Гьачамалра абзаначив удихIейкибси Россияла хабарла АСА-ла мушлукья Ислам ГIямаровли дахадаевлантицунра ахIи, сунела чедибдешличил лебилра дагъистанлантира разибиахъуб. Иш гьакIлис ил чедиикиб россиялан Кьурбан ТIайгибовличивадли. Ил, къаршикар кIиибил раундличив гIяндикIнила уюнбарили, чедиикиб ва байхъала кунксилизи халбируси битIакIлизив АСА-ла Гран-прила чемпион ветаур.

Абз Краснодарлизиб дураберкIибсири.

Ислам ГIямаров 27 дус виубси сай. Абзаначив ил 13-йна чедиикибси сай. Илдазирадли 8 чедибдеш заманалис гьалар сархибтири. GEFC AZFC MMA Fighting Series 3-ибси абзличир И.ГIямаровли 2016 ибил дуслизир бегI гьалар бутIакьяндеш дарибтири. ИлхIели ил Азербайжайзивадси Нарбаллу Атакишиевличивадли цаибил раундла, цаибти минутуназивал чедиикибсири.

Ислам ГIямаров Европала (2017, 2018) цацали бирхIнила журалилизив кIина чемпион сай. АСА-ла абзаназир бутIакьяндеш дирес 2020-ибил дуслизив вехIихьибсири.

Иш гьакIлисра Ислам ГIямаровли мушлукьяла гьарли-марти устадеш чедаахъиб. КъантIси заманала бухIнаб умутличил уюнбарили, къаршикар мукIурвакIахъиб.

Ил чедибдешли дарган уршила хIурмат ахъбуцилицунра ахIи, спортсменна къайгъини ва устадеш чедаахъиб. Тренировкабачив мурталра чекайзурли хIядурикIуси дубурлан уршили чедибдеш сархиб.

Баркалла багьахъес лайикьли саби ил гIевурцути ва хаслира Краснодар шагьарлизи бакIили ил уркIичеввирахъути дубурлантас. Илдани ареналичиб хъумхIертеси баркьуди дураберкIибсири ва гьалмагъдешла ахъти къиликъуни дакIударибтири.

Илгъуна чедибдешличил Ислам ГIямаров мубараквирехIе ва илис гьаннала гIергъира гьарбизуни ва чедибдешуни диубли дигниличила балахъехIе.

ХIурматла Ислам, хIечи пахрули бицIибти дахадаевлантани ва дагъистанлантани хIела гъабзадешла баркьудлуми ахъли кьиматладирули сари. ХIугъунти гьарли-марти дубурланти бахъбааб жагьилти-ургаб.

Дахадаевла районна администрацияла пресс-служба