Нушала улкала гьарил регион ца сунечицун хасси лишанничибли цархIилтазибад декIарбулхъули бирар. Нушала регион дагъистанлантани спортлизир дирахъути сархибдешуначибли декIарбулхъули саби. Дагъиста спортсменти, Россияла абзаначирцунра ахIи, Европала ва дунъяла абзаначирра гьаларти мерани сархули, мургьила медальтачи лайикьбиркули саби, иличибли нушала Дубуртар Улкара машгьурбирули. Спортсментани илдигъунти сархибдешуни мажахIят диахъиши, чула бузери дигахъути, халати устадешчебти тренерти-преподавательти агарти биаллири. Тренертани ва спортсментани арати гIямру дуркIниличи жагьси наслу битIикIнилизи, физкультура ва спорт гьаладяхI дашахънилизи мекелли халаси пай кабирхьули саби.
Нушала республикализиб имцIаливан азадли мушулвашнила жура саби машгьурси. Амма спортла цархIилти журабазирра жагьилтани дирахъути сархибдешуни камли ахIен. Дила иш белкI тайский боксличила ва ил журализив дунъяла авна чемпион ветаурси дарган багьадур ХIяжичила саби.
ХIяжи Мажидов акIубси сай 1996 ибил дуслизив Калмыкиялизив. 2 дус виубхIели, илала бегIти Тарумовский районнизи гечбиубтири. Илаб школа таманбарили, ХIяжи Къизларла электромеханический колледжлизи керхурсири. Илав учIути дусмазиб жагьси адамли Къизларла дурхIнала-жагьилтала спортла школализи сунела у кабикахъибсири (записался).
«Халаси спортлизи ахъес ибси пикри-декIар аги, кьаркьала къулайси агиличиб биахъес багьандан 2014 ибил дуслизив вакIибсири Къизларла дурхIнала-жагьилтала спортла школализи ва тренер Ибрагьим Хидировли тайский боксличи руркъусири. 2-3 баз дикибхIели, тренерли абзличир бутIакьяндеш дарахъес ибси пикри гьалабихьибсири. ИтхIели чина-биалра вашес наб къиянбулхъулри, арцла шайчибси аги ункъли хIебиънили. Тренерли гIевуцили, сунела харжаначил викусири абзаначи», — викIи чемпион.
Устадеш камли диънили гьаланачи ХIяжи удивиркули вири. Лерилра цIакьани дяхIчиаили, ибкьли хIядурвикIес вехIихьиб. СКФО-лизир детурхути абзаначир бутIакьяндеш дирули, 2-ибти, 3-ибти мерани кайси.
2018 ибил дуслизиб бетерхурси Россияла цаибил мер багьанданси абзличир бутIакьяндеш дарили, ХIяжини цаибси мургьила медаль сархибсири. ИлхIели Мексикализиб бетурхуси дунъяла цаибил мер багьанданси тайский боксла шайчибси абзличи путёвка бедибсири. Амма, илаб чедибдеш сархес имканхIебакIиб.
Устадеш касибси ХIяжи Мажидовлис тайский боксла шайчирти гIергъити абзани гьачамличир-гьачам гьамадли детурхулри ва, 2019 ибил дусличирадли спортла ил журализир илини сархибдешуни дирахъули сари. 2019 ибил дусличиб Россияла цаибил мер багьанданси абзличив чедиикили, Таиландлизиб бетурхуси дунъяла цаибил мер багьанданси абзличи путёвка сархибсири. Илар бутIакьяндеш дарили, 87 килограммла битIакIла категориялизив тайский боксла шайчив ХIяжи дунъяла чемпион ветаур. 2020-ибил дуслизир абзани дурадеркIибти ахIенри, коронавирусла чейхъуси изала тIинтIбикIни багьандан. 2021-2023-ибти дусмазир Таиландлизир детерхурти дунъяла цаибил мер багьанданти абзаначивра чемпион ветаур. Ишдус Грециялизиб бетерхурси дунъяла цаибил мер багьанданси тайский боксла шайчибси абзличибра, 91 килограммла битIакIла категориялизиб ХIяжи Мажидовли чедибдеш сархиб ва авнайс тайский боксла шайчивси дунъяла чемпион ветаур.
