Ишди бурхIназиб Ахъушала районна администрациялизиб РФ-ла Пачалихъла Думала депутат, «Единая Россия» ВПП-ла фракцияла член Жамалатдин ХIясановличил гьунибаъни бетерхур. Депутатличил барх бакIилри илала кумекчи Ольга Портнягина, МяхIяммад МяхIяммадов, Дагэнерго-ла начальник Арсен ХIяжиев ва Дагъиста тах шагьарлизибад бакIибти цархIилти жавабла хIянчизарти.
Гьунибаънилизир бутIакьяндеш дариб «Ахъушала район» МО-ла администрацияла бекI МяхIяч ГIябдулкаримовли, илала заместительти М.ИсмягIиловли, Э.ХIясанхIусейновани, районна депутатунала Собраниела Председатель С.ХIяжигIялиевли, районна больницала бекI тухтур К.ГIямаровли, ил больницализиб бахъхIи бузути тухтурти З.Зугьумовли, М.Сулайбановли, культурала ва туризмала управлениела начальник Х.ХIясановли, районна школабала директортани, учительтани, шимала бургани ва организациябала, учреждениебала руководительтани, жавабла хIянчизартани.
Жамалатдин ХIясановли гьунибаънила лебилра бутIакьянчиби Ахъушала район 90 дус биънила юбилейличилра мубаракбариб. Ахъушала районнис сунени барес вирусигъуна кумек гIеббиахъниличила багьахъур, гьунибаънила бутIакьянчибала суалтас жавабтира дедиб.
ГIур Ж.ХIясановли Ахъушала районнизиб дахъал дусмазиб бузули, чули касибси санигIятлис марли, хIялалси бузери барили, район гьалабяхI арбукес пай кабихьибти хIурматла адамти РФ-ла Федерацияла Собраниела шайзибад Баркаллала кагъуртачил шабагъатлабариб.
Илди саби: Ахъушала районна больницализиб дахъал дусмазиб хIянчи барибти Зайнутдин МяхIяммадов, Зугьум Зугьумов, МяхIяммад Сулайбанов, Ахъушала школабала учительницаби Майя ГIялиева, Загьидат Будайчиева, Надежда Лукьманова, Балхъарла шилизибадти учительти Шакират Мусаева, Шамил ГIяммаев, ГIямар Кьурбанов, ДаудхIяжи Сулайбанов ва цархIилтира. Ишдуслизир Ахъушала районнизирти 100 дус диубти школабасра Ж.ХIясановли савгъатуни дедиб. Илди сари: МухIела гимназия, Усишала шилизибси урга даражала хIябъибил школа ва Балхъарла шила школа.
Районна бекI МяхIяч ГIябдулкаримовла кабинетлизиб гьунибаъни даимбиуб. Илар СВО-лизир бутIакьяндеш дирути бургъантала гъамтас гIеббиахъуси кумекла хIекьлизирти суалти хIердариб.
Илаб лебри СВО-ла бутIакьянчибала ва илди анцIбукьуназиб алхунти бургъантала гъамтира. Ж.ХIясановли ва илала кумекчибани СВО-лизиб алхунтала гъамти сегъуна кумекличил гIеббуцес хIяжатлил пикрилизи касиб ва илдала челукьути масъулти арзес чесиб.
МяхIяч Кьадиевичлира сунела шайзибад СВО-ла бутIакьянчибала ва илаб алхунтала гъамти гIягIнисигъуна кумекличил гIеббуцес къайгъибирехIе или аргъахъиб.
С.ГIябдуллаева
