Дагъиста парламентли ДР-ла БекIла Администрацияла бухIнабси политикала управлениела гьалавла начальник Запир Алхасов республикала адамла ихтиюртала шайчивси уполномоченныйла къуллукъличи катур.

Сунела бузерила хIяракат Запир Мухтаровичли бехIбихьибсири жагьилтала политикала кьялилизиб. 1999 ибил дуслизиб акIахъубси Дагъиста пачалихъла университетла жагьилтала къуллукъунала шайчибси комитетлис ил сайри сиптакарра ва илала цаибси руководительра. З.Алхасовли далкьаахъурти тяхIяр-кьяйда кIинайс республикала пачалихъла лерилрара-сера вузанази духIнакаибтири.

Илини илкьяйдали жигарла бутIакьяндеш дирутири республикала политикала гIямрулизирра. Запир Мухтарович МяхIячкъалала шагьарла хIябалра созывла собраниела депутатли викIибсири, суненира санигIятлашалти комитетунас бекIдеш дирули: социальный бяхIчибизла политикала, туризмала ва спортла, илкьяйдали дуралати бахбасунала шайчибси.

Запир Алхасовли гIяхIцад сархибдешуни диахъуб спортлизирра. Ил халкьани-урабси даражала спортла мастер, Европала чемпион, Россияла Федерацияла хIяйна чемпион, каратэла шайчибси Дагъистан Республикала чемпионатличив чедивикибси ва Россияла кубок касибси сай.

Алхасов Запир Мухтаровичли ДГУ-ла аспирантура таманаили, пачалихъла ва муниципалитетла управлениела факультетлизиб преподавательла хIянчира жавабкардешличил бузахъули саби.

2023 ибил дуслизив ил, «Дугила буцIи» бикIуси хIяракатлизив левли, дявила хасси балбуц бетурхуси мерличи кумекличил вякьунси сай.