Дебали жигарчевси, пагьмучевси гъирачевси ва разили челябкьлаличи хIерикIуси урши сай 19 дус виубси Асадуллагь Мирзаев. ВиштIахIейчибад илала хIулбала шала лебси ахIен. Ил анцIбукьлис сабабли бетаурси саби – тухтуртала хатIа. Биалра, Асадулагьли жагали дам бирхъули саби ва Кавказла халкьла далуйти дучIули сай.

90ибти дусмазиб илала хъалибарг Хайдакьла районна Мажалисла шилизибад Нижневартовсклизи гечбиубтири. Илав акIубси сай Асудуллагь Мирзаевра.  Хасси интернатлизив ил учIули калунсири. Музыкаличи диги виштIахIелил акIубтири илала. Гьанна биалли, сунела гъираличил ва бегIтала кумекличил Асадуллагьли жура-журала далдуцуначир ва конкурсуначир бутIакьяндеш дирули сай.

«ЦIуба мурчI» бикIуси халкьани-ургабси конкурс-фестивальличиб илини Уралла федерацияла округла шайчирад бутIакьяндеш дарили, чедибдеш сархибсири. «Зубарила гьуни» бикIуси лебил Россияла конкурс-фестивальличивра «Вокал» ва «Инстументальное искусство» бикIути номинациябазиб «ХIу дила талихI» бикIуси далай белчIи, чедибдешла кубок ва цаибил даражала диплом сархибтири.

Гьар дус хIебла каникултачив Асадуллагь Мирзаев Хайдакьла шилизи вашуси сай. Илабси ансамбльличил варх муниципалитетла далдуцуначир бутIакьяндеш дирули вирар. Халаси баркалла балахъули сай илини районна культурала Ценрла хIянчизартас. «Баркалла лебилра набчи бирхутас. Цашилантасра халаси баркалла, ну гIевурцнилис. Дила дигуси Хайдакьлис ва илала халкьлис даршудеш ва разидеш дулгулра!» — викIи А.Мирзаев.

Хайдакьла районна администрацияла пресс-служба