Бара гьалабван, Дагъиста пачалихъла университетлизиб Мажид ГIяхIмадов акIубхIейчирад 90 дус дикнилис багъишлабарибси балбуц бетерхур. Балбуцличи отделениела лерилра курсаначиб бучIути даргала студентуни бакIилри. Дагъиста мезанала кафедрала заведующий БяхIяммадов Муса Расуловичли Мажид ГIяхIмадовла творчестволичила ва илала гIямрула гьунчила къантI-къантIли баянти гьаладихьиб.
«Дагъиста поэт Мажид ГIяхIмадович ГIяхIмадов 1934 ибил дуслизив, августла 24-личив, Дахадаевла районна Кубачила шилизив акIубсири. Ил Кубачила урга даражала школа таманбарили гIергъи, 1953 ибил дуслизив Дагъиста Пачалихъла университетлизи филологияла факультетла урусла-дагъиста отделениелизи керхур. 1966 ибил дуслизиб илини баягъи факультет таманбариб. 1956 ибил дусличивад учительли, завучли ва Кубачила школала директорли узули калун. 1970 ибил дуслизив М.ГI.ГIяхIмадов бузерилизир диахъубти сархибдешуни багьандан, «Халкьла багьудила отличник» ибси михъирличи биршуси лишанничил шабагъатлавариб. Ил «Дагъиста АССР-ла хIурматла учитель» ибси уличира лайикьикибсири. Пенсияличи дураухъайчи М.ГI.ГIяхIмадов Дагъиста АССР-ла бузерила министрла цаибил заместительла къуллукъличив узули калун. Илала дарган мезличил дахъал жузи дурадухъун: «Дила уркIила тимхъ», «Далуйта бучIутас», «Дила ши, дила шанти», ва цархIилтира. Дарган мезличил ва урус мезличил илала кIел сборник дурадухъун «Лебтачилра цугли», ва «ДучIехIе, юлдашуни». 2021 ибил дусличивад Россияла писательтала Союзла член сайри», — буриб М.Р.БяхIяммадовли.
Муса Расуловичли студентунази чедаахъес поэтла жузи, илала творчестволис хасбарибси плакат гьаладихьилри. Ил бархIи Мажид ГIяхIмадов хIелутанира ил сегъуна поэт сайрил вагьур ва лебтасалра илала жузачил, творчестволичил тянишбиэс имканбакIиб. Балбуц дурахIеберкIили лебай, ил гIямрулизивад арукьни гIядаблири. Ца-чумал баз кали виалри, нушабра ил чеэс имканбикIусири.
Балбуцличи бакIибти гIяхIлира лебри. Илди сабри «Гьалмагъдеш» журналла бекI редактор Кьади ГIялисултIанов ва «Лачин» журналла редактор Аминат ГIябдулманапова. Дурутачи ункъли лехIбизурли гIергъи, илдани чула журналтачил ва белкIаначил цаибил курсла студентуни тянишбариб. Студентуни-ургаб назмурти лукIути лебли биалли, чула шайзибад илди гIеббурцниличила багьахъур. Илдала гъай хIясибли, даргала журналти дузахъес багьандан, жагьилти лукIантала кумек гIягIнили саби. Ил бархIи дураберкIибси балбуцличир поэт Мажид ГIяхIмадовла творчестволичила студентунала багьудлуми чедицIахъиб. Гьайгьайрагу, илдигъунти далдуцунани даргала литература гьалабяхI башахънилизи белгиси пай кабирхьули саби.
Анжела Мутазова
