Адам акIубхIейчирад яхIра, гъирара, кьасбарибси бетерхахъес гьуцIра дарх дашули сари. Амма лебтанилра илди пайдаладирули ахIен. «Нушани хIедирехIе барес» или сегъуналра ганз кайцIули ахIен. Амма илдачи ургIебли, арадешлизир нукьсандеш лерти жагьилтира, чилалра хIерудилиу хIебикили, чула чули гIямалра барили, илала дурабад спортлизирра сархибдешуни диахъес бажардибиркули саби.
Мурул адамтас гIелахIебухъи, спортлизир гIяхIцад чедибдешуни сархили, гьалабяхI башути рузбира леб. Илдигъунти пергер дарган исбагьибачила бурес дигулра дила макьалализибра. Илди саби Барият МирзагIялиева ва Эльмира Басирова. Илдани ургилизибад иртнила шайчирти, арадешлизир нукьсандешуни лерти спортсменти-ургарти абзаначир бутIакьяндеш дирули сари. Гьарилличила декIарли бурес чебиркур ишаб.

Барият МирзагIялиева акIубси сари МяхIячкъала­лизир. Илала бегIти Хайдакьла районна Жавгъатла шилизибадти саби. Тухтуртала гIяйибличирли ил жявли чулахъ ретаурли, я уркIила гьав, я арадеш ункъбарес ибси сегъуналра пикри агарли рири. Амма 11 дус гьалаб саригъуна, арадешлизир нукьсандешуни лерси уршили илис спортлизи ахъахъес маслигIятба­рибсири, илхIели рехIрихьибсири ур­гиличил иртнила спортла абзаначир бутIакьяндеш дирес. Спортлизи ракIибти бурхIначирад Бариятла дахъал сархибдешуни лер. Россияла чемпион ретаур, илкьяйдали Россияла ва Европала кубокунира сархиб. Илини дунъяла Чемпионатлизирра бутIакьяндеш дариб. БусягIятра Бариятли сунела замана акьули буркIули ахIен, ил сунела устадеш имцIадиахъес тренировкабачи рашар. Гьаман юлдашуначил ва саригъунти спортсментачил гьунириули рирар. Сари илгъуна агиличир риънила шайчиб сегъуналра пашмандеш агара, мурталра илала дяхIличиб хIулбукIри бирар. Арадешлизир нукьсандешуни лерти адамтачи дугьарилзули, Бариятли илди уркIиагархIебиахъес, спортла сегъуна-биалра журализир бутIакьяндеш дирахъес жибирули сари. БусягIятла замана Барият нешличилра узичилра хIеррирули сари, илди саби илала къакъбяхъунира кумекчибира.

Нушала макьалала цагьатIи игит сари Эльмира Басирова. Ил акIубси сари Калмыкияла Республикала Комсомольский бикIуси поселоклизир. ГIур илдала хъалибарг Дербентлизи гечбиуб. Эльмирала бегIти Сергокъалала районна УбяхI МулебкIила шилизибадти саби. 2011 ибил дуслизиб гIяхIти кьиматуначил Дербентла 21 ибил школара белчIи, ил юридический техникумлизи карурхули сари. ГIямруличи ва белчIудиличи гъира лебси дарган рурсила гIямру ца минутла духIнар дарсдиуб. 2003-ибил дуслизир Эльмира бехIемцIлизи рикиб, ва баягъи анцIбукьла асарлиур илис коляскаличирцун рашес чебуркъуб. БехIемцI бетаурли 15 дус дикили гIергъи, 2018 ибил дуслизир ил ургиличил иртнила журала спортлизир бутIакьяндеш дирес рехIрихьиб. 8 дусла духIнар гIяхIцад абзаначир бутIакьяндеш дариб ва чедибдешуни сархиб. Ишаб бурес чебиркур Эльмирани Россияла чемпионатличир бутIакьяндеш дарили, чедибдеш сархибсири. Илини Россияла ва Европала кубокунира сархиб, ва дунъяла Чемпионатличир бутIакьяндеш дариб. Илини чумал дус гьалар хъали-цIа дуциб, гьанна ил ца рурсила ва ца уршила неш сари. Ил сеналра акьули хIеруар, лерилра хъулирти хIянчира дарили, тренировкабачира рашар, сунела дурхIначи хIеруди баресра замана бургу. Адамтачил ралкарикибси Эльмирани, хаслира— чеалкIуси наслу, вайти секIайзи хIебархахъес ва спортлизи зумали ихъахъес жибирули сари.
Къияндешунас мутIигIхIебакIибти, иличи ургIебли сархибдешуни детаахъес бажардибикибти дарган рурсбас гIямрулизир ва спортлизир гьарбизунира, чIумаси арадешра, духъянти гIямрура дулгулра.

Кьади ГIялисултIанов