Ишди бурхIназиб Ахъушала районна администрацияла актовый зализиб СВО-лизибад заманалис хъули бархьибти ХIяжимурад ва Шамил ГIябдурашидовхъалачил гьунибаъни бетерхур.
Гьунибаънилизир бутIакьяндеш дариб Ахъушала районна администрацияла бекI МяхIяч ГIябдулкаримовли, илала заместительти МяхIяммад ИсмягIиловли, Шамил ХIяжигIялиевли, районна депутатунала Собраниела председатель СягIид ХIяжигIялиевли, военкоматла хIянчизартани, шимала бургани, учреждениебала, организациябала руководительтани ва жавабла хIянчизартани.
Гьунибаъниличиб МяхIяч ГIябдулкаримовли СВО-ла бутIакьянчибас дедлугути арцличила, илдала хъалибаргунас бируси кумекличила буриб.
«Дагъистан Республикала БекI Сергей Меликовла хъарбаркь хIясибли вягIда бигьи СВО-лизи аркьути бургъантас Дагъиста регионни дедлугути арцла кьадар 500 азир къурушличи абикахъили саби. Ахъушала районнизибад аркьутас 2024 ибил дусла июньна цаличибад бедлугуси арцла кьадар ишгъуна бетарули саби: 500 азир къуруш Дагъистан Республикала шайзирад, 195 азир къуруш федеральный бюджетлизирад, 300 азир къуруш районна шайзирад. Илди 300 азир къурушлизирад 100 азир къуруш сари районна бюджетлизирадти, 200 азир къуруш – бюджетла дурарти фонданазирадти. Илдала дурабад вягIда бигьунтас 204 азир къурушла алапара лебси саби.
Муниципалитетли СВО-ла бутIакьянчибас хъулри дарахъес ванзара бедлугуси саби, пайдалахIебарили акьуси ванза лебти шимазиб. СВО-ла бутIакьянчибани чули ванза асили биалли, хъулри дирухIели кумеклис къаркъа дедахъес багьандан къаркъубала карьертала бегIтачил вягIдара лебси саби нушани барили.
СВО-лизи арбякьунтала дурхIни биштIати дурхIнала анхълизи, школализи бурцухIели илди ярга агарли ва илаб бедлугуси арцла кьадар хIебедахъили кьабулбирути саби.
Нушала районнизибад арбякьунти бургъанти гъабзадешличил бургъули саби. Администрацияла шайзибад нушани диубсигъуна кумекличил гIеббурцехIе бургъанти ва илдала хъалибаргуни», – буриб МяхIяч Кьадиевичли.
СВО-ла бутIакьянчиби Шамил ва ХIяжимурад ГIябдурашидовхъаласра халаси баркалла багьахъур ВатIайс къуллукъбирули, улкала челябкьла паргъатси биахъес багьандан, гъабзадешличил бургъути.
Районна бекIли илдас Баркалалла кагъуртира дедиб.
Сабият ГIябдуллаева
