Гьайгьайрагу, нушала улка Дагъиста гIядатла уршбала гъабзадешличи ва игитдешличи пахрули бицIили саби. ХIера, СВО бехIбихьибла, 12 эсил дагъистанлан Россияла Игитла уличи лайикьикиб. РФ-ла Президент В.Путинна ХIукму хIясибли, ишди бурхIназиб, СВО-ла бутIакьянчи Муслим Муслимовлис илгъуна чебяхIси даражала у бедиб.
Гьаркьятала къяйлизи кайзурси М.Муслимовли, дявила хъарбаркь таманбарес дураухъунхIели, душмай Россияла бургъантачи хIярхIуби челкьуси пост мягIлумбариб ва ил агарбарес цIакьани дяхIчиаиб. ХIярхIубала цIа чекьурли, илини миллатчиби къирбариб ва Украинала къачагъунани дуцибти позицияби азаддалтахънила дявилис бекIдеш дариб.
Дагъиста багьадурла дявила устадешла гIяхIдешличибли Россияла бургъантас дахъал детахълуми хIедиахъубли, душма оборона къяббердес, илкьяйдали миллатчибицунра ахIи, илдала техника буланра агардарес имканбакIиб.
Муслим Муслимов акIубси сай 1998 ибил дуслизив Рутулла районна Рутулла шилизив. 2022 ибил дусла мартличирад илини СВО-лизир бутIакьяндеш дирули сай. Украинализиб бетурхуси Россияла дявила хасси балбуцлизир илала узинира бутIакьяндеш дирутири, сепайда илала жагьти гIямру душма хIярхIяли къябдердахъиб. Узи вебкIили гIергъи, Муслимли офицерла курсани тамандариб ва офицер ветаур.
2023 ибил дусла июньничиб М.Муслимовличи игьдибар бихьили, ротала бутIала командирла къуллукъуни хъардариб. Байхъала дусла бухIнаб пагьмучевси командирлис лейтенантла у бедиб ва арагIебли ротала командир вариб.
2024 ибил дусла мартличиб М.Муслимовла бекIдешлиубси мотортачилти ярагълизибад къяйкбикIутала ротали ца базла духIнар душма гIяскуртала 8 пункт агардариб. Иличибли офицер дявила шабагъатличи лайикьикиб.
Муслим Муслимовлис Россияла оборонала шайчивси министр Андрей Белоусовли «Мургьила Зубари» медаль бедиб.
Буралли, ВатIан балтахъан М.Муслимов гъабзадеш багьандан гьалавра шабагъатлаварибсири.
ВатIайчи диги ва гъабзадеш дубурлантала хIилизир лерти къиликъуни сари. Дагъистанлантани игитлати гьунарти дурадуркIутири ва гьаннара дурадуркIули сари. Иличибли декIарбулхъути саби Дубуртар Улкала асилти гъубзни.
П.Мирзаева
