Лавашала районна администрациялизив «Забота» бикIуси фондлис арцла шайчиб кумекбарибси предприниматель МуртазагIяли ГIяхIмадович муниципалитетла  бекI Мухтар ХалалмяхIяммадовличил  гьуниваиб.

Гьунибаънилизир бутIакьяндеш дариб: бекIла цаибил заместитель ГIябдусалам Дибировли ва районна депутатунала собраниела председатель Юсуп ГIялибековли.

МяхIяммадов МуртазагIяли ГIяхIмадович Хажалмахьила шилизивадси сай. Гьанна дусличибра имцIали районнизиб бузуси СВО-ла бутIакянчибала хъалибаргунас ва мискинти хъалибаргунас кумек гIеббиахъуси  «Забота» бикIуси гIяхIбаркьла фондлис илини арцла шайчиб кумекбирули сай.

«УркIила хьул хIясибли, нуни ил баркьуди дурабуркIулра. Дила пикрили, гьарилли чула имкан хIясибли, ил баркьудилизи пай кабихьес хIяжатли саби», —  викIи М.МяхIяммадов.

«Нушала чедибдешлизи халаси пай кабирхьнилис, МуртазагIяли ГIяхIмадовичлис баркалла. СВО-ла бутIакьянчибас ва илдала хъалибаргунас кумекбарни – ишбархIила манзиллизиб бекIлибиубсигъуна мисал саби», — викIи районна бекI.

ГьанбуршехIе, фондла сайтличирти реквизитуни яра QR-кодла ссылка хIясибли, дигусини фондлизи арц дархьес вирар.

Лавашала районна руководстволи меценатлис халаси баркалла балахъули саби. ЦархIилти предпринимательти-бизнесментира  МуртазагIяли МяхIяммадовлизибад гIибрат касахъес жибирули саби.

Лавашала районна администрацияла пресс-служба