Дагъиста тарихлизи муртлисалра каберхурси анцIбукь сабри ГIяякьакьализибси дергъ, сунезибра саби-гIяхIъулатала гIярмия, кьуватти ярагъличил бегIбиубти азирцад адам лебси. Ил даргала шимазибад цалабикибти, ханжулти ахIи, цархIил ярагъ дебали камти партизантала отрядли тIутIубарибсири. СССР-ла мер-мусаличиб кабикибси граждан дергъла анцIбукьуназибад бегIлара цIакьсилизи халбируси дергъ саби ил.
… 1919 ибил дусла августла 17-личив генерал М. Халилов дубурла шимала ва округунала бургачи дугьаизурсири большевикуначи къаршили дурабухъахъес или. Илини тIалаббирулри гьарил округлизибад азирличибад кIел азирличи бикайчи сунес кумеклис адамти бархьахъес. Ил буйрухъ таманхIебарибти шимала халкьлис урехи чебиахъули, Дагъиста цацадехIти шимази ва шагьуртази къазакъунала, ярагъли бегIбиубти даршал адам сунези кабурхути отрядуни кадатур.
Деникинна бургъанти шимикад башулри ва халкьлизирад палтар, берк-бержла продуктуни дурчулри, чула ибси хIебирути кабуршулри, чебяхIкайхъулри, бержили, кепкабиубли, халкьличиб чебдукарбирхIес балбилзулри, цацахIели хъали-цIа цIали игулри. ЦIали дигуб Дургелила ва Къадарла шими. ЦархIилтасра илгъуна бирехIе или урехи чебаахъиб.
Амма дубурла шимала халкь мутIигIбикIули ахIенри. ИлхIели Деникинни буйрухъбариб гьар шилизибад сунес кумеклис 20 адам, илдас урчи ва берк-берж дучахъес.
Илгъуна тIалаб бартаахъес хIейгути халкьла бегIлара халаси къакъбяхъли бетаур большевикуни. ИтхIели Северный Кавказлизиб революцияла баркьуди чедибикахънилис жавабкардеш дихути С.М.Киров ва А.И.Микоян Дагъиста большевикуначи дугьабизур «Саби гIяхIъулатала гIярмиялис» къаршидеш дирниличи хIядурдеш барахъес ибси тиладиличил.
АрагIебли Дагъистайзиб Деникиничи къаршиси дявиличи хIядурдеш бехIбихьиб. Ил хIядурдеш хаслира жигарли бетурхулри Даргала шимазиб. ГIусман ГIусмановли ва Рабадан Нуровли даргала шимала вакилти бучиб ЦIудхъурла шила мякьлаб. Душманти шакхIебикахъес багьандан цалабикибтири бархIехъ, мажлис бухъянбитIун шаладикайчи. ХIукму бариб лерилра шими цадиахъубли, партизантала отряд бучес, цIубабани уцили, Лавашав тIашаибси Ахъушан ГIяли-ХIяжи ватаахъес.
Чумал бархIила гIергъи ярагълабиубси даргала отряд Лаваша бакIиб, Деникинна бургъантачи чебухъи, Ахъушан ГIяли-ХIяжи ваткаахъиб, кабушибти, бяхъибтала дурабад, гIяхIцад душманти ясирбуциб. Ил хабарли Деникин дебали гIясивиахъуб.
Илини ДешлахIярличиб хIядурдеш бехIбихьиб, сагали Лавашала шиличи чябхъинбарес или.
Большевикунани илдала кьасаначила багьур, Лавашаб оборонала штаб акIахъуб, илис бекIдеш дарахъес Ахъушан ГIяли-ХIяжи викIиб.
Ил штабли къалабали хIянчи бехIбихьиб, сенахIенну дубурла шимас бургъанти бучахъес бедибси Деникинна буйрухъ бетерхахъес чебаахъибси замана кабурхулри, дубурлантас Деникинна шайчи кабизес дигули ахIенри, ил хIебаралли – халкьличи балагьуни хIерлири.
Генерал М. Халиловли Ахъушан ГIяли-ХIяжичи кагъар белкIун большевикуни гIебхIебуцахъес, чула шайчи кайзахъес или.
Ахъушан ГIяли-ХIяжини жаваб чарбатур: «Саби гIяхIъулатала гIярмия-декIар халкьли тиладибарили, Дагъиста халкьлис халаси гIяхIдеш хили бакIили ахIенну, хIушала шайчи кайзес сабаб чебиули ахIенра!»
Даргала округлизибси къаршидеш бячIес багьандан, Деникинни халати цIакьани хIядурдариб, чузирра 1000-цад шушка, пулеметуни, тупи, тупангуни лерти.
Оборонала штабли иличила багьур ва халкьличи дугьабизур: «Ил урехила цIакьличи къаршили лерилра цадиэс, чили се барес вирули виалра, дявилизиб кумекбарес!».
Даргала округла лерилра шимазиб ил жи уркIи-уркIилабад гIеббуциб. ЦIубабала зулмукардешли сабурлизибад бухъахъунти адамти штабла хъарбаркь бетерхахъес хIядурбиуб.
