РДКБ-ла тухтуртани чучи карихьунси рурсила тухтур ретаахъес иштяхI акIахъуб.
12 дус риубси Злата Красниковани Пираговла уличилси РДКБ РНИМУ-лизиб арадеш къулайбирули сари. Федеральный клиникализи кIина ракIибси ил, тухтуртала хIянчиличи хIекьли тамашариубли, халараибхIели сарира тухтур ретаэс кьасбариб.

Ишдус атхIеблизиб Астрахань-Элиста-Ставрополь гьунчиб халаси бехIемцI кабикибсири. Илаб Олимпиадала резервла школала биштIатала баскетболла командаличилси, Волгоградла шагьарлизибадси автобусра лебри. Ил бехIемцIлизиб шел рурси алхунтири ва 12 адам дяхъи-хъаслизи бикибтири. Шел спортсменка МЧС-ла самолетличиб Пираговла уличилси Россияла биштIатала клиническая больницализи баахъибтири. Илдазирад ца, Злата Красникова, итмаданал реанимацияла отделениелизи караркьибсири.
«Реанимациялизир Злата баз карихьи калун, – гьанбиркахъули сари рурсила неш Светланани. – Илар лерай иличил реабилитацияла тухтурти бузес бехIбихьиб. Дила рурсила арадеш циила къулайбиубхIели, ил нейрохирургияла отделениелизи шурратур. Илар ил арариахъес бажардилизи ахъиб».
Реабилитацияла тухтуртала къайгъначил рурсила арадеш гьар бархIи гьалабяхI башулри: илдала асар бусягIятал чебаэс вирулри – хIера, иличибли, Златала гъай хIясибли, тухтур-реабилитологла хIянчи гIяхIдизур.
«Дила арадеш къулайбируси, физкультурала шайчирси дебали гIяхIси тухтур сари – Анаста­сие­ва Ольга Александровна, – бурули сари Златани. – Нушани ле­рил­ра секIал хъярхъли дирулри: цаибси дарсличир кариира, кIии­билличир – кроватьличирад кьяш­ми чIябарличи кадатурра, хIябъи­билличир – тIашризурра. Ну­ни гьанна балулра севан къиянси буилил вашес. Гьалар иличила пикрилра рулхъуси ахIенри. Гьанна ну рашулра, рархьли хIериасра. ДуцIрикIес рирули ахIенра. Ну хIеррикIулра секьяйда лебилра дуцIбикIулил, ва дила илкьяйда барес бетхIерусиван билзули саби, амма гьалаб набра, гьайгьайрагу, илгъуна баркьуди дураберкIес гьамадли бири».
Гьанна рурси, сунела сари, багьлали рашес рирули сари, иличил тухтурти гимнастика дирахъули бузули саби. Илала дурарад, дурсрачир дурадуркIути сари массажла сеансунира, бурбуни къиздирнира, физиопроцедурабира. Жагьси спортсменкас дигули сари дурхIни башахъес ва дуцIбикIахъес кумекбирес.
«Ну больницализи рикайчи, дила тухтур ретаэс ибси сегъуналра пикри хIебири. БиштIати дяхъи-хъаслизи бикибхIели, операцияби дарили гIергъи, илдала арадеш къулайбирни тамашала секIал ахIенну, дебали чараагарси ва хIяжатси хIянчи саби. Наб дигулра зягIипбикибти дурхIни сагадан кьяшмачи тIашбизахъес кумекбирес», – буриб рурсили.
Злата рикIуливан, реабилитацияла хIянчиличи бурсикарирули сари. Спортсменкани декIар-декIарти тяхIурти гIерасес къайгъибирули сари. Илис упражнениеби ва процедураби дирнила гьаб-гIергъидеш багьес дигули сари.
«Наб дигулра тухтурла сани­гIят­личи регIриэс, асубирар ишаб, Москвализиб. Амма, кIинайс Вол­гоградлизи чаррухъес кьас саби, сенкIун ишаб, тах шагьарлизиб, гIяхIти специалистуни леб, улкала мер-мусаличиб биалли, илди камли саби. ИмканбакIалли, дила шагьарлизиб нуни ну-регIси реабилитационный центр абхьес дигахъаси», – багьахъур спортсменкани.