Ахъушала районнизиб ишдусра ункъли школа хъараахъурли, имтихIянтас ахъти баллани касили ва мургьила медальти сархили сари гIяхIцад дурхIнани. Илди выпускникунази гIяхIси багьуди касахъибти мугIяллимтира баркаллаличи лайикьбикили саби.
ИмтихIянтас ахъти баллани касиб Ахъушала урга даражала цаибил школала дурхIнани: ГIябдулкаримова Мариям ШайхмяхIяммадовнани историяла предметлис —78 ва урус мезла предметлис — 72 балл, МяхIяммадова ПатIимат МяхIяммадовнани урус мезла предметлис — 91 ва химияла предметлис — 78 балл, МяхIяммадова Хадижат Камалутдиновнани химияла предметлис — 97 ва урус мезла предметлис — 81 балл, ГIябдуллаева ГIяйшат МяхIяммадовнани урус мезла предметлис — 91 балл, химияла предметлис — 86 балл ва «профильная математика» бикIуси предметлис — 72 балл, МяхIяммадов Заур Мурадовичли урус мезла предметлис — 70 балл ва «профильная математика» бикIуси предметлис — 72 балл, ГIяйсамирзаева Урузмаг ГIялихIяжиевнани историяла предметлис —80 балл, ИсмягIилова Саният ГIябдуллаевнани химияла предметлис —74 балл, МяхIяммадов Дауд ГIябдулнасировичли биологияла предметлис — 78 балл.
Илдигъунти духути, саберхурти, белчIудиличи гъирачебти, чула челябкьлаличила пикрибикIути, бегIтала ва мугIяллимтала насихIятуни чесибти уршби-рурсби цархIилтасра гIибратли бетаурли саби.
МугIяллимтас баркалла бикIули саби илди дурхIнала бегIти. СенахIенну, педагогунани халаси бузерила пай саби кабирхьуси дурхIнази багьуди касахъес, илдас гIяхIси бяркъ бедес, челябкьлализиб гIямрула бархьси гьунчибад чебхIебухъахъес, вайти анцIбукьуназибад мяхIкамбарес къайгъни дурадуркIули бузули, чула гIямру дурхIнас ва школалис хасдарибти.
Илди гIяхIти кьиматуначил школа таманбарибти уршби-рурсбас, вузаназиб чула белчIудира даимбарили, гIяхIти, халкьлис манпагIятти санигIятуначи бегIбиэс кьадарбиаб. Гьунби гIяхIдираб, дурхIни!
Сабият ГIябдуллаева
