«Даршути гIямруличил,
Шалати хьуланачил,
ХIердиэс хьулдикIути
УркIби чIумал гIяхIгъубзни».
Халал ЖумягI
Украинализиб дявила хасси балбуц бехIбихьибхIейчирад Россияла гIярмияла къяяназиб къуллукъбирули бахъал дагъистанлантира леб. Илдала ургаб ХIямшимала шилизибадти жагьилтира камли ахIен, сабира районна лерилра шимазибти жагьилтиван ВатIайс гIягIнибикибхIели илала хъархIерагардеш батахъес дурабухъунти. Илдазивад ца сай ГIяли ЛайсагIялиев.
РабаданхIяжилара Нуриятлара гIядатла хъалибарглизив сунела узи ХIябибличил халакаибсири ГIяли.
БегIтани уршбас гIяхIси бяркъ бедиб: школализиб илди гIяхIти кьиматуначил бучIутири, илдала суратуни мурталра ХIурматла уркьуйчир дири. Уршбани школала гIямрулизир жигарла бутIакьяндеш дирутири. Чула зиланти-ургаб илдала халаси хIурмат бири. 9-ибил класс таманбарили гIергъи, ГIялини халкьла хозяйствола пачалихъла колледжлизиб белчIуди даимбарес пикрибариб.
2018 ибил дуслизиб илини колледж хъараахъур ва Россияла гIярмияла къяяназиб къуллукъбарес арякьун. ГIялила пикри сабри университетлизиб белчIуди даимбарес, амма кьисматли гIямрулизи сунела дарсдешуни хиб.
Илини 2020-ибил дуслизиб Россияла гIярмияличил вягIда бигьун ва Тамбов шагьарлизиб къуллукъбирес даимиуб.
Украинализиб дявила хасси балбуц бехIбихьибхIели, бегI гьалар ила дархьаибти частаназиб ГIялини къуллукъбируси бригадара лебсири.
Сунени СВО-лизир дакIударибти гъабзадеш багьандан, ВатIайс асилдешличил къуллукъбирни багьандан сержант ГIяли ЛайсагIялиев Жуковла ва Гъабзадешла медальтачил шабагъатлаварибсири.
2024 ибил дусла апрельла 4-личиб ЛНР-лизиб дявила хъарбаркь таманбирухIели лебил артиллерияла бригадала бахъал бургъанти дяхъи-хъаслизи бикиб, биуб илдала ургаб алхунтира. ГIяли кьяшлизивад декIли вяхъиб ва Воронеж шагьарлизиб мерлабиубси госпитальлизи викиб, илис декIси операция бариб. Итди бурхIни бегIтас дебали къиянтири, нешли дахъал гьанкIагарти дугурби деркIиб. Тухтуртани кьяш берцахъес багьандан гIяхIцад къайгъни дакIудариб.
Рентгенна суратличи хIеръибхIели урухвиэслири – кьяш даршибти мегьла бургIлумани бицIибсири. Госпитальлизивад дураухъи гIергъи ГIяли отпускличи шилизи чарухъун, шила шанти, гъамти, алавти гьаббакIес бакIиб. БакIиб гьунибаэс ХIямшимала урга даражала школала бучIантира. 10-11-ибил классла бучIантази ГIялини буриб, сегъунти къиликъуни дяркъес гIягIнилил школализиб бучIухIели.
Реабилитацияла гIергъи ГIяли сунела дявила юлдашуначи чарулхъан.
Нушала шилизибра ГIялигъунти асилти гъубзни лебниличи пахрубирулра, улкала хъархIерагардеш балтахъули бургъути илди Чедибдешличил ара-сагъли чарбухъаб дикIулра.
Наб дила елкI хъараахъес дигулра Халал ЖумягIла белкIунси назмула тугъачил хъараахъес дигулра.
«Гьанагар дявтазибти
Я Аллагь, мяхIкамбара,
Нешанала уркIбази,
Разидеш хьурабара.
Някъбази дуциб ярагъ
КъяйкхIедикIули калаб,
Уршби, узби гьарилла
Ара-сагъли чарбухъаб».
Мариям ИсмягIилова, ХIямшимала ши