Августла 22-личиб ГIяякьакьализи Деникинна хIялумцIанти бакIиб, сунезибра 15 адам лебси. Дегвала шила мякьла абаибхIели, илди ясирбуциб ва Лавашабси штаблизи киб. Илдазибад багьур полковник Лавровла гIяскарли ГIяякьакьализибад лаг дурабухъи, Лавашала ши буцес, штаб тIутIубарес, гIур цахIнабли Дарга мутIигIбарес пикрибарили биъниличила. Штабла хIукму хIясибли ГIяякьакьа-алавти дубуртачи партизанти учибиркесбяхIиб.
Августла 23-личиб савли 6:00 сягIятличиб полковник Лавровла отряд ГIяякьакьализибад лагбяхIли гьайбиуб. Илдазир лерри дахъал ярагъ, 28 пулемет ва 6 туп.
Лавровла гIяскар Дегвала шила мякьла абаибхIели, бяхIла хъарличирад илдачи цIа чекьур. ГIяскар тамай бухIнаберхурли, чула ваяхI чедихьибти уркри гьардакIибхIели ахъти мераначибад илдачира иртесбяхIиб.
Лавровли аргъиб сунес я гьалабяхI, я гIелабяхI гьуни агни. Дяви бархIиахъайчи даимбиуб. Деникинна бахъал бургъанти кабушиб, амма партизанталара къяяни камдиуб.
Дугели дяви тIашбизур. Лавровли гьар шайчи къараулти кабатур, илди дуги беркIес хIядурбиуб.
Илабси дявиличила аргъили, Даргала лерилра шимазибад кумеклис адамти музабулхъесбяхIиб. Хьунул адамти ва бара халабаибти дурхIни булан бакIиб. Илданира кумекбирулри: ярагъ гъамдирулри, беркеси балкьарахъулри.
БархIехъ кьанни бакIиб Лавашабад Рабадан Нуров, ГIусман ГIусманов ва штабла цархIилти членти.
Августла 24-личиб савли, аргъ бара шалабиубмадан дяви сагали бехIбихьиб. ЦIубабала ярагъ цIакьлири, дахъалри, ва хIунтIена партизантас ярагъла шайчиб илдачи абикес имкан аги. ХIунтIена партизантала Дагъистайчи диги, халкьлис мардеш, зулмукар душмайчи гьими цIакьдикIулри. Душманти алавбуцилри, илдас цалра шайчибад батбухъес гьуни хIегес сабри партизантала кьас.
ГIергъиси бархIи хIябал сягIят дикибхIейс, хIярхIуби кадерхур. Илдани хабар аргъиб Лавровлис кумеклис Деникинни сагати цIакьани дархьили диъниличила. ГIур бареси аги – някъбазир ханжултачил «Детахъирая, душманти, нушала ванзаличирад!» или вявбикIули, кIел азирцад адам бяхIяназибад катхIел кабухъун.
Някъ-някъли цIакьси дяви бемжур. Илгъуна урехиагардешличи хIерти ахIенти цIубаби, илди чебаибхIели уркIбухъири. Ярагъ дархьдатурли, мурдали ва хьурали ДешлахIярлизибяхI гьаббухъун.
Полковник Лавров ва илала азирцад бургъан кабушили, пулеметуни, тупи, тупангуни дуцили, хIунтIена партизанти ДешлахIярлизи бухIнаберхур ва илди мер-мусара азаддатахъур. Душмантас чула ярагълизибад саби алхес кьадарли уббухъун. Амма хIунтIена партизантала детахълумира камти ахIенри. Ца МикIхIила шилизибадцун 62 адам алхунтири.
Даргала партизанти кIел бутIаличи бутIиб, цабехIти гьайбиуб Темир-хан-ШурализибяхI, цархIилти – Дербентла шайчи. Сентябрьла 6-личиб Дербент шагьар цIубабазибад азадбатахъес багьандан дяви бехIбихьиб. Даргала партизантачил бархбикиб бахъал цархIилтира. Илдала лугIи 10 азирличи абикиб. Илдазибад хIябал бутIала ца бутIацад урусла миллатла адамти сабри.
Сентябрь, октябрь бузразир Дербентла ва Темир-хан-Шурала шайчир цIакьти дявти демжур. Гьар мерличиб хIунтIена партизанти халкьли гIеббурцутири, ярагълис арц, берк-берж, ванати палтар дурчутири, мурул адамти бургъантала къяянази кабурхутири.
…1920-ибил дусла мартла 30-чиб хIунтIена партизантани Порт-Петровск азадбатахъур. Апрельла 2-личиб С.Орджоникидзени Москвализи багьахъур Деникинна цIубабазибад Дагъистан тамай азадбатахъурли саби или.
Ил чедибдешлис бехIбихьуд биалли кабихьибсири ГIяякьакьализибадси дявили, суненира муртлисалра Дагъиста тарихлизи кадерхахъурти гъабзадеш ва чIумадеш, чула дубуртар ВатIайчи диги ва халкь багьанданти жавабкардеш Ахъушан ГIяли-ХIяжила, Жалалутдин Къоркъмасовла, ГIусман ГIусмановла, Рабадан Нуровла, ХIямид ТIалхIятла, СултIан-СягIид Казбековла, ГIялибег Багъатировла, Борис Шеболдаевла, Муса Къарабудагъовла, Владимир Гавриленкола, Муслим Атаевла, Сафар Дударовла ва цархIилтира гIяхIгъубзнала.
Нушала чебла – илдачила хъумхIертес ва чеалкIути наслубази балахъес!
ХIядурбарибси – П.Маллаева (Баянти профессор ГIядил-Герей ХIяжиевла жузлизирад касибти сари)
