Дусличи-дус халкьла лугIи имцIабикIухIели, социальный бяхIчибизла объектуни ибхьни дебали мягIничебсили бетарули саби. Илдани халкьла гIямрула даража чебиахъули саби. Социальный бяхIчибизла объектуни лушни пачалихъла гьала хили пикридарибти масъултазибадли ца саби. Халкьла гIямрула шуртIри гIяхIдухъахъес багьандан, декIар-декIарти проектуни акIахъубли, гIямрулизир детурхахъули сари. Мисаллис касалли «Дила Дагъистан — Дила гьундури», «Дила Дагъистан – Дила шин», «100 школа» ва цархIилтира. Илди проектуназир республикала лерилра районтанира бутIакьяндеш дирули сари. ХIера, гьалабван Сергокъалала районнизир социальный бяхIчибизла хIябал объект абхьиб: Сергокъалализиб «Олимпийский» бикIуси бамсриихъуси анхъ, Ванашимахьилизиб – 40 дурхIялис, Кьадиркентлизиб — 35 дурхIялис хасдарибти унхъри.
ДурхIнала унхъри «Демография» бикIуси миллатла проектла дазурбазир, гьаннала заманала тIалабуначи далдикахъили, делшунти сари.
«Олимпийский» бикIуси бамсриихънила анхъ цагъуна уличилси дурхIнала анхъла мякьлаб мерлабиубли саби. Районна центрлизиб ил авэсил анхъ саби, сабира «Дила Дагъистан — Шагьарла къулайти шуртIри» проектла дазурбазиб гIямрулизиб бетурхахъуси, «Шагьарла къулайти шуртIри акIахъни» программа хIясибли абхьибси. Илала мер-мусаличиб дурхIнас хасбарибси майданра абхьили саби.
Объектуни ибхьнила далдуцуначир Сергокъалала районна бекI МяхIяммад ГIямаровли, ДР-ла Халкьла Собраниела депутат, Сергокъалала районна центральная больницала бекI тухтур ГIяли БяхIяммадовли, республикала цаси заказчик-застройщикла Дирекцияла вакил МяхIяммад МяхIяммадовли, районна багьудила Управлениела начальник Ханум ГIисаевани, районна жамигIятли бутIакьяндеш дариб.
Цалабикибти мягIничебси анцIбукьличил мубаракбирули, муниципалитетла руководитель М.ГIямаровли районнизир гьар дус сагати объектуни лушниличила ва дуркьдиубти лутIи-хьулчилизирадал сагадирниличила багьахъур. Илди сари дурхIнала унхъри, школаби, шинна линияби, гьундури. Район бекIахъудилашал ва экономикалашал гьалабяхI башни халкьла гIямрула шуртIри къулайдарниличи бяхIчиаибси саби. Илдала кумекличибли гIяхIцад дусмазиб Сергокъалала район гьабкьятала къяйлизиб кавлули саби. Челябкьлализирра дахъал пикруми гIямрулизир детурхахъу.
Пачалихъла асарчерти программабала ва миллатла проектунала икьайчил халкьла гIямрула шуртIри гIердурцнила, ва илди культуралашал гьалабяхI башнила шайчирти хIянчи гIуррара даимдирниличи дирхехIе.
Сергокъалала районна
администрацияла
пресс-служба
