунени чедаахъибти гъабзадеш ва игитдеш багьандан, М.МяхIяммадов пачалихъла кIел шабагъатличи (Суворовла ва Жуковла уличилти медальтачи) лайикьикили сай. СВО-лизир бутIакьяндеш дирули, чедибдеш сархнилизи илини кабихьибси пай Россияла лебилра халкьли чихъли кьиматлабарес хIяжатли саби», — белкIи саби кагъарлизиб.

МутIалим МяхIяммадов акIубси сай Мажалисла шилизив. Темирхановла уличилси школализив ил цаэсил класслизи вякьунсири.  Шел класс тамандарибхIели, Родниковая СОШ-лизиб белчIуди даимбарибсири. МугIяллимтани бурни хIясибли, МутIалим ункъли учIусири, школала ва районна гIямрулизир жигарла бутIакьяндеш дирутири, жура-журала олимпиадабачир гьаларти мерани кайсутири. Школа таманбарили гIергъи, М.МяхIяммадовли медицинала колледжлизиб белчIуди даимбарибсири. КIинайс ил Тюменьнизибси индустрияла университетлизи керхурсири. Илав учIухIели, хIянчира барх бузахъес ил бажардииркусири. «Геолог-технолог»-ла санигIят хIясибли диплом касили гIергъи, РФ-ла  Ярагъладарибти цIакьанала къяяназиб къуллукъбарахъес живарибсири. Илаб МутIалимли кIел дуслис вягIда бигьунсири. Хасси балбуц бехIбихьибхIейчивад ил Украинала мер-мусаличив сай. БегIталара, шила шанталарацун ахIи, М.МяхIяммадов лебилра республикала  хакьласра пахрули ветарули сай.

ДР-ла социальный бяхIчибизлашал гьалабяхI аркнила ва бузерила Министерствола пресс-служба