Къаякентла районна администрациялизиб «АхIерси Дагъистан» бикIуси жамигIятла хIяракатла шайзибад СВО-ла бутIакьянчиби Сагаси Вихърила шилизивадси Мурад МуртузагIялиев ва Гергала шилизивадси ГIябдулхIямид ГIябдулхаликьов «Кавказла халкьла игит» ва «Дагъиста халкьла игит» шабагъатуни дедлугнила балбуц бетерхур.

Районна бекI МяхIяммад Эльдерхановли Дагъиста БекI Сергей Меликовла, районна халкьла ва сунела шайзибад бургъанти шабагъатличил уркIи-уркIилабад мубаракбариб.

Дявила хасси балбуц бетурхуси мер-мусаличир, душмайс къаршидеш дирули, пачалихъла хъархIерагардеш балтахъули, чеалкIуси наслулис шаласи челябкьла биахъес къайгъиличил, халати гъабзадешличил бургъулицунра ахIи, иларти социальный бяхIчибизла организациябас кумекра гIеббиахъули биъниличила буриб илини.

«Кумекбирни – гьарли-марси дагъистанланна, дубурланна хIял-тIабигIятла хасси лишан саби», — цIакьбарили буриб МяхIяммад Эльдерхановли.

Гьунибаънила цархIилти бутIакьянчибанира бургъанти мубаракбариб ва чедибдешличил жяв-жявли хъули чарбухъи дигни аргъахъиб.

Гьунибаънила дазурбазир, Мурад МуртузагIялиевлис ва ГIябдулхIямид ГIябдулхаликьовлис лайикьти шабагъатуни ва Баркаллала кагъурти дедиб.

Къаякентла районна администрацияла пресс-служба