Иш белкI, Дагъиста, Россияла, дунъяла гIялимтани хIурматбируси, нушала халкьла ургав машгьурси, амма халаверхни-хамдеш агарси, хIялалси, адабчевси гIялимличила, даргала миллатла асилси урши – Ахъай Кьурбанович Муртазаевличила саби.

Илини, гьанна верхIел дус, Россияла Федерацияла гIилмуртала академиялизи кабурхуси Дагъистайзибси гIилмула ва хIялумцIуси центрлис бекIдеш дирули сай. ГIилмула центрлизи Х.И.Амирхановла уличилси Физикала,  Каспи урхьула биологияла сурсатунала, Тарихла, археологияла, этнографияла, ХI.ЦIадасала уличилси Литературала, искусствола, Социальный бяхIчибизла ва экономикала хIялумцIути институтуни, Дубурла ботаникала анхъ, Этнополитикала хIялумцIуси центр кадурхули сари. Лерилра илди гIилмуртала гIевдухьуни цаладяхъес, илдала бузери сурсатуначил гIеббуцес, арзес чараагарти гIилмула масъулти илдала гьала тIашдатес ва гIялимти сархибдешуначил бузахъес Ахъай Кьурбановичли халаси хIяракат бирули сай.

Интернетлизир Ахъай Кьурбановичличила дахъал баянти агара. Ил, чинавалра, гьачамалра сунечила гапикIули ахIен.

Ахъай Кьурбанович, наб багьес къиянбухъунси, физикала гIилму бяркъурси гIялим сай. Физикала гIилмули нуша-алавти тIабигIятлизир кадиркути лерилра анцIбукьуни руркъути сари. Ахъай Муртазаевли газ шинкIадеш бетарухIели (конденсированного состояния), макьлатIисли (магнетизм) дитIикIухIели декIар-декIарти секIайчил физикализир детарути дарсдешуни руркъули сай, математикализир кадизахъурти, дебали чедетаибти лугIурбачил, хасти кьяйдуртачил (формулабачил), кадиркути дарсдешуни баяндирули сай.

Ахъай Кьурбановичла гIилмула хIянчурбазир дагьардирули сари дарган мезличи шурдатес хIейрути, урус мезличилра аргъес къиянти дугьби ва мягIнаби: (метод Монте-Карло, алгоритм Ванга-Ландау, двумерная модель Поттса, гексагональная решётка, антиферромагнитные взаимодействия, фрустрация). Илдира, гIуррара дахъал цархIилтира, физикала гIилмулизир къаршидиркути, гIядатла адамтас сихIрула сартиван гьанарути, дугьбани баяндирули сари, гIилмулизирти Ахъай Кьурбановичла сархибдешуни. Илди хIянчурбазирти математикала ва физикала хасти кьяйдуртани (формулабани) гIядатла адам тамашавиахъубли уркIиу.

Ахъай Кьурбанович, физикала гIилмулизив, макьлатIисла асурти (магнетизм), ца журала секIал итил жураличи шурбулхъни (фазовые переходы), мисаллис буралли шиннизибад миъ, дирихь бетаэс бирни, мегьра бицIни, ца секIайзибад цархIил секIал алкIухIели дакIудирути дарсдешуни (критические явления), илдигъунти тIабигIятлизир кадиркути, яра гIялимтани далдурцути асуртачирли дакIудирути дарсдешуни руркъуси санигIятличил вегIиубси (специалист) сай, ил шалилизив Россияла ва дунъяла гIялимтани марварибси, халати сархибдешуначилси гIялим, гIилмуртала доктор, профессор сай.

Ахъай Кьурбанович 1978 ибил дуслизив ДГУ-ла физикала факультетлизи учIес керхур. Илис гIилмулизи гьуни гьаргли саби, бикIутири итхIели илала преподавательти. ДГУ-лизиб белчIуди хъараахъурли, илини Ленинградла университетлизиб, аспирантурализиб белчIуди даимбариб ва 1987 ибил дуслизиб гIилмуртала кандидатла, 1999 ибил дуслизиб гIилмуртала докторла диссертацияби кадизахъур.

