«КIина белшунси ши» или ирули бирар ТIантIала шилис. Илкьяйда бикIнилис сабабра леб: 1944 ибил дусла мартла 13-личиб цахIнабли ТIантIала шила халкь дуракаили, хIядурбиахъес заманара хIебедили, чечентала мер-мусаличи арбукибтири.
ИтхIели чедуркъибти къиян-жапаличила гьанбиркахъули, децIличил бурули бирар гьанна мицIирли лебалтани: гьунчиб сецад инжитбиубал, ванабиэс балкьхIеурси аргълизиб, янилаван дугIярти дугурбазиб бяргIили, зягIипбикили, гIямрулизибад чум биштIатира бухънабира арбякьунал. Чечентала мер-мусаличибси гьава балхIебикили, ила гечбарибти шантазибад байхъалацад агаркабиубтири или бурули бирар.
1957 ибил дуслизиб ТIантIала шила адамти Дагъистайзи чарбариб. Илдас маслигIятбариб диркьала мерличиб ши барахъес: «ХIушаб гьамадли хIебирар бехъубси ши сагабарес, дубуртазир гIямрура къиянти сарину, хIердиэс гьамадси мерличи хьурадиирая».
Шанти кьабулбикибти ахIенри: «Нушала гIинзурбала шин xупIдирули, шила ургубалаб бакIибси букули, нушала мерличиб гьалаб саби», — бикIутири гьести гIямрула адамти ва чула шилизи мерлабиубтири.
Хъали-цIара делшун, хъули гIягIнисира кабихьиб, чичилра хъарра хIебикиб, бузра бузар, бучIра бучIap, чули валхIелуси адамра гIяхIти гIяхIялдешличил хьуравиру.
Дигалли Дагъистайзиб, дигалли Россияла мер-мусаличиб ахъти къуллукъуначиб бузути, гIяхIси яшавличил хIербирутира леб, амма цалра агара пачалихъла яра адамтала лебдеш хъям-кьацIбарили давла бучибси ва гIур гIяйиб-нягIнализи викибси.
ТIантIанти хIербирули саби чула бузериличил, чула къияйчил: мицIираг адилкьули, хъуми делгIули, хIукуматла хIянчилизиб чебетаили, хIялалли бузули.
Някъла хIянчила устадеш агарси адам шилизив рахлира чеэс хIeйpap. ДурхIни хъайчикабалтухIели, лебилра насаб кумекбарес музабулхъан, юрт лушухIелира гьарилли кумек гIеббиахъу.
Хъумартурли ахIен шантани пачалихълис ва халкьлис мардешличил гIямру деркIибти, шила хIурмат ахъбуцибти адамти. Илди сабри динна гIилмула гIялимти Баргъула МяхIяммад, Кьади-ГIямар, МяхIяммад-Кьади, Рабадан КьадигIямаров; илкьяйдали дургъбала бутIакьянчиби: МяхIяммад Кьурбанов, МяхIяммад ГIяхIмадов, ГIямар ИсмягIилов, ГIяли Кьурбанов, ГIябдуллагь Шамакьиев, Муса Кьурбанов — Ленинградла блокадализив калунси; чебетаибти хIянчизарти — МяхIяммад Сухъанов, ШяхIбан Маллаев, ШяхIбан НикIатуев, Ражаб Шайхов, ШяхIбан Чупанов, Ражаб ШяхIбанов, ШяхIбан Мустапаев, ГIямар Даудов; ТIантIала шилизиб дахъал дусмазиб школала директорла хIянчи барибти ХIямшимала шилизибадти Нариман ИсмягIилов, БабахIяжи ГIябдуллаев ва бахъал цархIилти.
ЧебяхIси ВатIа дергълизиб ТIантIала шилизибад 40-лицад адам бургъес арбякьунтири. Илдазибад бахъалгъунти хъули чархIебухъун. Чарбухъунтанира ши ва шанти багьандан бузули гIямру деркIиб, духути дурхIни абикьур.
БучIантази багьуди кайсахънилизиб ва бяркъ бедлугнилизиб районна гIяхIтигъунти школабази кабурхули саби ТIантIала шилизибси урга даражала школа. Ишаб уржибси коллектив бузули саби, сунесра дахъал дусмазир МяхIяммадъимин МяхIяммадовли бекIдеш дируси.
Шанти разибарес халаси къайгъи дакIубирули сай шила администрацияла бекI Насруллагь Ильясовли. Шила бекIла къуллукъличи Н.Ильясов викIибхIейчирад шантала кумекличил шилизир чумра гIяхIти баркьуди детерхахъур, хаслира кьакьурби, гьундури къулайси агиличи дуршнила шайчир.
