Дунъя дебали барскабиубли саби. Илкьяйдали халкьра. Гьалабла халкь гьанналайчил цугбуцалли, кIел пачалихъла халкь кьяйдали декIарбулхъули саби. Адамти барсбиъниличила саби дила макьалара.
Нушала халкьличила гъайикIес къиянни саби. Амма жагьилтачила бурасли, илди гьаваличибти кьяйдали саби, селичилра пикрибулхъули ахIен. Мисаллис касахIелли, маршруткаличи гьести гIямрула адам ацIалли, жагьилти чула телефонтази вавализи мирхъиван бархили, алавси секIал хIясиббирули ахIен. МалхIямли тиладибаралли, вайси гъайра гIеббиахъули саби. Чилалра гъай хIедакьес багьандан лихIбачи наушникунира даршили, ахъли музыкаличи лехIирхъули саби.
ЦацабехIти жагьилти шагьаркадли къунзбикIухIели, лихIбачи наушникуни даршили, чула мякьлав адам левси кьяйдали, телефонтачил гъайкабикIули саби. Илдани саби-алавси селра хIясиббирули ахIен, илкьяйдали машинабала тIамалара хIебакьили бехIемцIлизи биркули саби. Илдигъунти гIямру деркIайчи чулахъуни бетарути анцIбукьунира къаршидиркули сари. ЦацабехIтани гавлагван гьарзати палтар челгьули сари, рурсби кьяйдали башули саби. ЦацабехIти рурсбанира мурул адамтала палтар челгьули сари, яра лебгIеб кьаркьала гьаргбарили башули саби. Гьалаблагъунти пергерти дубурла къуймурти чебаэс вирули ахIен гьанна. ИшхIелла жагьилтас Китайла, Кореяла ва цархIилти дурала пачалихъунала халкьаначи мешубикес дигули саби. БекIличирти гъез жура-журала ранганачил рурхьули сари. ЦацабехIти урези-хIяя агарли, лебталалра гьалаб держли, папрусли, наркотикунани бужули саби. Гьанна дакIубарибси вайси секIал леб, сунесра – электронный папрус бикIуси. Дагъистайзиб бахъли ил битIикIули саби. Электронный папрус арадешлис дебали заралласи секIал биъниличила балули хIебургар илдани.
Жагьилтани чус гIямру ва жан дедибти бегIтачила хъумуртули саби. Илди бухънабас хасбарибси юртлизи бедлугули саби, яра кьакьализи лайкабикIули саби. Гьести гIямрула адамти мучлаагарбирули саби. Чус даршуси челябкьла багьандан илдани дяхIяурти къияндешуначила балули ахIен: гьар бархIи илдани дуги-хIери хIеили, хъумачиб ва заводуназиб чула хъалибарг, дурхIни абикьес ибси къайгъилизиб бирутиригу.
Мукърази ахъибхIелира рурсби бехIбирхьули саби: «ХIуни наб магьарлис дахъал дурхъати секIал, мургьи-арц ва цархIилти секIал кахIедухадли, хIед шери хIякьяс» . Дагъистайзир чумал анцIбукь диубти сари чула уршила сагаси хъули рурсила бегIтани хъа ваяхI асибхIели, хIушала дургIети секIал гIягIнили ахIенну, аррукили хIушала рурсира ардукьеная или уршила нешли цIикури гьаряхъибти.
Нешла мезличила буралли, чисалра нешла мез дагьес дигули ахIен. Илди селис гIягIнити бикIули саби. Школабазибадра нешла мезла дурсрачир бегIтала вягIда хIясибли, акьубалтули саби. Школабазир нешла мезла ва литературала дурсрала сягIятуни камдирули сари. Халкь шакхIебиркули бургар, рахли нешла мез хIеруркъялли, хала бегIтала гIядатунира, арагIебли миллатра деткайхъниличила.
Гьаннала гIядатуначила гъайикIес кьиянни саби, сенахIенну илди дебали дарсдиубли сари.
Багьла-багьлали хала бегIтани нушачи даахъибти, илдани дузахъути гIядатуни деткайхъули сари. Алавти халкь абдалбирули саби или гьанбикесли саби. Бурибси гъай хIергъалли, яра чус хIейгибизеси дев буралли, адам каршули сай. Гьарли-марти игитуни биалли, илдигъунти падахъусунас кьадин чула гIямру кьурбандарили, дявила майдайчиб улхули саби.
СВО бехIбихьили гIергъи чум урши дявтазиб къел-хIерзи агарли беткахъиба, чум алхуна? Ну вирхулра, дила биштIаси улка барскабирниличи. Жагьилти барсбиубли, чула ВатIайс багалабирниличи. Дявтира кадерхурли, нушала узби, дудешуни, уршби ва лебилра дявтазибти разили, хIулкIули чедибдешличил чарбулхъниличи.
Сен-биалра, жагьилти чебсаргъниличи, чула хала бегIтала гIядатуни детхIехъахъес къайгъи дакIубирниличи умут леб…
МяхIяммадшапи Матаев
