Июльла 9-личив ДР-ла БекI Сергей Меликов бузерила архIяличил Сергокъалала районнизи вякьун.
Республикалис бекIдеш диранни районнизир чумал объект хIердариб, ВатIан балтахъули алхунти бургъантала хIурматбариб ва, июньна 23-личир кадикибти гьанагарти анцIбукьуни пикридарес багьандан, муниципалитетла активличилра гьуниваиб.
Регионна БекIли хIердарибти объектуназибад цали бетаур ишхIелла тIалабуначи балбикибси физкультурала-арадеш къулайбирнила комплекс. Ил тIашбатурси саби Сергокъалала 1-ибил школала хьулчиличиб. Гьанна сергокъалалантас спортлизи ахъес хIяжатти лерилра шуртIри лер. Шударшлим гъал учIаннис хасбарибси саби школара ириъ «Школала багьудила кабизлизир дарсдешуни кадерхахъни» бикIуси программа хIясибли лутIи-хьулчилизибадал къулайбарибси саби.
С.Меликовли буриливан, сагаси комплекслизиб спортлизи ахъес бирар школала бучIантицунра ахIи, шила халкьра.
КIинайс Дагъиста БекIли СВО-ла бутIакьянчи СултIан Ражабовлис хасбарибси гьанбикунала уркьули Сергокъалализиб ибхьнила балбуцлизирра бутIакьяндеш дариб. С.Ражабов МФЦ-лизив узусири, 2022 ибил ибил дуслизиб илини ВатIан батахъес дураухъес кьасбариб. Ишдусла февральличив ил, дявила къуллукъуни тамандирули, алхунсири. Илис хасбарибси гьанбикунала уркьули МяхIячкъалализибси МФЦ-ла юртличи баршибси саби, гьанна биалли, илгъуна леб Сергокъалала районнизибси дахъал шалубарси центрла юртлизибра.
«Нушала дагъистанланти, нушала сергокъалаланти – гьарли-марти ВатIан балтахъанти саби. СултIан Авдеевкала мякьларти мер-мусаличив алхунсири. Авдеевка биалли душмантазибад азадбатес хIяжатсири, даимти къяйк-къуйклизибад Донецк батахъес багьандан. Илар кьяркьти дявти кадиркулри, илди мер-муса акьудатахъес бирулри чула мурадуни-кьасани ункъли иргъутаницун. Сунела гIямру кьурбандарили, СултIай Донецклизиб гIяхIцад адамти берцахъиб», — викIи регионна БекI.
КIинайс алхунти бургъантала хIурматлис митинг дураберкIиб. ДР-ла БекIли Россияла Игит МяхIяммад НурбяхIяндовла памятникличи ва цархIилти гъабзадешчебти сергокъалалантала портретунала гьала вавни кадихьиб. Минутлис лехIдеш багьахъурли, илдала хIурматбариб.
Муниципалитетла активличил къаршивикибхIели, С.Меликовли, июньна 23-личир кадикибти анцIбукьуни гьандуршули, такьсирчибала кьукьнала баркьудлуми районна гIядатла адамтачи сеналра къячдикахъес асухIебирар или багьахъур.
«Дагъистанлантала ва сергокъалалантала хIекьлизир дирути гIяйибти марти ахIен, ва илдас сегъуналра сабабра агара. Ну иша вакIибсира бурес: ишбархIи нушани чула хIурматбарибти игитуни абикьурси районна вакилти сарливан, нушани хIуша мурталра гIердурцура», — цIакьбарили буриб С.Меликовли.
Илини мерличибти адамтани сунес кумекбарибти аги-кьяйдаличилара гьанбикахъиб: «2012 ибил дуслизив ну чумал баз хIушала шила мякьлав калунсири, итхIели нушани Сергокъалала ва Къарабудагъкентла районтазир хасти далдуцуни дурадуркIутири. ИлхIели нушани мерличибти халкьла кумек чебиусири. Илдани нуша шинничил, урцуйчил ва цархIилти секIайчил гIердурцулри. «Нушани хIушаб дирусигъуна кумекбирехIе, амма илди вайнукьабазирад дерцахъабая, нушаб паргъатли хIердиэс дигулра», — илкьяйда бикIутири илди. Шантала баркьудлумачибли сабри арагIебли Дагъистайзир вайти кьасанала бегIтала мурадуни детхIедерхахъес имканбакIибсира».
