— Дебали гIяхIси дарган адам тев кьалли, ХIяжимурад, МяхIячкъалала цаибил поликлиникализив къарауй узули, — рикIар кIел жумягI гьалар набчил рарх газетала редакциялизир рузуси ПатIимат Мирзаева. – Дила пикрили, ил хIушала районнизивадси сай.
Илини буруси цархIилти барх бузути рурсбанира гIеббуциб: «ГIе, гIе, Дахадаевла районна сай. Бурес хIейэсли гIяхIси адамра сай. Поликлиникализи дугьабилзутазив илини кумек хIебарибси адам хIергар»….
Газетала бекI редакторли, набчи дугьаризурли, хъарбариб: «Гьари, ХIяжимурад, хIу поликлиникала мякьлав сайрину хIерируси, ца бархIи ила вякьи, ил пергер адамличила ца гIяхIси макьала белкIен».
Нура ил поликлиникализи вашусира ва илавси къарауйчил къаршивиркусира. Барх бузути хIянчизарти чичила-сабил гъайбикIути нуни бусягIят багьурра. Чуйнара кумекбарибси саби илини набра. Чуйнара, ну къяйцIхIевхъахъи, наб гIягIниси тухтур чидил кабинетлизив вирусил ва хIянчилав левал буриб. Чуйнара наб кьадин хIила анализлис гIягIниси талон касиб, цацахIели — илини наб кьадин тухтурличи яргара бурцу …
Савли ну поликлиникализи дакIуухъасли, набчивра гьалаикили, «ВелхIунрив, ацци» или дугьаилзан. Ил багьандан бурги набра ил адам Дахадаевла районна Уркухъла шилизивадси ургар или гьанбикибсира.
ХIера, ишди бурхIназив, иличил ихтилатбарес кьасли, хIерила гIергъи ну поликлиникализив вагьариубра. АцIира цаибил дерхIла жаняхIлизи. Ил мурталраван, зягIиптани алавуцили, илав вируси сай. Иш яргалис чехIеибхIели, кIиибил яра хIябъибил дерхIличив ургар или, балутази хьарикIули, ну ИбрагьимлигIив къяйцIухъунра. ГIе, Ибрагьим саби илала у.
Гьари, жагIял лявкьяс викIули, поликникализивад дуравхъунси нуни Ибрагьим больницала азбарлизибси скамейкаличи сайцун кайили варгира: камси бамсриахъес дураухъи виэс гIягIнилири. Наб гIягIниси адам сайцун варгниличи ну дебали разивикира ва иличи гъамиубра. Саламра бедили, се мурадли ну сунечи вакIибсирал бурулра. «Ягъари, ацци, се бируси къарауйчила газетализи белкIи? Тухтуртачила белкIенгу», — викIар ил. Ну чи саялра бурили ва нушала хIянчилаб бетаурси ихтилат гьанбушили, бикIуливан, маслигIятбарили, нуни ил сунечила ца-чумал баян дурахъес кьабуликахъира.
Ил Дахадаевла районнизивадси сай дикIути нуша хатIадикилри. Ибрагьим Кьурбанович Ибрагьимов акIубси сай 1972 ибил дусла октябрьла 15-личив Каспийск шагьарлизив. Илала дудеш цIудхъран уилри, неш – къадарлан. Илини Сагаси Хушетлизиб урга даражала школа таманаибси саби. 1990 ибил дуслизив ил гIярмиялизиб къуллукъбарес арякьун. ГIярмиялизив илини къуллукъбирулри космодром Байконурличирти дигIянти гIяскуртазиб.
Илала дудеш Кьурбан букIун вирусири, ва гIярмиялизивад чарухъунси Ибрагьим гIяхIцадхIи дудешлис маза адилкьес кумекбирули калун.
1997 ибил дуслизив Ибрагьим Кьурбанов УФСИН-низив (гIяйибла бегIти танбихIлабирути духIнарти цIакьанала Управление) Сагаси Тюбе посёлоклизибси адам бузериличивли гIяхIулхъахънила верхIъибил колониялизив (исправительная колония №7) узес вехIихьиб. Ил илав 2003-ибил дусличи бикайчи узули калун.
— Мурт вехIихьибсири хIу къарауй узес? – хьарбаира нуни Ибрагьим Кьурбановичлизи.
— Ну пачалихъла ахъси даражала органтазиб къарауй узес вехIихьибсира, — чарбариб илини жаваб.
— Халати жавабкардеш дихуси хIянчигу ил! – викIулра ну Ибрагьимлизи.
— ХIу викIуси бархьси саби, ХIяжимурад-ацци. Или биалра, 2003-2006-ибти дусмазиб нуни ил хIянчи бузахъули вираси. ГIур чарухъунра ППС-2-лизи. Ну илав пенсияличи арукьяйчи узаси. БусягIятла замана ЧОО-лизив (частная охранная организация) узулра, 2019 ибил дусличивад МяхIячкъалала цаибил поликниликала къараул сайра.
— ХIела къуллукъличиб се бирес хъарси?
— БегIлара гьалаб набчи поликлиникализир низам-кьяйда гIердурцниличи хIеруди бузахъес хъарси саби, — чIумали буриб Ибрагьимли. – Нуни иш юртла духIнар кадиркути лерилра аги-кьяйдалис жавабкардеш дихути сари. ЗягIиптас бируси кумек дила уркIила хIяй набзи иткъи бирахъуси хIянчи саби.
— Се хъалибарг леба хIела? – хьарикIулра ну илизи ахирличив.
— Дила леб 2 рурсира, илдала — 7 биштIатира.
— Мурталра адамтас кумекбарес гьалакси хIед, Ибрагьим, халаси баркалла. Арали калаб хIела дигуси хъалибаргра.
— ХIедра баркалла, — викIар ил, дила някъ цIацIабирули.
Ибрагьимра нура ихтилатдикIуси байхъала сягIятла замана бахъал адамти дугьабизур иличи. ЗягIипти, илис саламра гили, шулумбулхъулри, поликлиникализиб бузутала илизи хьархъардиути дахъал лерри. Сунела хIянчиличив дебали валикибси адам уилри Ибрагьим. Нушачиб илгъуна адамлис «сунела мерличив сай» бикIар.
ХIяжимурад Ражабов
