Ахъушала шилизибадти кIел урши – ГIяндиев Сапар Расулович ва Лукьманов Лукьман Шамилович спортличил биштIахIейчибадал бархбасунти саби.

Ахъушала ДЮСШ-лизиб боксла шайчиб гIяхIти устадешличил бегIбиубти уршбани районнизир ва дурар гIяхIти сархибдешуни чедиахъули сари, республикала кьадрила абзаназирра.

КIелра боксер тренерти Шамил Лукьмановли ва Заур ГIисаевли хIядурбарибти саби. Школа таманбарили гIергъи уршби бучIес арбякьун: Сапар керхур ДГПУ-ла физкультурала факультетлизи, Лукьман – Белгородлизибси юридический институтлизи.

Сапарли чеббикIибси спортла жура даимбариб МяхIячкъалализиб, Олимпийский чемпион ХI.ХIяйдарбековла уличилси боксла школализиб. Илала тренер сай Россияла спортла мастер Шамил Кьурбанов. Сапарли ва Лукьмай Россияла спортла мастерла уми сархили сари. Илдани илгъуна хIурматла у сархиб СССР-ла спортла мастер Мурад ХIямзаев гьаниркахънилис багъишладарибти абзаначир гIяхIти сархибдешуни чедаахъили.

Уршбас спортла шайчиб гIибратли бетаур Ахъушала районнизибадти машгьурти боксерти: Урхьучимахьилизибадти ГIябдулкьадир ГIябдуллаев ва МяхIяммадрасул Мажидов.

ГIябдулкьадир ГIябдуллаев чемпион ветаурси сай Азербайжайзир дурадеркIибти боксла шайчирти абзаначив. МяхIяммадрасул биалли, дебали машгьурвиубси спортсмен сай: Дунъяла Чемпионна у хIяйна сархили сай боксла шайчиб.

ДурхIназир спортличи, хаслира боксличи диги адикьес халаси къайгъи дакIубирули саби Ахъушала ДЮСШ-ла тренерти ХIябибуллагь МяхIяммадовли (Урхьучимахьи), ГIябдуллагь МяхIяммадовли (Ахъуша), Насруллагь Ильясовли (ТIантIила ши), ГIямар ГIямаровли (Ахъуша), ГIямар ГъазибяхIяндовли (Ахъуша), ГIябдулкьадир ГIябдуллаевли (Урхьучимахьи), Артур Саламовли (АметеркIмахьи).

Ахъушала районна у пахруличил гьанбуршахъули, яхIличил ва сабурличил гьалабяхI башути спортсментас ва илдала тренертас гьаннала гIергъира дахъал сархибдешуни диаб!

СултIангIяхIмад Маллаев, Ахъуша