Ну мурталра халаси иштяхIличил ва дигиличил лехIирхъусири Дахадаевла районна Зилбачила шилизирадси СайхIят Каримовала далуйтачи, ил набзи рурулицун ралуси риалра. 2020-ибил дуслизир риалли, гъамли тянишриубра иличил, гьанна нуша-ургав агарси дила узила юбилейличир къаршидикибхIели. Дила узи Рабазан Маллаевич – «ЦахIнабси багьудила хIурматла хIянчизар», «Бузерила ветеран» — ил шилизив 1977 ибил дусличивад учительли узули калунсири.
Юбилейла байрам школала коллективли ахъси даражаличиб дураберкIили гьанбиркур. ХIянчизартала кьукьялис бекIдеш дируси СайхIят Ацциевна малхIямси, сунечи лехIирхъес иштяхIдухъеси, хIялалси уркIила регI рири. Ил пагьмучерси педагогра сарри, организаторла хIянчира ункъли бали. Сунела жагаси тIамаличил илини далдуцуни устадешличил къелгIердики.
Школала уржибси ва цабалгунси коллективли дила дагьрилизир шалатицун пикруми калахъун. Ну кьисматлис баркалла рикIулра дила узи илгъуна кьукьялизи викнилис. Илис сунела санигIятра бархкьябира дигахъи. Амма, сецад хIейгеси биалра, узи хапли зягIипикиб ва ахиратлизи арякьун.
Ишдус къукъу-рямкьван вайси хабар иргъулра – СайхIят ребкIнила… Ил гIямрулизирад аррякьун жагали ва хIурматчерли…
Каримовхъала хъалибаргла децI гIяхIил иргъулра нуни, амма халаси децI аргъахъести дугьби даргес къиянни саби. Нура хIушачил рарх децIлизирра, ахIерти ЦIибац ва Аминат. ХIушаб сабур габ, илцад халаси бетахъри чекасес багьандан. СайхIян гьалжанала агьлула рараб
ДалайрикIен, ва СайхIят,
ХIела къугъал тIамали,
РикIуси ну ратурли,
Шиниша хIеваличил
ХIу чина аррякьунри?
Юбилейла замана
ХIуни барибси хIурмат,
РучIули далуйтани,
Дила узила хъулир
Хъумартес хIерирулра,
Дила зилбукан СайхIят…
Лебилра районна халкь
Тамай хIяйранбарибси…
ДалайрикIесцун ахIи,
Делхълара хIу устари,
Ва Каримхъалла СайхIят…
Шурмазиб къакъбалаван
КъатIлизиб тIама ахъси,
Марлира гIянцIдиубу…?
ГIур нушани хIергъехIе,
Дила мугIяллим СайхIят.
ЧеалкIуси наслулис
Патриот бяркъ бедибси,
ГIямру шаладарибси
ГIилмула гIиниз сарри,
Дила мугIяллим СайхIят
Мекъличир хIу далайчи,
Ясличир хIу чIиллайчи,
Узи-урши, ши-шанти,
ГIяхIли кален хIеили
Даимлис бархьбатурри.
Хапли, хабарагарли,
Кахси изай руцибси,
Рахъ жявли нушачирад
Сарригу аррякьунси,
Ва Каримхъалла СайхIят…
Далайла-делхъла уста
Пагьмучерси мугIяллим
УркIи умуси инсан,
Русен, ахIерси, гьанна
ХIу муснаур паргъатли.
Дурхъал баз, дурхъал бархIи
Аллагьли аррукибси,
Хьурариабигу хIу
Гьалжанала анхълизи,
Зилбукан дила СайхIят…
ГIяшура Кьурбанова, бузерила ветеран
