Узнимахьила урга даражала школализи ну шел дус гьаларра рякьунсири. Чедаибтири иларти тяхIяр-кьяйда, сарира 43-эсил дус школала директорли узуси ГIяхIмадов Кьурбан Кьадиевичла къайгъиличил кадизахъурти: школализиб ва алавчарти мер-мусаличиб умудеш ва ибгибдеш сарри, педагогический коллектив уржибси ва жавабкардешличил бузес бурсибиубси биъни чебаэслири.
Шел дусла духIнар гIямрулизир гIяхIцад секIал дарсдиуб. Кьурбан Кьадиевич гьанна директор ахIи, учитель сай. Директорла къуллукъ бузахъуси ГIяхIмадова Рисалат МяхIяммадовна сари. Ил Кьурбан Кьадиевичла урши ГIяхIмадла гIямрула рархкья, хIябал урши-рурсила неш сари. Ил 20 дус Узнимахьила школализир рузуси, черетаибси педагог сари.
…ГIяхIмадлис кьисматли дедибти дусми дахъ камти урдухъун. Ахъушала райбольницала бекI тухтурла заместитель, халаси багьудила вегI кардиолог, районна халкьла баркалла сархибси ГIяхIмад ГIяхIмадовли, сунела бархкьяби – райбольницала бегIлара гIяхIти тухтурти ХIябибуллагь ХIясанхIусейновли ва Раисат ГIябдуллаевани кьяйдали, кахси ковидли буцибти мицIирли калахъес дуги-хIери кьяшмачи тIашли замана буркIусири.
ГIяхIмадлис бетаурсиличила бархтани гьаннара халаси децIличил гьанбиркахъули саби: «Дуги-хIерилизив тIашсири, ца палатализивад итиллизи дуцIулхъули, гьанкIличила ва беркесиличила хъумартурсири. Ахирра «цакамси бамсри ихъис» или дежурный тухтурла кабинетлизи ухIнавхъун.
ЗягIиптас вайтIадикили, кьакьарухъунси медсестра рахъхIиагарли дежурный тухтурла кабинетлизи дуцIрухъун.
— ГIяхIмад Кьурбанович, валкьаигу!…
Медсестрала чIярлиуб больница зерзербухъунсиван биуб – ГIяхIмад, къугъаси, жагьилси адам, пагьмучевси тухтур, уржибси хъалибаргла бекI, бахъ дебали гIяхIти бегIтала урши – таманкайублири…
— Дила дудешра гIямрулизивад жявли арякьунсири, машиналичиб хатIа бетаурли. Кьурбан Кьадиевичли наб дудешла мер буцибси саби. Къайгъибирулра школализир илини кадизахъурти гIяхIти тяхIяр-кьяйда дихIес ва гьатIира чедетаахъес. Дила гIяхIти заместительтира леб. Гьарил учитель, гьарил хIянчизар кьаслизив сай сунечи хъарси чебетаахъили таманбирес, – рикIи Рисалат МяхIяммадовна.
Ил бархIи набчил рарх Узнимахьила школализи ракIибси районна администрацияла кьайгимдешла отделла начальник Зубалжат Жамбуллаевара нура школализирад къунздухъунра ва белчIудила сагаси дусличи сецад чебетаибси хIядурдеш барилил чебаира: лямцIдикIулри лерилра классуни ва кабинетуни, дурхIнас беркала бируси ва кьацIли балхуси мер-муса, хаслира жагали кадизахъурлири «гьаладяхI дашнила дамкъни» проектла дазурбазиб балкьаахъурлири хасси кабинет.
Далкьаахъурлири дахъал стендани — Дагъистайзибадти Советский Союзла Игитунас, бахъхIила учительтас, ункъли бучIути дурхIнас хасдарибти.
— Нушани, школала учительтани, Волгоградлизи, цIакьти дявти кадикибти мераначи архIя дураберкIибсири ва итад хибти секIал сари ишди, – чедаахъиб школала директорли ЧебяхIси ВатIа дергъла замана нушала бургъантани чедиръути мегьла кьапIни ва цархIилти ваяхI.
Мякьлаб леб СВО-ла бутIакьянчибас хасбарибси стенд – Ахъушала районнизибадти ВатIа хъархIерагардеш багьандан жан харждарибтала суратуни ва илдачила халали ахIенти белкIани.
Директорли буриб учительтани чула шайзирад СВО-ла бутIакьянчибас дархьибти савгъатуначила – ванати палтар, берк-бержла продуктуни ва 15 сягIятла манзиллизир ухути шяманачилти чули дарибти 200 гIягIниахъала.
