Октябрьла цаличибад бехIбихьили, нушани, 4-ибил курсла студентунани, Сергокъалала районна Россияла Игит МяхIяммад НурбяхIяндовла уличилси кIиибил школализиб нешла мезлашалси практика дураберкIира. Цаибил бархIи нуша школала учительтачил ва нушани декIардарибти классунала дурхIначил тянишдиубра. ГIергъити бурхIназир гьар бархIи дурсрачи дашули, дарс хIядурбирнила ва ил дурабуркIнила тяхIуртачи, низам-кьяйдаличи хIердикIули, гьар секIал дневникунази лукIира. Ил бархIиличирад дехIкадихьили, нушани дарган мезла ва литературала дурсри дирес, классный руководительла хIянчи касес гIягIнисири. Буралли, студентунас практика дурабуркIнила мурадра — илдас школализиб хIянчи барес дигулил ахIенал чузи аргъахъес, илдала дурхIначи диги лерал багьес саби или гьанбиркули саби.
Гьарил учительла дарс кабирхьнила сай-вегIти тяхIурти, гIягIниахълуми лерри. Илар наб гIяхIдизуртира хIяжатагартира анцIбукьуни къаршидикиб. Лерилра секIал хIясибдарили, ну ца пикриличи ракIира. Учитель дурхIнази секIал багьахъес багьандан ибкькайзес, илдани секIал хIебагьурли или гIясивирес хIяжатдеш агара. Сен? СенахIенну учIуси дурхIяла белчIуди ил тяхIярли гьатIира гIелабяхI аркьули саби, белчIудиличи диги беткайхъули саби. Учительли аргъесли иштяхIдухъесли дарс буралли, учIанна белчIудиличи диги имцIабирар, классла хIянчурбазир илисра бутIакьяндеш дарес дигахъу. БелчIудиличи диги гъямлира-пяхълира ахIен лябкьяхъуси. БучIутала ил сабицун бакIес гIягIнили саби, гIяхIси учитель виалли.
Дурсри дурадуркIухIели, чихъли ца дарсличицун чекатхIейзурли декIар-декIарти масъулти хIердирес гIягIнили саби, бяркъла хIянчи дурабуркIули, масхара бурули, хIязти дурадуркIули ва ихтилатбиресра балли хъумхIертули. Гъямли, пяхъли, кьяркьси бархбасли дурхIя вяркъес вируси ахIен. Гьалабла замана илкьяйдали биалра, гьанна илкьяйда ахIен. Барскабиубли саби бяркъ, илкьяйдали халкьра. Гьарил замана сунечи мешули вяшикIалли ункъли бирар, сенахIенну янила палтарра хIуни хIеб чехIелгьад.
Наб практика дебали гIяхIбизур, гIяхIцад секIал дагьес, дяркъес, дила багьудлуми пайдаладарес имканбакIиб. МугIяллимла санигIятличира диги гьатIира имцIадиуб. Амма сепайда, практика бахъ жявли таманбиубгу, кIел жумягI, кIел бархIиван шалгIердухъун.
Анжела Мутазова
