Ассаламу гIялайкум, ца мургьила, ца арцла къаркъа ка­бир­хьули, «Замана» бикIуси къа­ла лушанти, мургьила тIул­бачил, арцла някъбачил ил къала някьиш­барили, къугъа­би­ранти пагь­мукар зяхI­мат­­чиби! БуцIарли-бугIяр­ли хIеи­ли, гьарилла хъули хIу­ша­ла уркIбала вана­деш, малхIямдеш, гIяхI­ла хабурти за­маналичир даахъес ибкь­ли ва гъи­ра­личил дузанти газетала хIян­чи­зарти!

Ассаламу гIялайкум, даргала рухI­ласи давлала пагьмукар устни: поэтуни, писательти, корреспондентуни, мухбирти, даргантала тарих, культура, этнография ахъдурцули дузанти гIялим­ти!
Ассаламу гIялайкум, даргантала рухIла давла мицIирли калахъес далайдикIути ва дулхъути!
Ассаламу гIялайкум, хIур­матла дарганти, дарган девла мягIна ва нешла мезла кьадри-кьимат баланти, илди ми­цIирли калахъес хIяракат дакIуби­ран­ти!
Ассаламу гIялайкум, «Зама­на» газета къулбасбиранти, ила­ла гьарли-марти гьалмагъуни!
АхIерти дарганти! ХIера, 1921 ибил дусличибад бехI­бихьили, декIар-де­кIар­ти умачил дурабулхъуси, саби агарли нушала гIямал хIебируси, дахъал катругуни ахъибси «Замана» газета ишдус 100 дус биубли саби. Манзил хIясибли халбаралли, газета илцад-декIар бухънабаилира ахIен.
«Замана» газета – гьарил дарганна гIямрулизи атIунси, илис икьалабиубси ва гьарра шайчибад илала гIямрула марси хъарихъ саби. Нуни «Замана» ва районна «Сагаси гьуникад» газетаби, «Дагъистанна хьунул адам», «Гьалмагъдеш», «Лачин» журналти 50-60 дусра-сера къулбасдирулра. Илдазибад цалра заманаличиб хIебакIалли, марлира, беркайчи дила иштяхI бетихъур. Илди кайсухIели, набчи дебали дурхъаси гIяхIял вакIибхIеливан, уркIи разидешла хIяланани бирцIур.
Гьайгьайрагу, газетаби, журналти ва жузи нушала гIямрула марти гьалмагъунили детаурли сари. ЦархIилти дарганталара илгъуна пикри саби или гьанбиркур.
Нуни чедиб гьанбушибти лебилра дарганти «Замана» газета 100 дус биъниличил уркIи-уркIилабадли мубаракбирулра. Гьариллис 100 дусла арати, разити, талихIчерти гIямру дулгулра. Газета дигахъеная, илис хIушала унза-бурхI гьаргли далтеная, ил хIушачи гьаман жибиреная ва бучIеная. «Замана»-ли хIушаб дахъал гIяхIти хабурти дуру, насихIят гIеббуру, бархьси гьуни чеббикIахъес кумекбиру, хIушачил лякьир бумжахъу.
ЦIудхъурла курегаван, дерхъаб хIушала гIямру, дила ахIерти дарганти! Бургьаб гьалмагъ «Замана»!
«Замана»-лис дила багъишла:
«Замана» — дяхIим­цIа­ла
Дагъистайзиб ухуси.
«Замана» саб тIякь цIала
УркIби ванадируси.

«Замана» дяхънуша саб
Духусила гьар изайс,
«Замана»-ли сай адам
ХIекьли духувируси.

Заманали адамти
Кьяркьбиру, бухъянбиру,
«Замана»-ли бухънаби
Булхъахъули жагьбиру.

«Замана»-ли гьар секIал
Ибгили гьунчидуршу,
«Замана»-ли мар-марли
АнцIкьи ва децI кадуршу.

Заманали буриб гъай,
Гьайгьай, мургьила бирар,
«Замана»-ла гьарил хIярп
Марли, якьутла бирар.

ВирхIейрар гьар замана
Адам дамлизи вирхъес,
Лебси саби «Замана»
Адамлис бамсриихъес.

Заманали ардиху
Хъярхъли адамла жагьдеш,
Илдас гIякьлура биху,
Агарли чусра шакдеш.

Заманали букул кьацI
Гьар адамлис дарман саб,
«Замана» кьидасилис
Дазу агар агъу саб.

Заманали хIерзибси
Кьяшмас балагьла бирар,
«Замана»-лизиб суал
БекIлисра дарман бирар.

ДугIли замана буркIни –
ГIякьлу агнила дазу,
«Замана» бучIул манзил –
РухIла давлала дазу.
«Их къаркъа дила кьалри»
Эси замана лябкьян,
«Замана» дила кьалри
Ибси замана бакIиб.

«Замана» хIербарайчи
Вари, усес камалхьад,
Заманачив айзурли
Ил хIебелчIи мабалтад.

Заманачив алзадли
Гьар замана хъу духъар,
«Замана»-ла зиланна
УркIи разили бирар.

«Замана» бархьбатурли,
Вари, хIу вяшмайкIудра,
«Замана» хIебучIуси,
Марли, вирар сукъурси.

«Замана» гIяхIси бирар
Гьар замана башуси.
СягIятра гIяхIси бирар
ХIекьли замана бархьси.

«Замана» кайсусила
Дусли хIяйна хъу духъаб,
Ил къулбасбарибсила
Уси мургьили бицIаб!

Арали бат «Замана»
ГIяхI хабурти дихахъес,
Мабиъ гьалабиз сунес
Гьунчибад чеббалкIахъес!

Заманали гьардиру
Гьарилла хатIабира,
«Замана»-ли гьаргдиру
Лебталалра уркIбира.

Замана саби дуцIли
ГIямрула ахирличи,
«Замана» саби гьуцIли
Шалати гIямруличи!

«Замана» дяхIимцIала,
Дагъистайзиб ухуси,
«Замана» саб тIякь цIала,
УркIби ванадируси!