Шила культурализи
Кабихьибси халал пай,
Дигул нушала Хамис
ХIед сари ишарти гъай.

Илдигъунти чар­ха­­рала дугьбачил бехI­­бихьибсири ноябрь­ла 23-личиб, адамтани гарчли бицIибси, МикIхIила ши­ла культурала КIялгIялизиб ду­ра­­буркIуси, сунела гIям­рула гIяхIтигъунти дусми культуралис ва искусстволис харждарибси, шила, районна, республикала багьа чихъли бихуси, «МикIхIи» бикIуси фольклорла кьукьяличил рарх Россияла дахъал шагьуртази ва дурала улкализи раибси (Италия) Хамис Рабазанова 80 дус риънила хIурматлис ду­ра­бур­кIуси балбуц.
Балбуц ибхьули, гъайру­хъунси, шила культурала Юртла директор, илаб ­дахъал дус­мазиб бузуси халкьла театр­­ла руководитель, Ахчакъиз МяхIяммадовани заллизи ца­ла­бикибти Х.Рабазановала бу­зерила ва пагьмулашалси гьуниличил тянишбариб. Заллизибси экранничирад, видеороликуназир чедиахъути Хамисла бутIакьяндешличилти спектакльтазирадти бутIнани, илини дирути делхъли чукурбикибтала уркIбачи гIяхIси асар бариб, адамтала гьав ахъбуциб.
«Нушала Хамис» бикIули дугьабилзан иличи шанти. Биш­тIа­тачилра халатачилра рал­ка­рикибси, халадешла, ук­тем­дешла кIантI сунезиб агарси адам сари Хамис. Му­рул гIям­ру­лизивад жявли шал­гIе­ву­хъи, сунечи хъарбикибти дурхIни жа­гали абикьурли ибгес бажардирикиб. 80 дусла унабурхI ахъибхIелира, жагьилхIеливан сунезир гIямруличи иштяхIра гъирара лерси Хамис Рабазанова гьарли-марли шилизи хIурматличил пайдаларикIуси хьунул адам сари. Илис бикьридеш дариб юбилейличи цалабикибти шантани дурибти дурхъати дугьбани, делчIунти назмуртани, далуйтани, сценаличи дурабухъи дарибти делхъли.
Хамис мубаракрарес шагьуртазибад, цархIилти мераначибад бакIибти микIхIенти-ургаб илала урши-рурси, узи-урши лебри. Хамис лебта­салра разили гьунириулри. Су­нечил барх бузути клубла хIянчизартани хIядурбарибси концертла программали, гьарил бутIакьянчили дурути чархарала дугьбани заллизи кабиибтала уркIби разидариб. Балбуц ункъли ва жагали бузахъуси Ахчакъиз МяхIяммадовасра баркалла хIейкIес хIейрар. Бурес чебиркур, шила культурала Юртлизиб бетурхуси гьарил мягIничебси балбуц Ахчакъизли ахъси даражаличиб дурабуркIули риъниличила. Илра руководительлизиб, культурала хIянчизарлизиб лебси халаси пагьмула ва дагьрила лишан саби.
Сунела хIянчизартачил варх музаухъунси районна культурала Юртла управлениела начальник Халид Му­тIа­лимовли, МикIхIила хала ми­житла имам МяхIяммад Ито­новли, Избербашлизивад вакIибси Хамисла рузила урши Русланни, Хъарлябхъула шилизибад бакIибти Гьубайдатли ва Разиятли, ва бахъал цархIилтани Хамислис дахъал гIяхIти гъай дуриб. Хамислис багъишладарибти жагати далуйти зайдухъахъун Камил МяхIяммадовли, Заур ГIялибековли, Закарья Закарьяевли, Хамис Мя­хIямадовани, Зугьра ХIям­заевани ва цархIилтани. Ил­ди далуйтас гъай, Ахчакъиз Мя­хIям­мадовани бурни хIя­сибли, дел­кIири «Даргала анкъи» бикIуси жамигIятла кьукьяла бутIакьянчиби: Хадижат ГIямаровани (микIхIен), Хадижат ГIямаровани (дибгашан), Кьурбан Ибациевли, ПатIиматли (Шаласи шилизирадси), СягIидуллагь ГIяб­дул­лабековли. Шадлихъла авид жагабариб «Авадан» ансамбльла бутIакьянчи Узага МяхIяммадовли, Адзи Адзиев­ли, Арсен Зияутдиновли дарибти делхъли, гьайгьайра пагь­мучевси музыкант Камил Мя­хIяммадовли дяхъибти макьамтани.
Ил гьарли-марси байрамличи шурбухъунси балбуц, Хамислисван лебилра шантасра хъумхIертесили бетаур. Кьанси дугиличи бикайчи клублизир зайдикIутири далуйтала ва делхъла агурби….
Баркалла Хамис хIед, шанти шадбарибси балбуцла шайчир «гIяйибла регI» хIу ретаънилис!
Иш белкI наб СягIидуллагь ГIяб­дуллабековли Хамис Раба­за­новас багъишлабарибси наз­­му­личибли таманбарес ди­гул­ра:
Дигул бузерилизи
Кабихьири гIяхIси пай,
Рабазанхъала Хамис
ХIед бучIулира далай.

БегIунси хъу бакIахъес
Узар, кьаслизив хъубзар,
Илгъунали чейисра
Культурала хIянчизар.

ХIянчила гьарбизурдеш
Къайгъилизир сархули,
Пагьмула нураназир
Зубариван ухулри.

Баркалла рузи Хамис,
Шантачил хIу рирнилис,
ХIялалси кьацI букули,
Культура гIеббурцнилис.