1987 ибил дуслизив ДГУ-лизив информатикала ва вычислительная физикала кафедрализив ассистентли узес вехIихьиб. Илав гьаланачи преподаватель, доцент, гIур профессор ветаур. Гьанна бусягIятра сунела багьудлуми студентунас дуртIули узули сай. Илала бекIдешлиуб 10 аспирант гIилмуртала кандидатуни бетаур, бахъли гIилмула магистрла хIянчурбира детерхахъур.

1999 ибил дуслизив, гIилмуртала докторла у сархили гIергъи, РАН-ла ДФИЦ-ла Х.И.Амирхановла уличилси Физикала институтла лугIурбала (вычислительная) физикала ва цализибад цархIил секIал бетарахъуси (фазовые переходы) лабораториялис бекIдеш дирес вехIихьиб. Гьаннара ил лабораториялис бекIдеш дирули сай. Илди, Россияла югла шайчир бегIла гьалар акIахъубти, бегIлара халати, физикала гIилму руркъути институт ва лаборатория сарри, гьаннара илдигъунтили кавлули сари.

Ахъай Муртазаев 1996-1999-ибти дусмазив, жагьти гIялимтала ургар дурадеркIибти, РАН-ла конкурсуначив чедиикибсири. Гьаб-гIергъили авна – 2004-2007-ибти дусмазив улкала гIилму гIеббурцуси фондла конкурсуначив чедиикибсири ва РАН-ла чеввикIибси гIилмуртала доктор ветаурсири.

Илини, 1996 ибил дусличивад вехIихьили, 90 гIилмула конкурсла грант сархили сай, 20 грант, сунела бекIдешлиур сархили ва детерхахъурли сай.

Жагьси гIялимли вирухIели, гIур гIилмуртала доктор ветаурхIелира, Ахъай Муртазаевли Россиялизир ва дурала улкназир детурхути гIилмула конференциябачир бутIакьяндеш дирутири. Бурибти гIялимти, академикуни иличи пикриличил лехIирхъутири. Ахъай Кьурбанович сунени дурадеркIибти, гьарли-марти хIялумцIлабачила, илдазирад дурасибти баянтачила гъайвикIусири. Илини сунела цIакьани физикала гIилмулис харждирулри.

Иличибли сархиб халаси чедибдешра. 2008-ибил дуслизив Ахъай Кьурбанович Муртазаев Россияла гIилмуртала академияла член-корреспондентли викIиб. Северный Кавказла округлизив кIиибил адам сайри илгъуна уличи лайикьикибси.  Ахъай Кьурбанович илхIели 47 дус виублири.

«ИтхIели, аэропортлизиб дам-дядличил гIялимличил гьунибаэс мухIенти хIядурбикIулри. Ахъай Кьурбанович биалли, сай чарулхъниличила чизилра хIебагьахъурли, такси буцили, шилизи сунела бегIтачи вакIиб, илдачил сунела разидеш бутIиб», — иличила бурули сари Ахъушала районна газетала бекI редактор П.Маллаевани.

Ахъай Кьурбанович 2004-2014-ибти дусмазив РАН-ла ДНЦ-ла президиумла председательла заместитель сайри. 2014-2016-ибти дусмазир Х.И.Амирхановла уличилси Физикала институтла директорла къуллукъуни заманалис дузахъули калун, гIур 2016-2017-ибти дусмазив ил институтла директорли викIиб.

2017 ибил дуслизив, бахъал ил къуллукъличи кабиэс дигутазивад чеввикIили, Россияла гIилмуртала академияла Дагъистайзибси гIилмула центрла директорли викIиб. ИшбархIира, лерилра гIяхIтира вайтира бекIдирули, чедибдешличил ил къуллукъ бузахъули сай.

Гьанна бусягIят РАН-ла ДФИЦ-лизир 39 бяхIчибизлизир хIялумцIлаби дурадуркIули сари. ГIялимтани чучи хъардарибти 120 масъалала черкад ахтардлуми дурадуркIули сари, илдазирад дайхъала нушала регионнизир арзес чараагарти масъулти сари. ГIилмула центрлизиб 700 адам бузули саби, илдазибадли 370 гIялимти саби. Лебилра бузутазибад 25 процентла кьадарлизиб жагьти адамти саби.

