МяхIячкъалала клиникала больницализиб коронавирусла чейхъуси изайзи бикибти зягIиптас хасбарибси арадеш чекъулайбируси (реабилитационное) отделение абхьили саби. Иличила багьахъур больницала бекI тухтур ХIяжимурад Малаевли.

«Арадеш чекъулайбирнилизи кадерхурли сари: дармунтачил аравирни; гьава гIягIниси тяхIярли бяхIчииъни(температура, хIябцдеш, ванадеш, гьавала хъярхъдеш, магнитла, хутIла гьунарти пикрилизи касили); бальнеотерапия — минеральный шинна гьарил шайчибадси кумек (шин дужули, дарг шинни умудирни, шиннизи кабилхьули); теплогрязолечение — шинкIати, ванати дарма чяртлизи кабилхьахъни, изуси мер кIапбирни; кинезиотерапия — физкультурала упражнениебала кумек; клиническая психология — адамла зягIипдешличил дархдасунти уркIи-хIялланас кумек; логопед — гъайикIнилизир детаурти дарсдешуни гIяхIдулхъахъни, эрготерапия — вяшикIес, пикриикIес хIял гIяхIбухъахъес кумек. Лерилра секIал цахIнар дяхIчиаили, камси заманала бухIнаб зягIипсила арадеш къулайбарес вирули сай, чархла арадешцун ахIенну, уркIи-хIялра гIяхIдулхъули зягIипсилис, халаси кумек бетарахъули саби. Отделениелизи буцес гьалаб, зягIиптала аги-хIял гьарра шайчирад хIясибдирахъу. БегI гьалаб кумекличил гIеббуцили бирар covid-19 изайчил ургабси тяхIярли ва декIли зягIипбикибти адамти», — буриб ХI.Малаевли.
ГКБ-ла арадеш чекъулайбируси отделениелизи кайхьес багьандан, 55-45-22 телефонна номер хIясибли зянкъдяхъили, вегIла у белкIахъес вирар.