Ишди бурхIназир ахирличи дикиб шин леркнила шайчирти хIянчира. Чумал мерличир сагати гIинзурбира тIашдатурли, гьалар лертира къулайдарили сари. Шантас халаси разидеш саби ил, сенкIун шила халкь сунечи бахъхIи хIерси анцIбукьли бетаурхIели.
Чучи хъарси чебетаахъили бетерхахъес кьаслизиб бирар шила культурала учреждениебала хIянчизарти Хадижат Сулайбанова, Марьям ХIусейнова, Хамис Маллаева, СягIидат Мяммаева, тухтурти Аминат Кьурбанова ва Загьидат МяхIяммадова. ВахъхIи узули сай СПК-ла руководительли ГIябдулвагьаб Мустапаев. Жагьилтази держ, папрус гьарахъли датахъес, динна шайчиб багьудлумала бегIбиахъес къайгъилизиб саби динна агьлула вакилти Кьурбан Маллачиев, Ягьуза Рабаданов, ГIяли-АсхIяб МяхIяммадов.
2024 ибил дус — хъалибаргла Дус сабливан багьахъурси биъниличил бархбасахъи, мубаракбарес лайикьли саби ГIямар ва Марин НурмяхIяммадовхъала хъалибарг. ГIямар дахъал дусмазив жавабла хIянчурбачив узули калун, 20 дусличи гъамли ТIантIала шила Советла председательла хIянчи дариб. Марин шила школализир 50 дусцадхIи рузули калун. Илдани гIяхIси бяркъра бедили, багьудира касахъили дурхIни абикьур. ГIергъиси замана МяхIячкъалализи, уршили сунечи арбукили, илаб хIербирули биалра, илдани шиличил ва шантачил бархбас къябудахъули ахIен.
ТIантIала школала директорла хIянчи дариб дахъал дусмазир МяхIяммад МуртазагIялиевли ва чумра ХIурматла Грамотара баркаллара сархиб.
Камли ахIен шила дураб хIербирули ва бузули, хIурматличил гIямру дуркIути тIантIанти. Илдазибад бегI гьалаб гьанбушес лайикьли саби Кьурбан Айгубов ва илала гIямрула гьалмагъ ГIяйшат МяхIяммадова. Кьурбан дахъал дусмазив Красноармейскла шила бекIли, МяхIячкъалализив школала директорли узули калун.
ГIяйшат поэтесса, писательница, дахъал жузала автор сари. Илала пагьмулис багъишлабарибси балбуцра ТIантIала шила культурала Юртлизиб бахъал адамтала ва шантала бутIакьяндешличил бетерхурсири.
Ил балбуц хIядурбарибсири ТIантIала школала учительница, дебали гIяхIси адам ПатIатI МяхIяммадовани. ГIергъити дусмазир шилизирад аррякьи, МяхIячкъалализир хIеррирули риалра, ил пергерси хьунул адам шилис ва шантас гIяхIдеш барес даим къайгъилизир рирар.
Поэт, назмуртала чумал жузла автор Шамхал Сухъанов гьаман шилизи вашар. ТIантIала шилизи мекъ-сяхIбатличи, шадлихъличи дурала мераначиб хIербирути тIантIанти, ХIямшимала, Уллучарала, Урганила ва цархIилти шимазибадти гIяхIлира бархли музабулхъан. Чи вакIаллира хIурматбарес бала, аркьухIели — дигиличил гьунивватес хъумхIерту.
…ТIантIала шила халкь чечентачи аркухIели, адамти абатурти уркрала бухъяна тугъ шалгIеббулхъули буили саби Ахъушала шилизибад. ГIинзи шинничи бякьунти рурсби тамашабиубли, илдачи хIербикIули буили саби, чихъали вара или. Ца адамли бурили сай ТIантIала шила шанти саби, чечентала мер-мусаличи гечбирути или. Дила нешра руили сари илди рурсби-ургар, рурибси масхарачи, ил рикIули сари: «Гьуя, лебилра аркулира, ца наб гелешмеш варесигъуна гIелав хIелтулира?»
ИтхIели МяхIячкъалализив шила хозяйствола техникумлизив учIули уили сай дила дудеш, ШяхIбан Маллаев, ил архIевкили калунсири, ва дипломра касили, Ахъуша узес вакIибхIели, илгъуна масхара бурибси, дебали жагаси рурси чераили, ил гIяхIризурли, иличи хъайчикайибсири.
Бунагь-хатIа урдуцаб чула, кIелра шила — Ахъушала ва ТIантIала шантира къугъати тяхIяр-кьяйдаличил бихIиб кIилилра, нушази багьудира касахъиб, хIянчиличир чедетаили дузахъесра, цархIилтала хIурмат-хатир дирахъесра бурсидарира.
П.Маллаева