Секьяйда бажардииркули Ахъай Кьурбанович, гьар секIайчила саби-бегIси пикри лебти, дебали духути адамтала – гIялимтала коллективлис бекIдеш дарес?

Илини коллективла ургар далдикибти хIял-тIабигIят кадилзахъули, гIялимти ахIерабирули, илдала сархибдешуни диахъес къайгъибирули, дахъал цIакьани харждирули сай. «Энштейн нушачив узес хIейри. Илис, нушала гIялимтазибад тIалаббируси бузери бекIбарес къиянбулхъи. ГIялимтала бузери журналтази кадяхъибти белкIаначил кьиматлабирни бархьси ахIен, илдани дахъал отчётуни дирули, барибси хIянчи чебаахъес печатьлизи кабирхъули, халаси замана харжбирули саби. ГIялимти, чула гьала тIашдатурти масъултачила пикрибикIули, гIилмулизиб бузалли, сархибдешуни дирути сари. ГIилмулизиб гьалакли, гьачамли селра барес вируси ахIен, я журналтази кадяхъибти статьябаницун гIилму гьалабяхI архIеку», — викIули сай Ахъай Кьурбанович.

ГIергъиси замана гIилмулис декIардирути сурсатуни алапара, бекIахъудила харжанира диалра, жагьилти гIилмулизи битIакIес халаси хIянчи бирули сай. Лерилра сурсатуни пайдаладарили, гIилмула центрла хьулчиличиб аспирантура абхьили саби. Иличибли, аспирантурализиб 42 жагьил (очно) бучIахъес имканти акIубли сари.

Илини, регионнизиб бузули лебси, ургабил журала алапала кьадарличибра, кIинали имцIабарибси алапа гIялимтас бедести имканти даргили сай.

Бузериличил дархли, Ахъай Кьурбановичли Дагъиста бурибти гIялимтани дузахъути гIяхIти гIядатунира даимдирули сай. 1984 ибил дусличирад дехIдихьили, Физикала институтлизир, кIел дусли гьачам, гIилмула ва устадешла (практикала) конференцияби дурадуркIутири. Конференциябачи СССР-ла, улка бехъубли гIергъи, Россияла, дурала улкнала гIялимти жибирутири. Илар гIилмулизир диахъубти сархибдешуначила докладуни дирутири, Ахъай Кьурбановичли бекIдеш дируси, Х.И.Амирхановла уличилси Физикала институтла лабораториялизир хIялумцIлаби дурадуркIутири, чула устадеш лебтазилра чебиахъусири.

Илдигъунти гIилмула конференцияби дурадеркIибтири 2017-19-21-23-ибти дусмазир, РАН-ла Дагъистайзибси гIилмула центрлис Ахъай Кьурбановичли гьуни чебиахъухIелира.

2023 ибил дусла сентябрьличиб дураберкIибси, халкьани-ургабси, «Фазовые переходы, критические нелинейные явления в конденсированных средах» бикIуси конференция Россияла гIилмуртала академия 300 дус биънилис багъишлабарибсири. Конференцияличи Россияла, СНГ-ла, дурала улкнала гIялимти цалабикиб, ил ибхьухIели гъайулхъули, Ахъай Кьурбановичли Дагъистайзир детерхурти конференциябала тарихла бяхIяни гьаргдариб, илкьяйда цалабиркули, гIилмулизиб бузес имканти даргниличил гIялимти мубаракбариб.

Конференцияличи бакIибти гIялимти Каспи урхьула дублабси «Журавли» бикIуси, гIилмула ва арадеш къулайбируси комплекслизиб мерлабариб, илдала бузерилис ва бамсриихънилис къулайти шуртIри гIердуциб. Бетерхахъур, гIилмулайчил барх, культурала программара. ГIялимтани Дагъиста дубуртала жагати мер-мусаличи шадибгьундури дурадеркIиб. Гьайгьайра илдала уркIбазир Дагъистайчи дигила хIялани акIуб.

Илкьяйдали ишдусла февральла 13-личир Дагъиста гIилмула центрлизир Россияла гIилмуртала академия 300 дус биъниличил дархдасунти шадлихъла далдуцуни детерхур. Республикала Правительствола БекI ГI.ГIябдулмуслимовли 18 гIялимлис шабагъатуни дедиб ва Ахъай Кьурбанович Муртазаевли РАН-ла Дагъистайзибси гIилмула ва хIялумцIлаби дурадуркIуси центрлизиб гIилму гьалабяхI арбукес, жагьилти гIялимти гIилмулизи битIакIес, бузути гIялимтала сабухъчебдеш ахъси даражаличиб биахъес бируси халаси хIяракатличила буриб.

