Нушала ахIерси Хайдакь машгьурси саби сунела тарихличибли, культу­ра­ли­чибли, тIутIала унхърачибли, пергер адамтачибли.

Амма бегIлара бекI­ли­биубсигъуна нушала давла саби —адамти, чулара пагьмуртачил район гьалабяхI бикути. Илдигъунтачи пахру хIебаресра хIейрар. Дагъистайзибцунра ахIи, арагIеб Россиялизибра нушала ахIерси Хайдакь машгьурбирули, нушаб гIибратли бетарули, бузутири ва гьаннара бузули саби илди. Илдани гьар баркьудилизиб сархибдешуни диахъубти ва мурхьти къел датурти сари: гIилмулизир, багьудилизир, куль­турализир, спортлизир, арадеш мяхIкам­бирнилизир ва цархIилти шалубазирра.
Илдигъунти адамти Хайдакьла тарихла «мургьила мягIдан» саби. Нушала мурад — илдала пагьмуртала черкад гIилму-ахтардила хIянчи дурадуркIни, материалти дурчни, мяхIкамли дихI­ни, чеалкIуси наслуличи тарихла, гIяда­тунала ва культурала «мургьила мягI­дан» баахъни.
Илис бикьридеш дирули, гьалмагъунала «Кунацкая» клубла ва «Хайдакьла гIинзурби» литературала цалабяхъла далдуцунала программала дазурбазиб, «Кайтаги» центрлизиб «Хайдакьла пергер адамти» бикIуси вечер бетерхур. Ил балбуц хасбарибсири Санчила шилизибадти Дагъиста телевидениела ва радиовещаниела дикторти, бузерила ветеранти Рабазан ва Гулжанат Нажмудиновхъала хъалибарглис.
Вечер дураберкIахъес кумекбариб Россияла халкьла гIядатунала культурала «Кайтаги» бикIуси ва районна адамти социальный бяхIчибизлизиб гIеббурцуси Центртани.
«Хайдакьла район» МР-ла администрацияла бекIла кумекчи Шарапудин АсхIябовли буриливан, бузерила ветеран, ДР-ла культурала урибси хIянчизар Рабазай, дахъал дусмазив радиолизив узули, мекелли халаси ва кьадричебси хIянчи бариб. Илала хьунул Гулжанат – Дагъиста архивла баркьудила ветеран, муруйчил рарх ДР-ла телерадиолизир рузусири. Ил шягIирра сари.
Рабазан гьанна нуша-ургав агара, амма илала шаласи сипат, гъамтала, тянишунала ва лебилра дагъистанлантала уркIбазиб даимлис кавлан.
Балбуцла бутIакьянчибас хаслира гIяхIдизур Рабаза рузи, Санчила СОШ-ла дарган ва урусла мезанала мугIяллим Асият ГIязизовала дугьби. Илини халаси дигиличил, уркIила ванадешличил ва пахруличил узила гIямрулизир кадикибти анцIбукьуначила гьанбушиб. Рабазан Нажмутдиновлис хасдарибти Гулжанатла назмуртанира цалабикибтачи халаси асар бариб. Илкьяйдали уркIила дигиличил Рабазайс багъишладарибти назмурти делчIун Санчила урга даражала школала 8-ибил классла бучIантанира.
«Кайтаги» Центрла директор Зубайдат ХIясановани Рабазан ва Гулжанат Нажмудиновхъала гIямруличила, творчестволичила, илдани культурализи кабихьибси пайличила тIинтIли буриб.
Г.Нажмудиновани балбуцла бутIа­кьян­чибала суалтасра чедетаахъибти жавабти дедиб. Сунечила ва муруйчила илкьяйдали гьанбушнилис лебтасалра баркалла багьахъур. «ГIямрулизир ну­шани се-дигара че­даира, дигалли ра­зи­деш, дигалли хумардеш, дяхIяурра къияндешуни… Нушала цIакьаначил, селичилра зигархIедикIули, лерилра секIал сархибти сари. Рабазан тамашала адам вири. Сепайда, ил жявли гIямрулизивад шалгIевухъун. Нушаб илала агри халаси бетахърили бетаур», — рикIи ил.
Балбуцла ахирличир Г.Наж­му­ди­новала гъай хIясибли, культурала Центрла гIяртистунани далуйти зайдухъахъун.