ЖумягI бархIи, сентябрьла 27-личиб бархIехъла манзиллизиб, Сагаси Хушетлизи ласбулхъуси мерличиб, гьунила дублаб, машинаби бензинничилра газличилра гIердурцуси «Plus» бикIуси, заправкаличиб халаси баргберд бетаур. Гьачам баргберд бетаурли гIергъи, кIинайсра, цаибилличибра цIакьси баргберд биуб. КIиэсил баргберд телефонна видеолизи бархли касилри ва чи-дигара уркIаэси, урухвареси сабри.
Баргберд бетаурси мерличи «Къалабаси кумекла» машинаби, духIнарти къуллукъунала, МЧС-ла, прокуратурала хIянчизарти гьалакли музабухъун.
Республикала БекI С.ГI.Меликовра къияндикибси мерличив халкьличил варх сайри.
Музабухъунтала кумекличил кIел-хIябал сягIятли цIала лами бишахъун.
БегIла гIергъити баянти хIясибли, баргбердли 13 адамла гIямру къябаиб, 21 дяхъи-хъаслизи бикахъиб.
Лебилра къуллукъла хIянчизартани чучи хъарти хIянчи заманаличир дурадуркIулри. Дяхъи-хъаслизи бикибти тухтуртала хIерудилиубри. ИлхIейс тухтуртас баркалла бикIути адамтала багьахъниби телеграм каналтазир дакIудиуб.
Баргбердла гIелабил бархIи — сентябрьла 28 Дагъистайзиб марайдешла бархIили багьахъур.
Сепайда, лерилра далдуцунани алхунти чарбарес вирули ахIен кьадин. Республикала БекI С.ГI.Меликовли, Дагъиста муфтий ГIяхIмад-ХIяжи ГIябдуллаевли, бахъал халкьли, бетаурси анцIбукьличил бархбасахъи, алхунтала тухумтази, гъамтази пашмандеш балахъути багьахъниби социальный сетаназир тIинтIдиуб.
Нушала халкь, дус гьалаб, МяхIячкъалала итил дубличиб бетаурси, 35 адам ахиратлизи арбухибси баргберд хъумартес хIебирули лебалтири. Сагаси баргбердли халкь гьатIира уркIаиб. Бахъла уркIбазир: «Се барес гIягIнили илкьяйда бетхIеахъес?» ибти суалти акIахъуб.
Суалтас жавабти даргес гьамадли ахIен. Гьайгьайрагу, къуллукъла хIянчизартани чучи хъарти далдуцуни дурахIедеркIибхIели даргудути сари заправкаби бикIутира лебри.
Илдира бархьли биэс асубирар. Нушала хIякимтала рушбатчидешличила хабурти гьар-чинаралра дурули сари, лерилра илди хабуртира къянала хIедургар.
Амма ца секIал лебтанилра балуси саби – ца сегъуна-биалра адамли илдигъунти заправкаби тIашдатес ва дузахъес вируси ахIен, гьайгьайра, цалисалра чула давла илкьяйда тIутIубарес, алхунтала, бяхъибтала бунагьлизи викес хIейгахъу. Чула лебдеш ахIерабаресра илдани лерилра чараагарти далдуцуни дурадуркIу или гьанбиркули саби.
Баргбердли уркIаили, дила акьути бурхIназир дирути, хIедарили уркалун. Баргбердличила багьахъниби дучIули замана арбякьун. Ца багьахънилизиб, Россиялизир бегIлара чузибад урехиагарли дузути заправкабала мякьлар гостиницаби, ашханаби, кафеби агара или белкIири. Рахли ашханализиб, баргбердибси газла баллонничибли баргберд бетаурли биалли, гьайгьайра, цалра заправка лебси мерличи гъамли, цIа улкули биахъес асухIебирар. Илкьяйдали бахъал адамти цалабиркути меранира, техстанциябира, гостиницабира заправкабала мякьлар диахъесра асухIебирар.
Амма, жумягI бархIила бархIехъла дехIибала дируси замана баргберд бетаурхIели, вайнукьабала баркьуди бургар ибти пикрумира дашули сари бекIлизи.
Социальный сетаназирти дахъал багьахънибазиб, Дагъистайзирти цалра заправка гIягIниси тяхIярли, халкьлис урехи хIебиахъесли далкьаахъурли ахIен бикIули саби. Гьаланачи дарили лерти заправкабачи чекадаили, сагати, ахъти юртани тIашдатурли сари, гIяхIцад заправкаби шагьарла дайлар сари или балахъули саби телеграмлизиб.
ХIебиалли, нуша лерилра янсавла чармала чеди кадиилра, ва селра барсбаресра гьунар агара.
Ириъ Турциялизир, халаси балагьла мерсдакьунхIели, урехи хIебирахънила тяхIяр-кьяйда дузахъули, тIашдатурти юртани гъятIдиибти ахIенри. Лерилра сунени дарибти юртани хяса-пусул детаурси юртанала хужаим, гIясибиубти халкьлизивад верцес багьандан гьавулхъухIели, аэропортлизив уцибсири. Дунъяличиб илис сегъуна танбихI барибал хIебалас, амма Аллагьла гьала укьесра гIягIниси биъниличила хъумартес асухIебирар.
Дунъяла мас мяштIбирули, халкьлис урехи хIебирахънила тяхIяр-кьяйда дулъуси баркьудила адамли дунъяличибра, ахиратлизибра селра гIяхIси хIебургу.
Хьунулра, уршира, рурсира баргбердлизиб алхунси Заур Разакьовла гъай, баргбердли уркIаибти, урухбиубти адамтас маслигIятли детаур. «Ил Аллагьла кьадар сабри, илаб адамли селра барсбарес хIейрар» — викIи Заур Разакьов. Илисра, гъамти алхунти лебтасалра, чебуркъубси чекасахъес Аллагьли кумекбараб. Агарбиубти гьалжанализиб чебаргъаб. Дяхъи-хъаслизи бикибтас арадеш баркьаб.
Дагъистан Республикала БекIли алхунтала хъалибаргунас миллион къуруш, дяхъи-хъаслизи бикибтас 250 азирличирад 500 азир къурушличи бикайчи арц декIардарахъес хIукму кьабулбариб.
Баргбердла мерличирти гъятIбиълуми урисули МЧС-ла хIянчизарти бузес даимбиубли саби.
Заправкала вегIли гIяхIбаркьла фонданази арц хIедучахъес буриб ва лерилра харжани сунечи чесиб.
Муъминат Хаттаева