Директорла кабинетлизир лацла бяхIяначи даршибти ХIурматла Грамотаби, Баркаллала кагъурти, декIар-декIарти сертификатуни чедаира. ГIяхIбизур, сецад халаси хIурматличил гъайрикIулрил директор барх бузутачила ва севан ахъли кьиматлабирулрил илдазивад гьарилла баркьуди:
— БелчIудила хIянчила шайчирси дила заместитель Ибрагьимова Байгинат ЯряхIмадовна пергер адам ва черетаибси хIянчизар сари, рахъхIи рузуси ва ишабти адамти гIяхIил балуси. Илала кумекличил саби нушани дурхIнала бегIтачил бархбас уржахъили бихIуси;
бяркъла хIянчила шайчирси заместитель ХIяжиева Жавгьарат БяхIяммаевна электронный бархбасла шайчир гIяхIси специалист сари, илала кумек нушаб ишдуслизиб хаслира гIягIнисили уббулхъан;
халаси багьудила вегI математик ва чеветаибси учитель сай ГIялиев МяхIяммад ГIялиевич;
Физкультурала учитель МяхIяммадов Рустам Русланович гIяхIси устара сай, чинаб се лебал балбикахъес гIягIниси, гьар секIайчи чеветиуси;
пагьмучевси педагог сай биологияла учитель ГIябдулкаримов МяхIяммад ГIябдулкаримович;
математикала преподаватель Абубакарова Хадижат Жамалутдиновна ва урус мезла ва литературала дурсри кадирхьуси ГIябдуллаева ГIяшура Гъазиевна чула санигIят гIяхIил бяркъурти, 40 дус барх бузути пергер педагогуни саби;
сарерхурси, чекаризурси хIянчизар сари директорла насихIятчи Къараева ГIяйшат Будуновна…
«Сунела бекIдешлиуб бузутачила гьарилличила гIяхIси гъай буруси Рисалат МяхIяммадовнала хIял-тIабигIят сецад гIяхIти диэс гIягIнили!» — пикри акIуб набзиб ва иличила гьанбушира.
— Дила пикрили, гьарил адамлизир, хаслира руководительлизир бегIлара гьалар диэс гIягIнити сари адамдеш. ГIямрулизирти анцIбукьуначи хIерхIеили, зягIипли виаб, децIлизив виаб, гьарилличиб чебси саби адамдешличил хIериэс. Адамдешли саби хIурмат бихIуси, — иб Р.ГIяхIмадовани.
Рисалат МяхIяммадовнази сунела дурхIначилара хьарбаира.
— Рурси Дагъиста медакадемиялизи карерхурли, авъибил курслизир ручIули сари. Наб хIейгусири тухтурла санигIят касахъес, амма рурсили иб: «Нуни дудешлизи тухтур ретаэс гъай бедибсири». Ил багьандан ратурра сунес дигуси мерличи карерхахъес. Халалгъуна урши ДГУ-ла юридический факультетла кIиибил курслизив учIули сай, виштIалгъуна 7-ибил класслизи вашули сай, – буриб Р.ГIяхIмадовани ва имцIабариб:
— БегIтала комитетлизибти Зубайдат БяхIяндовас ва Асият ГIисаевас баркалла белкIесра хъуммартид, наб халаси кумекла бегIти саби илдира!
— Нуша мурталра разили дирехIе уршила хьунуйчи, – черетаибси, хъулирра дурарра адамдешличил вяшрикIес балуси сари Рисалат. Гьанна, нушала гIямрулизиб ихгъуна халаси децI бетаурли, дахъал тяхIяр-кьяйда дарсдиубхIелира ил жагьил хьунул адамла кагибдешлис, кабизалачебдешлис, дурхIначи ва нушачи бируси хIерудилис, бархьли бурасли, нуни икрамбирулра. Ил шайчиб нушала биубси игъбар Аллагьла уркIецIиван чебиулра ва шукрудикIулра! – сунела уркIиличибси пикри буриб Кьурбан Кьадиевичли.
Нуни Рисалат МяхIяммадовнази хъубеш дудешла дугьби дурира.
— Баркалла биаб чус – ну илкьяйда кьиматларирнилис! – иб илини.
– Се бирусив, нушаб ишгъуна кьисмат кьадарли бурги. Дила неш гьарахъли, Астраханьнизир хIеррирули сари. Хъубеш неш нуни нешван чериулра.
…Кьурбан Кьадиевич нуша гьунирдатес дураухъун ва алавчарти мер-муса, школала гьарзати азбар-гIяя чедиахъули, иб:
— Школа гьарзабиахъес мер лебси саби. Школализиб 350-цад дурхIя леб. Ишаб 38 багьудила хIянчизар бузули саби. Ишдус 25 урши-рурси цаибил класслизи бучIес бакIиб. ДурхIни кIелра сменализиб бучIули биалра, илкьяйдара кахIебурцули, бархибдеш алкIули бирар. Илгъуна масъалаличила бурес районна бекIличи укьес пикри леб. Вирхулра, ил гIякьлучевси адамли дила дард иргъниличи.
ГIячихъси саби, 47 дус школализив узуси, хIурматла умира, ХIурматла Грамотабира сархибси адамла тилади МяхIяч Кьадиевичли пикрила дураб хIебалтни.
Ахъри бедаб Аллагьли бегIлара хIялалти адамти гIеббуцахъес МяхIяч ГIябдулкаримовлис ва арали батаб учительла санигIят чеббикIибти лебилра, илдала лугIилизиб Узнимахьила школализиб бузутира!
П.Маллаева