Ахъай Кьурбановичла бекIдешлиур, 20-личирра имцIали, гIилмула конференция дурадеркIили сари, илала Россиялизибра, СНГ-лизибра, дурала улкназибра, гьачамцун ахIи сунени гIяхIялдеш дарибти гIялимти-гIяхIли лебти саби. Илдачир конференцияби дурадуркIухIели, суненира бутIакьяндеш дирули вирар. Дурала мер-мусаличир детерхурти конференциябачив, гьанналаув, урчIемцIайчирра имцIали, докладуначил гъайухъи, сунела пикруми дурили сай.

Илини сунени хIядурдарибти 800-цад гIилмула хIянчи Россияла ва дурала улкнала гIилмула журналтази кадяхъили сай.

Ахъай Кьурбанович РАН-ла Дагъистайзибси гIилмула центрлизив гIялимтала Советла Председатель, ДГУ-ла ва ДГУ-ла физикала факультетла, гIилмула докторла диссертацияби кадилзахъуси, «Магнетизм»-ла секцияла, Россияла гIилмуртала академияла гIялимтала Советла ва Англияла физикала жамигIятла (обществола) член сай.

Ил, РФ-ла гIилмула ва багьудила Министерствола гIилмула–техникала шали баянбируси (эсперт) гIялим сай.

Республикала БекIла гIилмула ва багьудила Советла, гIилму сагадешуначил (научно-инновационное обеспечение) гIеббурцуси республикала Советла член сай.

Ахъай Кьурбанович Муртазаев 2007-ибил дусличивад Дагъистан Республикала, 2023 ибил дусличивад лебил Россияла гIилмуртала урибси (заслуженный деятель) хIяракатчи сай, 1999 ибил дуслизив Дагъистан Республикала Пачалихъла Советла, 2020-ибил дуслизив Россияла гIилмуртала ва багьудила Министерствола ХIурматла Грамоталичил шабагъатлаварили сай.

Ишдусла майла 27-личир, шадлихъла аги-хIяйзир, цахIнабси мажлисличир Ахъай Кьурбанович Муртазаевлис Россияла Федерацияла Президент В.В.Путинна Баркаллала кагъар ва Россияла гIилмуртала академия 300 дус биънилис хасбарибси юбилейла медаль дедиб.

Улкала Президентли бархьибси кагъарлизи белкIи саби:

ХIурматла Ахъай Кьурбанович!

Баркалла балахъулра ХIед Улкала гIилму гьалабяхI арбукнилизи кабихьибси халаси пай багьандан, дахъал дусмазибси ахъти сархибдешуначилси бузери багьандан ва Россияла гIилмуртала академия 300 дус биъниличил бархбасахъи.

Даргала миллатла багьуди, мез, культура гIердурцули илини бируси хIяракатличила даргантази буресра хIяжатдеш агара. Ишдус хIябэсил дус, дарган мез гIердурцули дурадеркIибти, бахъал даргантала бутIакьяндешличил детерхурти дарган мезла диктантуни — культурала шадлихъуни дурадуркIнила гьавкьяна Ахъай Кьурбанович Муртазаев сайри. МухIен Сагид ГIябдуллаевла гIилмула дякь гьатIира бягIу-гьарзабарили, Ахъай Муртазаев гьарил гIяхIси балбуцлизив даргантас гьалав вашули сай. Ил даргантала хъарихъра пахрура сай. Россияла ва Дагъиста гIялимтани сунечи игьдибар бихьибси ва чеввикIибси гIялим ва гьуни чебиахъан сай. Маша Аллагь.

Ахъай Кьурбанович Муртазаевлис, илала хъалибарглис, узи-уршилис, лебилра Дагъиста гIялимтасра чIумаси арадеш, гьарилра шайчирад гьарбизуни, гIилмулизир сархибдешуни, талихI ва баракат диубли дигулра.

Муъминат Хаттаева