ХIяжиева Салимат МирзахIяжиевна Семгамахьила урга даражала школализир вожатаяли ва географияла учительницали рузули сари.
Ил акIубси сари Ахъушала районнизив машгьурси, дахъал гьунарти дарибси, ордентачил ва медальтачил шабагъатлаварибси, ЧебяхIси ВатIа дергъла бутIакьянчи МяхIяммадов МирзахIяжи МяхIяммадовичла хъалибарглизир.
Салимат ХIяжиевани Избербаш шагьарлизибси педучилище таманбарили гIергъи М.М.МяхIяммадовла уличилси Семгамахьила урга даражала школализиб бузерила гьуни бехIбихьиб.
2009-ибил дуслизир Салимат ДГПУ-ла заочное отделениелизи карерхурли, географияла преподавательла санигIятличира регIриуб.
С.ХIяжиевани Семгамахьила шилизир ва школализирцунра ахIи, лебилра районна гIямрулизирра жигарла бутIакьяндеш диру.
Салиматли «Наследники» бикIуси дурхIнала организациялис бекIдеш дирули сари. Ил дурхIни дебали дигахъуси, сарерхурси, жавабкардешличил, сунечи хъарси бируси, багьуди касахъес халаси къайгъи дакIубируси учительница ва вожатая сари.
Салиматли дурхIначил дарх дахъал мераначи архIяби дурадеркIиб: Игит шагьар Волгоградлизи, Мамаев Курганнизир ЧебяхIси ВатIа дергъла манзиллизир цIакьси дяви кабикибти мер-мусаличи, Дербент шагьарлизи, Гъунибла районнизи, тIабигIятла памятникуни лерти Салтынский, Хунзахский чяхI-чяхIибачи, ЧIиркIейла, Гъунибла ГЭС-суначи. Илини ГЭС-суни секьяйда ва мурт дарибтил илдала тарихличила дурхIнази буриб.
Салимат МирзахIяжиевна «РФ-ла цахIнабси багьудила хIурматла хIянчизарла» уличи лайикьрикиб. Ил илкьяйдали «Ахъушала район» МО-ла администрацияла, культурала ва туризмала, жагьилтала политикала ва спортла управлениебала шайзирад чумал ХIурматла Грамоталичи ва Баркаллала кагъуртачи лайикьрикили сари.
Ахъушала районнизиб «Куначество» бикIуси республикала кьадрила проект бетерхахъес къайгъибарнилис, районна жагьилти кумекчибала кьукьяла бузерилизирра жигарла бутIакьяндеш дирнилис, «Нуни гIямру декIардирулра» бикIуси наркотикуначи къаршиси балбуц бетерхахъес багьандан хIянчи дурабуркIнилис ХIурматла Грамотабачил шабагъатларарили сари.
Жагьилтала Центрлизир детурхути далдуцуначирра, краеведческий музейлизирра школала бучIантачил рарх Салимат гьаман чераэс вирар.
Илала халкьла гIядатуни ва миллатла культура мяхIкамбирнилис ДР-ла культурала Министерствола, ДР-ла багьудила ва гIилмуртала Министерствола, Ахъушала районна краеведческий музейла фонд гIеббурцнилис ва сари хIеррирути мер-мусала тарих мяхIкамбирнилис ДР-ла ДГОМ-ла генеральный директор Д.Н.Хаппалаевла шайзирад, республикала «Орленок Дагестан» бикIуси дурхIнас ва гIулухъабас хасбарибси газетала редакторла шайзирад дедибти ХIурматла Грамотабира лер.
«Чилра ва селра хъумартурли ахIен» бикIуси конкурслизиб чедибдеш сархнилисра, республикала жагьил журналистунала слётлизир бутIакьяндеш дарнилисра, «Наследники» организациялис ва илис бекIдеш дируси Салимат ХIяжиевас грамота бедиб «Орленок-Дагестан» газетала бекI редактор Б.И.ХIусейновани.
Салимат ХIяжиевани Ахъушала районнизибад ЧебяхIси ВатIа дергълизи арбякьунти ва дергълизибад чарбухъунтачила, къел-хIерзи агарли бетахъибтачила белкIани дурчули, илдачила баянти лукIули, газетализи кадяхъахъес макьалаби дихули сари.
Салимат Ахъушала районна хьунул адамтала Советла членра сари. Ил багьанданра илини районна гIямрулизир жигарла бутIакьяндеш дирули сари, ва ил гьалабяхI арбукес халаси пай кабирхьули сари.
Салиматли сунела гIямрула вархкья ХIяжичил барх гIяхIси бяркъра бедили, чебяхIси даражала багьудира касахъили кIел рурси абикьурли сари. Ца рурси Ахъушала районна больницализир цулбала тухтурли рузули сари, кIиэсил — Калмыкиялизир тухтур-терапевтли.
Гьаннала гIергъира гIямрулизир сархибдешуни ва арадеш имцIадикIули, акIубтани разирирули хIерриэс кьадарбиаб хIед, Салимат!
С.ГIябдуллаева