Республикалис къиянти замунтазир Сергокъалала районна бахъалгъунти вакилтани терроризмала шайчибси урехи агарбирнилизир бутIакьяндеш дирутири, ишбархIи биалли, цаванзалантани СВО-ла мер-мусаличир чула хала бегIтала асилти баркьудлуми даимдирули сари.
«Россияла Игит МяхIяммад НурбяхIяндовла «Дузеная, узби!» ибти дугьбачил ишбархIи дергълизи кабулхъули саби СВО-ла бутIакьянчиби. Илди дугьби азаддеш ва хъархIерагардеш багьандан бургъутас жили детаурли сари. НурбяхIянд МяхIяммадович, гIяхIси бяркъ бедибси дудеш сайливан, нушаб лебтасалра гIибратли ветаурли сай. Нушани илдигъунти сергокъалалантачи пахрубирулра. Ил багьандан лебилра администрация ва арагIебли муниципалитет сегъунти-сарил бархбасунази ахъили саби викIни – ил бархьси ахIен», — аргъахъиб республикала БекIли.
Июньна 23-личир кадикибти анцIбукьунала черкад дахъал гъай-мез адилкьутас Сергокъалала районна – гIяхIцад машгьурти гIялимтала, тухтуртала, писательтала, культурала хIянчизартала, спортсментала ВатIа – тарихла асилти бяхIяни къелкадарес сеналра имканхIебикIур или цIакьбарили буриб регионна БекIли.
Россияла Игитла дудеш, РФ-ла Пачалихъла Думала депутат НурбяхIянд НурбяхIяндовли июньна 23-личир детаурти анцIбукьуни хIили башуси дяхъиличил цугдуциб: «Нушаб, сергокъалалантас, дахъал балагьуни чекасес кьадарбиуб, гьаннара илди чекайсехIе. Нушала районнизиб республика ва улка батахъести адамти леб! Июньна 23-личир кадикибти пашманти дурсри пикридарес, гIур илдигъунти хIедиахъес къайгъибарес чебиркур. Амма ил шайчир авараагардеш дакIумадиридая! Ил нушаб ва нушала дурхIнас мягIничебси саби».
Дагъиста духIнарти къуллукъунала министр, полицияла генерал-лейтенант ГIябдурашид МяхIяммадов районна халкьличи дугьаизур: «Нушачиб бузутири, бузули саби ва гьаннала гIергъира бузар азирти сергокъалаланти, сабира чула гъабзадешла баркьудлумачил цархIилтазибад декIарбулхъути. Нушани илдигъунти хIянчизарти лебниличи пахрубирулра. Эгер, ишаб селра бетмааб, амма гьанагарси анцIбукь кабикалли, нушара кумекличи музадулхъехIе, гIямру мяхIкамхIедарили, дирусигъуна бирехIе. Нуша хIушала мякьлар сарра ва мурталра дарх дузехIе».
Сергокъалала районна имамтала Советла председатель ГIяббас ХIусейновли сунела яргализиб исламла динна давлумачила буриб, чузибадра къачагъуни сецадла гьарахъли сабил иргъахъули.
«Бусурманти цаличи ца «Ассаламу гIялайкум» или дугьабилзути саби. Илди дугьбала мягIнала «ХIед даршудеш биаб» ибси саби. Июньна 23-личир дурадеркIибтигъунти анцIбукьунази гъудурвиубси адам бусурманни виэс хIейрар. Илдигъунти баркьудлуми нушани тIашаэс дирехIе цадиублицун, нушала цахIнавис душман виъни аргъилицун. Нуни Кьудратла ВегIлизи тиладибирулра нушала республика ва улка Аллагьлизибад уруххIекIути адамтазибад берцахъес, тяйдили калахъес», — викIи динна вакил.
Муниципалитетла активличилси гьунибаъниличил илкьяйдали гъайбухъун кадикибти анцIбукьуначи авараагарти районна адамтира, чулира лебилра сергокъалалантала пикруми аргъахъибти: МяхIячкъалализир ва Дербентлизир хIиллаби дурадеркIибти такьсирчиби чилилра марбирули ахIен ва районнизиб илди гIеббурцути чилра агара.
Ахирличиб ДР-ла БекI Сергей Меликовли сергокъалалантас баркалла багьахъур: «Нуша багьандан гIямру кьурбандарибтани нушази аманатдарибти хIянчи дирехIе. Илдани биалли васиятбарибси ца секIал саби – нушала Дагъиста халкьани уржили ва даршули хIердиахъес».
ДР-ла БекIла ва Правительствола Администрацияла пресс-служба
