Хъалибаргунала гIядатунала кьиматчерти бетуцуни мяхIкамдирниличи бяхIчиаибси пачалихъла политика гIеббурцули, хъалибаргла дуслизир дурадуркIути далдуцунала дазурбазиб Дахадаевла районна адамти яшавлашал гIеббурцнила шайчибси Комплексный центрла хIянчизарти Дибгашила шилизибадси ГIялиевхъала гIибратчебси хъалибаргличи гIяхIладли бякьун.
Сулайбан ГIялиевич ва Халум ХIяжигIялиевна хъайчикабиибти саби 1960 ибил дуслизиб. Гьанна илди 64 дус кIел уркIи цадарили, вайра гIяхIра дарх дуртIули, хIеркабирули саби.
Сулайбан ГIялиевич, шилизиб школа таманбарили гIергъи, Сергокъалала педучилищелизи керхурсири. Дахъал дусмазиб педагогла хIянчи барибси илини сунечил барх бузутала ва сунени бучIахъули калунти дибгашантала ургаб халаси хIурмат сархиб.
Илала сабухъчебси бузери ахъли кьиматлабирули, Сулайбан ГIялиевич учительтала лебил Союзла съездличи делегатлира Москвализи вархьибсири.
Сунела берхъибси хъалибарг абикьес багьандан чуйнара Дагъиста дура узесра вашули калунсири. Ил узусири юртани лушули ва цIедешла галгубас къуллукъбирули.
Илала гIямрула марси гьалмагъ Халум гьала-гьала колхозлизир, кIинайс совхозлизир рузусири.
Сулайбанра Халумра гьачамцун ахIенри бузери ахъли кьиматлабирули, ХIурматла Грамотабачил ва Баркаллала кагъуртачил шабагъатлабарибти.
ГIялиевхъали биштIахIейчибадли ункъли бузес бурсибиубти саби. Илдани гьаннара чула халали ахIенси хозяйстволис къуллукъбирули саби: цIедешла анхълис ва духълумас мурталра чебетаибси къуллукъ гIеббурцу ва гIинцбала, хъярбала, кякянтала давлачерти сабухъуни дурчу. Урхьначибадли 1500 метрла ахъдешличибси дубурла мер-мусаличир тIутIи дашахъес гьамадси ахIен. Биалра, ГIялиевхъала хъалибаргли илдала гIяхIти сабухъуни дурчули сари.
Илдани верхIел дурхIя адаб-яхIла бегIтили халабаахъиб, лебтазилра чебяхIси даражала багьудлуми касахъиб. Илдира чула бегIтиван шанти-ургаб хIурматличил пайдалабикIути саби. Илдала дурхIнала 25 дурхIя леб. Илдачибадли акIубтира халабиули саби.
ГIялиевхъала дурхIнала авал уршили Украинализир кадиркути дявила анцIбукьуназир бутIакьяндеш дирули сари. Илдазибадли кIили бяхъили гIергъи, чула арадеш къулайбирахъули саби.
Гьайгьай, хала дудеш Сулайбан ва хала неш Халум илди багьандан паргъатагарбирули саби. Илдачилацунра ахIи, цархIилти СВО-лизир бутIакьяндеш дирутачилара илди кьакьабикIули саби ва жяв-жявли дургъби тамандиубли, чедибдешличил бургъанти чула хъалибаргуначи чарбухъи дигниличила балахъули саби. Гьар бархIила чула балгназиб ЧевяхIсилизи тиладибикIули саби ВатIа хъархIерагардеш балтахъути гъубзнала гIямру мяхIкамдарахъес ва ванзаличиб даршудеш калахъес багьандан. Илдани бурули саби чула дурхIнала дурхIнани ва цархIилти бургъантани бутIакьяндеш дируси бархьдеш багьанданси баркьуди сеннира чедибдешличил ахирличи биркур или.
Центрла хIянчизартани чула гьунибаънила дазурбазир ГIялиевхъала хъалибарг уркIи-уркIилабадли мубаракбариб ва илдас арадеш, гьарбизуни, хъалибарглизиб бизи-ванадеш диубли, дурхIнала дигиличил илди мурталра алавбурцули дигниличила багьахъур. Гьунибаънила ахирличир ГIялиевхъала хъалибарглис илдани савгъатунира дедиб баркаллара багьахъур.
Дахадаевла районна администрацияла пресс-служба
