Гьарил шила багьа ахъбурцуси багьадур камируси ахIен. Ил­гъуна шантани пахрубаресил ур­­ши айкьурси хъалибарглара хIурмат-кьи­мат ахъти дирар. Украинализиб хасси бал­буц бехIбихьибхIейчирадли Да­ха­даев­ла районнизибадти бургъантани игит­ти бар­кьуд­луми дурадуркIниличила ба­­гьахъ­ни­би дашули сари илдала хъа­ли­ба­р­гу­начи. Кьялкнила шилизивадси Арс­лан­бек Ра­ба­за­новлис Суворовла ва «Дя­вила асилдеш багьандан» ибти медальти дед­ниличила хабарлира кьялклантицунра ахIи, лебилра дахадаевлантира пахрули би­цIахъиб.

Арсланбек Рабазановли Украинализир дявила анцIбукьуни дехIдихьибхIейчирадли илар бутIакьяндеш дирули сай. Дявила чебла таманбирухIели гъабзадеш ва урехиагардеш чедаахъибси дарган урши улкали ахъли кьиматлавариб ва шабагъатлавариб.
Арсланбек Рабазановли 2013 ибил дусличибадли вягIда (контракт) хIясибли гIярмиялизиб къуллукъбируси саби. Ил дявила южный округла автомобильная ротала водительли къуллукъбирес вехIихьибсири. Ил дуслизибадал илис старший прапорщикла у бедибсири. ИлхIейчирадли кIел дус дикибхIели, А.Рабазанов взводла командирла къуллукъличи лайикьикиб.
Арсланбек Рабазановли Сириялизир кадикибти дявила анцIбукьуназирра бутIакьяндеш дарибтири. Контракт хIясибли къуллукъбируси манзиллизиб багьадур уршили цархIилти мераначир дурадеркIибти дявила анцIбукьуназирра бутIакьяндеш дарибтири. Украинала хасси балбуц бехIбихьибхIели А.Рабазанов взводла ко­мандир сайри. Илини материально-технический гIягIниахълуми дихутири нушала бургъанти лебти мераначи.
ИшхIелла манзиллизибра игит уршили сунела дявила къуллукъуни асилдешличил тамандирули сай. ВатIа гьалабси чебла ламусличил таманбирни багьандан дедибти илала дахъал шабагъатуни лер.
Гьайгьай, гьамадси ахIен дявила анцIбукьуназир бутIакьяндеш дирес. Амма дубурла чIакни къияндешуначи хIербикIути ахIен. Арсланбек Рабазановли ункъли балуси саби ВатIай чина вархьаллира, сунени чинаб къуллукъбираллира, сунечи дебали хIерти бегIти, гъамти адамти, марти юлдашуни, дигути шанти лебниличила. Илдачи ара-сагъли ва чедибдеш сархили Арсланбек Рабазановра лебилра Россияла бургъантира хIулкIули чарбухъабну.