«ХIяжи 18 дус виублири набчи вакIибхIели. Ил бегIла гьалав чеваибхIелил дебали гIяхIизур – ахъси, жагаси, камти гъайла, абад-хIяяла, паргъатти хIял-тIабигIятла жагьси адам. Школализив учIухIели, ил дуцIикIусири, гIур цархIил журала спортлизи ахъибси ахIенри. Гьайгьайрагу, дуцIикIни спортлизи ахъес дигусилис гIяхIси хьулчи саби. ХIяжини набчил тренироватьикIес дигни багьахъурхIели, ну кьабуликира. СенахIенну гьала хили багьурра илини сархибдешуни дирахъни. Бузери дигахъуси, пикруми-кьасани детерхахъес къайгъни дакIудируси урши сай. Бурибсиличи лехIирхъуси ва иргъуси адам сай, гьачамалра ил нервабала ибкьдешлизи викили гьанхIебиркур. Спортсменнизиб дебали гIяхIси къиликъ саби ил – паргъатти хIял-тIабигIятличилси виъни.
Бархьли бурасли, гьаланачи илис ита-иша вашес дебали къияннири. Нушанира кумекбирехIе, гьар секIал ункъли дирар, бекIлибиубсигъуна – цалра тренировка мабалтад. ГIямрулизиб гьамадли селра сархес вируси ахIен, лерилра къияндешуни яхIличил, сабурличил ахъили, дирахъути сари сархибдешуни. Спортлизир сархибдешуни диахъес дигалли, юлдашуни, шадибгьундури гьарахъдарес, камси гьанкI ихъес, ибкьли тренировкаби дурадуркIес чебиркур или гъайикIира илизи. ХIяжини дила гъайла иргъулри ва набчи вирхулри. Гьанна илини чедиахъути хIясилтани нуша разидирулра. ЧевяхIси Аллагьлира ил гIевуцили, абзаначив чедииркахъули сай. ХIяжини гьар-гIергъили сархибдешуни дирахъниличи адамти бирхарули ахIенри. Ил мурадличи виуси, чIумали кайзурси адам виънили, спортлизир илдигъунти хIясилти чедиахъули сай.
Гьанна илала аги гIяхIцадла къулайбиубли саби. Россияла спортла Министерстволи ХIяжис гIяхIси алапа кабизахъурли саби, спортла мастер сайливан. Лебтасалра гьалаухъахъи, тайский боксла журализив спортла ахъанайтачи ваахъес ибси кьас леб, Кьудратла ВегI икьалавиалли», — викIи Россияла урибси тренер Ибрагьим Хидиров.
И.Хидировли дурхIни гьарра шайчибад гIеббурцули, дудешлигъунти насихIятуни гIердурули, рукъути саби. Гьарил жагьси адамли сархибдешуни диахъес вирниличи бирхауди бихьили, гьар бархIи тренировкаби дурадуркIнили сари спортсментани гIяхIти хIясилти чедиахъутира. 15 дусличивра имцIали тренерли узули, И.Хидирбековли гIяхIцад чемпионти абикьурли сай. Илдала лугIилизив сай ХIяжира.
ХIяжила бегIти Ахъушала районна Усишала шилизибадти саби. Чула цаванзалан, жагьси чемпион чедибдеш сархниличил мубаракварес ибси кьасличил «Усиша спорт» ибси жамигIятла цалабяхъла вакилтира Усишала шила бекI МяхIяммадсягIид ГIябдуллаевра ХIяжи Мажидовличил ва илала тренер Ибрагьим Хидировличил МяхIячкъалализиб гьунибаиб. Ил гьунибаъни «Усиша спорт»-ла сипталичибли бетерхурсири. Буралли, «Усиша спорт» жамигIятла цалабяхъ гIергъити дусмазиб сархибдешуначил гьалабяхI башули саби. Илала вакилтани шила гIямрулизир жигарчерти бутIакьяндеш диру, шила бекIли гIямрулизир детурхахъути программаби мурталра гIердурцу, арцла кумек гIеббиахъу.
ХIяжила разидеш нушанира барх буртIулра, ва илис гьаннала гIергъира сархибдешуни дулгулра!
П.Мирзаева
